رووسیا سەختترین پەلامارەیلی لەبان کیێڤ جیوەجی دەێد
شەفەق نیوز/ رووسیا، شەوەکی ئمڕوو، پەلامار شارەیلیگ لە ئۆکرانیا دا، ک بویە هووکار کوشیان مەدەنیەیل و ویرانکردن بیناژیرەینەیل، ک دیارە یە پەلامارەیل تووڵەسەنین بوی، دویای ئەوە ک فلادیمێر پۆتین راگەیان تەقینەوەگە لەبان پیەڵ قرم پەلامادیگ تیرۆر بویە.
مووشەکەیل لە سەختترین پەلامار کەفتنە بان کیێڤ پایتەخت، لەوەختیگ رووسیا واز لە تەقەلای داگیرکردنی لە یەکەمین هەفتەیل جەنگەگە هاودد، و راپۆرتەیلیگ بعد تەقینەوەیلیگ لە لیفێڤ و ترنۆبیل و جیتومێر لە خوەرئاوای ئۆکرانیا کردن، و هەمیش لە دنیبرۆ و کریمنشۆک لەناوڕاس ئۆکرانیا، و زابوريجيا لە باشوور و خارکیێڤ لە خوەرهەڵات، و دەنگ رممەیش لە ناوچەی بیلجورود رووسی نزیک سنوور ئۆکرانیا رەسیە گووش.
لە کیێڤ، پەلامارەیل رەسینە ناوڕاس پایتەخت قەرەباڵغ، و لەش پیاویگ وە دڵنگ جینز کەفتە ناو جادەیگ لە چواڕیانیگ سەرەکی پڕ لە ماشین سزیاگ، و لە یەکیگ لە باخچەیل، سەربازیگ دڵنگ ژنیگ دڕێد لەبان گیا کەفتیە، وە تەقەلای چارەکردن زەخمەیلی، و ژنیگتر لە شوینیگ نزیک، خەڵتان خوینە.
پۆلیس شارەگە وت: پەنج کەس لەلای کەمەو کوشیان، و ١٢ کەسیش زەخمدار بوینە.
تەقینەوەیگ چاڵیگ نزیک یاریگای مناڵەیل لەناو باخچەیگ لەناوڕاس کیێڤ دروس کرد، و دویکەڵ لە چشتیگ هەڵسیا چماێ مووشەکیگ بوی، لەناو زەوییگ خەڕگین.
دویای ئەوە لە شەوەکی، بڕیگتر لە مووشەک کەفتنە ناو پایتەختەگە، ک ریوارەیل وەزوی کەفتنە مینەی پەنا لە دەروازەیل ویستگەیل میترۆ و لەناو گەراجەیل.
فولوديمير زیلینسکی سەرۆک ئۆکرانیا لەبان تیلیگرام وت: خوازن ویرانمان بکەن و لەبان زەوی بسڕنەمانەو، مووشەک هەس کەفێد، وەداخەو کوشیان و زەخمداری هەس.
· وە مووشەک قسە کەێد
دیمترۆ کولیبا وەزیر دەرەوەی ئۆکرانیا لەبان تویتەر نویسان: تەنیا رەفتار پۆتین خوەی تیرۆرکردنە لە شارەیل بیوەی ئۆکرانیا، وەلێ ئۆکرانیا نیەشکنێد، و یەیش جواویە ئەرا گشت ئەوانەگ تەقەلای ئارامی دەن، ئەوانەگ خوازن لە ئاشتی وەردی قسە بکەن، پۆتین تیرۆریستە وە مووشەک قسە کەێد.
فیتالی کلیچکۆ سەرۆک شارەوانی لەبان سۆشیال میدیا وت: پایتەختەگە کەفێدە وەر پەلامار تیرۆرستەیل رووس، مووشەکەیل رەسینە ئامانجەی ئامانجەیلیگ لەناوڕاس شارەگە، لە ناوچەی شيفتشينسكيفسكی و ناوچەی سولوميانسكی فیکەی هوشداری کوتیا، ئەراوە هەڕەشەگە وەردەوامە.
وتیش: ئەفسەرەیل رزگارکردن یاسا جادەیل ناوڕاس کیێڤ بەسان، و خزمەتەیل رزگارکردن وەردەوامە.
ئی پەلامارەیلە دویای دوو رووژ لە تەقینەوەیگ تیەن زەرەدەیلیگ وە تەنیا پیەڵ رەسانن ک رەسێدە نیمچە دوورگەی قرم، ئەوەسە ک پۆتین لە رووژ یەکشەممە وەپی وت: کاریگ تیرۆریە ئەرا ویرانکردن بیناژیرەینەیل شاریگ گرنگ.
ئۆکرانیا خوەی نەکردە خاوەن ئەو تەقینەوە، باوجی خوەشی ئەرای کرد.
