کۆریای باکووری راوچییگ گولەواران کەێد لەوەر گووشگردنی لە رادیۆیگ بیگانە
شەفەق نیوز/ راپۆرتیگ لە ئێزگەی ئاسیای ئازاد لە زووان سەرچەوەیلیگ لە کۆریای باکووری وت: پیاویگ خاوەن بەلەم راوماسی گولەواران کریا، لەوەر گووشگردنی لە ئێزکەیلیگ بیگانە و قەیەغە کریاگ هەنای لەناو دەریاگە بویە.
پیاوەگە وەناو چۆی ناسریاگە، هالە تەمەن چلەگان، و لە وەردەم ١٠٠ خاوەن بەلەم و وەڕێۆبەر ماسیگردنەگان گولەواران کریا.
کۆریای باکووری ریسگایل سەختیگ دیرێد کۆنتڕۆڵ رەفتار هاووڵاتییەگانی کەێد، و قەیەغەی گووش تەکانن ئەرا فرەی رادیۆ بیگانەگان کەێد.
رادیۆی ئاسیای ئازاد ئاماژە کرد ک پەخش ناودەوڵەتی لەناو دەریا وەگریەێد.
و مەنزەنە کریەێد ک چۆی کخاوەن ٥٠ بەلەمە، و لەلایەن یەکیگ لەو کەسەیلەگ وەگەردی کار کەن بەدی کریاگە.
و ڕاپۆرت رادیۆگە لەزووان وەرپرسیگ کۆریایی باکووری وت؛ چۆی ئەرا دەسەڵاتەگان ئاشکرای کار خوەی کردگە، و توومەت خراوەکاری دژوە حزبەگە وەپی کریاگە.
سەرچەوەگە وتیش؛ هەنای کاپتنەگە لە سوپا بویە کار لە رادیۆ کردگە و لەماوەی ١٥ ساڵ گووش دیادە ئێزگەی ئاسیای ئازاد.
یەکیگ لە هاووڵاتیبەگان ئەرا رادیۆی ئاسیای ئازاد وت دەسەڵاتەگان خوازن چۆی بوودە عبرەتیگ ئەرا مەردم ک گووش تەکانن لە ئێزگەیل بیگانە مەرگ هالە پشتی.
رادیۆی ئاسیای ئازاد لەلایەن حکومەت ئەمریکا سپۆنسەر کریەێد، بەڵکم وەشیوەیگ سەروەخوەیی کار کەێد.
