دوێەتەگەی رەفسەنجانی: باوگم تەمەی سولەیمانی کرد دەسوەردان لە سوریا نەکەێد
شەفەق نیوز/ فایزە رەفسەنجانی، دوێت سەرۆک کۆچکردگ ئیران، هاشمی رەفسەنجانی، رەخنەی دەسوەردان ئیران لە سوریا کرد، و ئاماژە کرد ک ئی دەسوەردانەیلە بوینە خوینی ٥٠٠ هەزار کەس، و تیش؛ باوگی دژوە بەشداربوین ئیران لە جەنگ سوریا بوی.
دوێەتەگەی رەفسەنجانی وتیش؛ باوگی ک سەرۆک کۆمەڵەی دیاریکردن بەرژەوەندی رژێم بوی، (لە دویای تەواوبوین ماوەی سەرۆکایەتیی) دژوە بەشداربوین ئیران لە جەنگ سوریا بوی، وهەر لە سەرتای قەیرانەگە لە سوریا خەوەردار قاسم سولەیمانی وەرپرس وەرین فەیلەق قودس وەو ناڕەزایەتییە کرد.
لە چەوپێکەفتنیگ وەگەرد ماڵپەڕ (ئینساف نیوز) چاکسازی ئیرانی وتیش؛ سولەیمانی وەرجە چگنی ئەرا سوریا سڵای باوگم کرد، و باوگم وەپی وت نەچوودە سوریا.
وتیش؛ لە ساڵیاد کوشتنی، کەسیگ باس کردەوەگەی نێکەێد، بەڵکم باوگم خاوەن زیرەکی و دویر نووڕستن بوی، و تەمەیی کرد نەچوود، و قەسەگەی راس بوی.
خانمە پەرلەمانتارە وەرینەگە پرسیار کرد: رەفتارەیل سولەیمانی و سیاسەت وەرخودانمان چ ئەنجامیگ دەرکرد؟ و چە لە چینەیل ئابووری و ئازادی و سیاسەت دەیشتەکی وەدەسمان هاورد؟، وتیش؛ سیاسەت وەرخودانی هیچ چشتیگ ئەرامان نەیشت تا شانازی وەپیەو بکەیمن.
فایزە رەفسەنجانی رەخنەی سیاسەت ئیران لە ناوچەگە کرد و وت: برادەرەیلمان لەدەسمان چگن، و سیاسەت دەیشتەکیمان بویە هاوشیوەی سیاسەت ناوخۆییمان ک لایەنگرەگان بوینە رەخنەگر، ئیجا رەخنەگرەگان بوینە ئۆپۆزسیۆن.
لەباوەتیگ تر دوێەتەگەی رەفسەنجانی وت؛ خوەی ئومیدیگ داشت ک دۆناڵد تڕامپ لە هەڵبژاردن ئەمریکا سەربکەفێد، تا جەخت بکەێدە بان رژێمەگە تا سیاسەتەیلی وەرانوەر گەل ئیران ئاڵشت بکەێد، ئەوەیش لە سەردەم دیموکراتیەگان ئەنجام نێەوود چوونکە رەفتاریان وەگەرد ئیران نەرمترە.
فایزە رەفسەنجانی وتیش؛ تەقەلایل ئیرانیەگان ئەرا چاکسازی هیشتن توندوتیژیەگان فرەترەو بوون، و دووپاتکرد ک ئەگەر خوەی ئەمریکی بویاتاد دەنگ وە تڕامپ نەیا.
وتارەیل فایزە رەفسەنجانی رەخنەیل فراوانیگ دروس کردن، وەتایبەت لە چینەیل پارێزەرەگان لە ئیران و میدیایل راگەیاننیان، ک جەختکردنە بان وتارەگانی لەباوەت هەڵبژاردن ئەمریکا، و رەخنەگانی لە بان سولەیمانی خستنە پشت گووش.
محسن هاشمی رەفسەنجانی براگەی، ک خوەی سەرۆک ئەنجومەن شارەوانی تەهرانە، داوا لە فایزە کرد داوای لێبوردن بکەێد و وت؛ تڕامپ تەنیا سزا و کوشتن دژوە ئیران وەکارهاورد، داوای لێبوردن لە نووسانەگەد بکە و ناو باوگد خراو نەکە.
رەخنەگەی فایزە رەفسەنجانی ئەرا قاسم سولەیمانی خوسەی نووسەرەیل لەبان تویتەر دروس کرد، ک چالاکوان ئیبراهیم سولتانیان وت: بایەدە فایزە رەفسەنجانی بفرووشیەێدە داعش، تا بزانێد سولەیمانی چ سەرکەفتن گەورایگ وەدەس هاوردگە.
فایزە هاشمی رەفسەنجانی، کەسایەتی چاکسازی و پەرلەمانتار وەرینە، لە ساڵ ٢٠١١ فەرمان شەش مانگ زیندانی وەگرد وسانن جیوەجیکردنی لەبانی دەرکریا، و تا پەنج ساڵ لە چالاکیە سیاسی و رووشنهویری و رۆژنامەنووسیەگان بیبەش کریا، دویای توومەتبارکردنی وە چالاکیەیل پرۆپاگاندایی دژوە رژێمەگە.
