دویای مانگیگ لە دەسگیرکردن ئۆغڵو.. خوەینشاندان رەسێدە مەکتەو و زانکۆیل

شەفەق نيوز/ دویای مانگیگ لە بەندیکردن ئەکرەم ئیمام ئۆغڵو سەرۆک شارەوانی ئیستەنبوڵ لە 19ی ئادار گوزەشتە، هیمان خوەینشاندان تویڕە وەردەوامە، کە رەسیە بەشیگ لە زانکۆ و مەکتەوەیل ناوەندی لە جویراجویر ناوچەیل تورکیا.

ئەو خوەینشاندوبلە کە ئەستەنبوڵ لە یەکەم هەفتە دویای دەسگیرکردن ئیمام ئۆغڵو وەخوەی دی وەرجەیە تەواو بوی، کە رووژاخە هەزاران کەس چیادە ناو بینای شارەوانی ئیستەنبوڵ، و لە گشت تەمەنەیل رشیانە ناو جادەیل چەن شاریگ.

لەی رووژەیل دویاییە لەوەر کۆتایی مانگ رەمەزان کپەو بوی.

وەلێ ئەو ناڕەزایلە کە لە جویلەی غیزی لە مەیدان تەقسیم لە ئیستەنبوڵ لە ساڵ 2013ەو تا ئیسە وەخوەی نەیە، وەرجە دە رووژ لە زانکۆیل ئیستەنبوڵ و ئەنقەرە دووارە دەسوەپی کرد.

وەگورەی ڕاپۆرتەیل خەوەری، ئی ناڕەزایەتیەیلە بەلاوە بوی لەی ڕووژەیل دویاییە، تا رەسیە دەیان مەکتەو ناوەندی لە جویراجویر ناوچەیل وڵات، لە ئەنجام بڕیار حکومەت وە ئاڵشتکردن بەشیگ لە مامووستایل.