ئیدارەی ترەمپ زانیاری لەبان ئامادەکارییەیل ئیسرائیل ئەرا پەلامارداین ئیران وەپی رەسێد
شەفەق نیوز/ راپۆرتەیل ئەمریکی، ئمڕوو پەنجشەممە، ئاشکرایکردن دۆناڵد ترەمپ سەرۆک کۆماری ئەمریکا و وەرپرسەیل باڵای کۆشک چەرمگ زانیاری وەپیان رەسییە کە ئیسرائیل "ها لە ئامادەکاری " ئەرا دەسوەپیکردن ئۆپراسیۆنەیل سەربازی دژ وە ئیران.
چەندین سەرچەوە وە "سی بی ئێس" نیوز ئەمریکی راگەیاندنە،وەرپرسەیل ئیسرائیلی و قسەکەرەیل کۆشک چەرمگ ئامادەنین هویچ لێدوانیگ لەبان ئەو زانیاریەیلە بیەن.
ڕاپۆرتەیل وەرین دیاریکردنە ئەرا خواست ئیسرائیل لەبان پەلامارداین ئیران، تەنانەت لەوەختیگ ئەمریکا داوا لەلیکردوی ئەو کارە نەکەێد تا دانوستانە ئەتۆمییەیل ناوەین واشنتۆن و تەهران وەردەوامە.
ساڵانیگە بنیامین ناتانیاهۆ، سەرۆک وەزیرەیل ئیسرائیل گومان قویڵیگ دیرێد لەبان هەر رێککەفتنیگ وەرد ئیران و نویسینگەگەی ئوشێد "ئۆپراسیۆنەیل ئاشکراو بیشمار" ئەنجامدریاس ئەرا سنووردارکردن ئەوزەڵکردن بەرنامە ئەتۆمیەگەی ئیران.
لە مانگ ئایار وەرین، سەرۆک ئەمریکا دۆناڵد ترەمپ راگەیان داوا لە نتنیاهۆ کردیە پەلامار ئیران نەدەێد تا دانوستانەیل ئیدارەگەی وەگەردیا وەردەوامە.
ترامپ وت: خەوەردار (نتنیاهۆ) ئێ کارە ئیرنگە گونجیاگ نییە، چوینکە فرە نزیکن لە چارەسەر.
