جاریگ ترەک.. تەقیان کانتەرەیلیگ لە بەندەر رەجائی لە ئیران

شەفەق نيوز/ بەندەر شەهید رەجائی لە ئیران، تەقیان شمارەیگ لە کانتەرەیل و دووارە هیزگردن ئاگر وەخوەی دی.

 دەسەڵاتەیل ئیران و تیمەیل فریاکەفتن و ئاگرکپەوکردن لە دویەکەو رەنج دەن ئەرا کپەوکردن ئاگرەیل فراوانیگ کە لە ئەنجام ئەو تەقیانە هیزگردن لەو بەندەرە لە ناوچەی بەندەر عەباس باشوور وڵات.

لە نووترین ئامار فەرمی، شمارەی کوشیاگەیل رەسیە 28 کەس وەگورزی نزیکەی 1139 زەخمدار.

فاتیمە مهاجرانی قسەکەر حکومەت ئیران راگەیان کە تەقەلایل کپەوکردن ئاگر بەندەرەگە وەشیوەی تەواویگ وەردەوامە، وتیش؛ رەوشەیل هانە ژیر کۆنتڕۆڵ، کە بەش گەورەیگ لە ئاگرەگە کپەو کریا، و تەقەلای کپەوکردن ئەو 20% وەردەوامە.

لە پۆستیگ لەبان پلاتفۆرم ئێکس، ئمڕوو یەکشەممەر مهاجرانی نویسان: لەباوەت دویاترین نووەوبویەیل و تەقەلایل کپەوکردن ئاگر بەندەرەگە وەشیوەی تەواویگ، قسە وەرد وەزیر ریوبانەیل، و سەرۆک کۆمەڵگەی مانگ سوور کردم، رەوشەگە هاژیر کۆنتڕوڵ، کە بەش گەورەیگ لە ئاگرەگە کپەو کریا، و تەقەلای کپەوکردن ئەو 20% وەردەوامە.

وتیش: 1139 کەس ئەرا بنکەیل تەندروسی کلکریان، و بەشیگیان ئەرا شیراز و لارستان وە ئاسمانەو، گشت وەڕیەوبەرایەتیەیل فریاکەفتن پیشکەش کەن وەگشت توانایگ.