بنگه‌يگ ئاسمانى رووسێ ئه‌را ماوه‌ێ نيم سه‌ده له سوريا مينێد
2017-07-27T20:12:00+00:00
شه‌فه‌ق نيوز/ به‌ڵگه‌يليگ فه‌رمى ئاشكراێ ئه‌وه كردنه ك فلاديمير بۆتين سه‌رۆك رووسێ ئمزا له‌بان ياسايگ ئه‌را په‌سه‌نكردن ريككه‌فتنيگ وه‌ل حكومه‌ت سوورێ كردگه ك مقه‌يه‌تى له بنگه ئاسمانيه‌گه بكا له سوريا ئه‌را ماوه‌ێ نزيكه‌ێ نيم سه‌ده.
ئه‌و به‌ڵگه باس له‌وه‌يش كردگه ئه‌و ريككه‌فتن ئه‌سليه ك له مانگ يناير له ديمه‌شق ئمزا كرياگه، مه‌رجه‌يليگ له‌تى دانرياگه ك روسيا بنگه‌ێ حميميم ئاسمانى له لازقيه بارێده كار ك ئه‌را په‌لاماره‌يل ئاسمانى ئه‌را بان هيزه‌يل ئۆپۆزسيۆن به‌شار ئه‌سه‌د سه‌رۆك سوورێ هاورده كار.
جى باسه، به‌ڵگه‌گه يه‌يش ده‌رخست ك هيزه‌يل رووسێ ئه‌را ماوه‌ێ 49 ساڵ له بنگه‌ێ ئاسمانى مينن وه‌ل قابل دريژه‌وكردن ئه‌و ماوه له حاڵه‌ت خواست ئه‌را ماوه‌ێ 25 ساڵ تر.
