پاپا: ئاشتی وەبی دانایین چەک نییە

شەفەق نيوز/ فرانسیس پاپای ڤاتیکان، ئمڕوو یەکشەممە، وەبوونەی جەژن ئیستەر، پەیامیگ پیشکەش کرد، لەناوی دووپات لە گرنگی دانایین چەک کرد ئەرا وەجیهاوردن ئاشتی، و دووپات کرد کە ئارەزوو لەخوەیوەرگریکردن نەبایەس بوودە پێشبڕکێی چەکداری.

 پاپای تەمەن 88 ساڵە خوەی لە مەوقەی خوەنستن پەیامەگە لە بالکۆن روی کاتتدراییل بوتڕوس پیرووز ئامادە بوی، و پیرووزبایی لە باوەڕدارەیل وە جەژن ئیستەر کرد.

لە پەیامەگەی پاپا هات: هویچ ئاشتییگ وەدەس نیەکەفێد وەبی وازهاوردن لە چەک، نەبایەس خوازین لەخوەیوەرگریکردن هویچ کەلیگ بوودە پێشبڕکێی چەکداری، لەناو ئەو جەنگەیل وەحشیانە کە کاریگەرب لەبان مەدەنیەیل دیرێد، و ویرانکردن مەکتەو و خەسەخانەیل وەگەردیا بوود، و پەلاماردان کارکەرەیل لە چین مرۆیی، بایەسە لە هویرەو نەوەیمن کە زەخمدارەگە دەژمن نییە، بەڵکم ئاینە و دڵ و رووح ز سەروەریی مرۆیی.

  پاپا بانگواز ئەرا ئاشتی کرد لەناو خاکە پیرووزەیل، کە ئمساڵ کاسۆلیک و ئەرسۆدیکس وەیەکەو جەژن کەن.

لە پەیامەگە وتیش: هاوخەمی خوەم وەرد ئەو مەسیحییەیلە نشان دەم کە لە فەلەستین و ئیسرائیل کەفنە ئازار، هەمیش وەرد گەل ئیسرائیل و فەلەستین وە گشتی.

پاپا بانگواز ئەرا خوەنستن نمازیگ ئەرا دانیشتگەیل مەسیحی لە لوبنان و سوریا کرد، و بانگواز ئەرا ئاشتی لە ئۆکرانیا کرد، وتیش: بایەسە گشت لایەنەیل تەقەلای وەدەسهاوردن ئاشتییگ هەمیشەیی بیەن.

پاپا ئومید ئاشتی و ئارامی لە ناوچەی قەوقاز خوازێد، و ئاشتەوبوین تەواو ناوەین ئەرمینیا و ئازەربایجان، هەمیش لە ناوچەی بەلقان، کە بایەسە سیاسەتمەداران ری وە ژاوەژاو و قەیرانەیل نەیەن، و باس رەوش سەخت وڵاتەیل ئەفریقا کرد.

یە یەکەمین جارە وەرجە ١١ ساڵ تا ئیسە گشت مەزهەوەیل مەسیحی وەگەرد ئەڕسۆدیکس و کاسۆلیک وەیەکەو جەژن ئیستەر بکەن، وە ئامادەبوین زیاتر لە ٣٥ هەزار باوەڕدار.