كيشمه‌كيش ناونى ماد و ليديا
شه‌فه‌ق نيوز/ كيشمه‌كيش ناونى ئمپراتۆريه‌ت ماد و ئمپراتۆريه‌ت ليديا ك له باكوور خوه‌رئاواى توركياى ئيسه ده‌سڵات داشت، له سه‌رده‌م پاشايه‌تى كه‌يخوسره‌و ده‌س وه‌پيكرد، ئه‌ويش دوياى ئه‌وه‌گ كه‌يخوسره‌و پاشاى ماد وه هاوپه‌يمانێتى بابل تويه‌نست ئمپراتۆريه‌ت ئاشوور له‌ناو بووه‌ێد.
له‌شوون ئه‌وه‌يش ده‌سكرده فراوانكردن مه‌رز ده‌سڵاتى و دى وه‌و جووريشه ده‌سڵاتى وه‌ره‌و باكوور خوه‌رئاواى توركياى ئيسه دريژه‌و بوى، دوياى ئه‌وه‌يش هيزه‌يل ئمپراتۆريه‌ت ماد په‌لامار ناوچه‌يل ژير ده‌سڵات ليديا دان.
وه‌و جووريشه جه‌نگ له‌ناونى ئمپراتۆريه‌ت ماد و ئمپراتۆريه‌ت ليديا به‌رپا بوى، ئمجا له‌شوون په‌نج ساڵ جه‌نگ هويچ لايه‌نيگ نه‌تويه‌نست سه‌ركه‌فتن خاسيگ وه‌ده‌س بارێد.
وه گووره‌ى سه‌رچه‌وه‌يل مێژوويى ئه‌وه ده‌ركه‌فت ك له دويا جه‌نگ ناونى ئه‌و هه‌ردوگ ئمپراتۆريه‌ت ماد و ليديا ديارده‌ى خوه‌رگرتن روێداگه‌و هه‌ردوگلايش ئى ديارده وه مه‌وجزه‌يگ خودايى زانستنه‌و هيزه‌يل هه‌ردوگلايش له جه‌نككردن خوه‌يان كيشانه‌وه‌و دوياخريش وه گووره‌ى ريككه‌فتنيگ ناونيان ده‌رياچه‌ى هاليس بويه مه‌رز ناونيان.
هه‌رچه‌نى جه‌نگ ناونيان كووتايى وه‌پى هات، وه‌لێ كيشمه‌كيش ناونيان هه‌ر وه‌رده‌وام بوى تا رميان ئمپراتۆريه‌ت ماد و دوياى ئه‌وه‌يش له سه‌رده‌م ئاستياگ يا ئه‌ژده‌هاك كوڕ كه‌يخوسره‌ويش ئه‌و كيشمه‌كيشه هه‌ر وه‌رده‌وام بوى.
ئمجا وه‌و بوونه‌يشه‌و ئمپراتۆريه‌ت ليديا روێ وه‌ره‌و كزىى كرد و ئمپرتۆريه‌ت ماديش تويه‌نست چه‌ن شار و ناوچه‌يگ له ئمپراتۆريه‌ت ليديا داگير بكا، وه‌لێ رميان ئمپراتۆريه‌ت ماد وه ده‌س هه‌خامه‌نشيه‌يله‌و كووتايى وه‌و كيشمه‌كيشه هاورد.
دوياى رميان ماد، ليديايش فريه كزه‌و بوى وه بوونه‌ى كيشمه‌كيشه‌گه‌ى وه‌بوونه‌ى ماد، ك وه‌و خاتريشه هه‌خامه‌نشيه‌يل په‌لامار ئمپراتۆريه‌ت ليديا دان و ئه‌و ئمپراتۆريه‌تيشه رمانن و دى كيشمه‌كيشه‌گه‌يش كووتايى وه‌پى هات.
ویکیپیدیا
