جه‌نگ جه‌هانى دويه‌م و كيشه‌ى كورد
ئينۆنۆ هه‌وڵ ئه‌وه دا بارودووخ كوردستان توركيا ئارامه‌و بكا، ئه‌را ئى كاريشه قه‌وڵ خاسسازى دا و گفتگوو وه‌ل سه‌ران كورد ئه‌نجامدا له‌وه‌ر خاتر وساننه‌وه‌ى جمشه‌ته‌يل و شووڕشه‌يل له ناوچه‌يل كوردنشين و هه‌ر له‌وه‌ر ئه‌وه‌يش سه‌ردانيان كرد، وه‌لێ به‌رپابوين جه‌نگ دويه‌م جه‌هانى له‌ساڵ 1039 و هه‌وڵ وسيان بيلايه‌ن توركيا له‌و جه‌نگه په‌رده‌يگ سيه‌و تيه‌ريك هاورده بان كيشه‌ى كورد تا بيس ساڵ تر و ناوچه‌يل كوردنشين توركيا قوناغ تيه‌ريكيگ وه‌سه‌ر بردن له ژيان، جوور ئه‌وه‌گ بويشێد قه‌رامووش هه‌تا هه‌تايى باڵ كيشا بانيان، وه‌ل ئه‌وه‌يشا له كوردستان عراق و ئيرانيش جمشت ملله‌ت كورد خه‌بات كرديان ئه‌را ريكخستن ڕزه‌يل كورد له چوارچيوه‌ى چه‌ن ريكخرياگيگ سياسى كاريگه‌ر له‌وه‌ر داخوازى ماف نه‌ته‌وايه‌تى كورد له‌بان هه‌ردوگ ئاست ناوخوه‌يى و ناونه‌ته‌وه‌يى.
ئمجا هه‌رچه‌نى په‌يمان سعه‌د ئاباد ناونى ئيران و ئه‌فغانستان و توركيا و عراق ك له‌ساڵ 1937 ساز كرياو وه پله يه‌ك له دژ جموجويل كورد و دوياخريش له‌وه‌ر مقه‌يه‌تيكردن له به‌رژه‌وه‌نديه‌يل بريتانيا له ناوچه‌گه ئمزا كريا، وه‌لێ جمشته‌يل رزگاريخواز جه‌هان له ده‌ورگردجه‌نگ جه‌هانى دويه‌م خه‌بات كرديان له‌وه‌ر دامه‌زرانن ئه‌و به‌ره‌يل نيشتمانيه ك هه‌وڵ ديان ك په‌رله‌مان و ئه‌نجومه‌نه‌يل نيشتمانى بوونه ده‌سه‌يگ ديموكراسى و ئيراده‌و خواست ملله‌ت له‌تيان ره‌نگه‌و بيه‌ێد له‌وه‌ر ئه‌نجامداين ئه‌و خاسسازيه‌يل بنه‌ڕه‌تيه ك وڵات تواسياده‌ى له‌ڕى هاوكارى و يه‌كگرتن ناونى گشت حزب و لايه‌نه‌يل پيشكه‌فتنخواز نيشتمانى و نه‌ته‌وه‌يى و هه‌ر وه‌و خاتريشه بڕيگ له ناوداره‌يل كورد تويه‌نستن كۆمه‌ڵه‌ى برايه‌تى وه سه‌رۆكايه‌تى شێخ له‌تيف حه‌فيد له‌ساڵ 1938 دامه‌زرنن.
ئى كۆمه‌ڵه يه‌كه‌مين ريكخرياگ سياسى كورد بوى له عراق ك وه‌ئاشكرا بانگه‌واز ئه‌را ئازادى كوردستان كردياد، يه‌يش له‌وه‌ختيگ كۆمه‌ڵه‌يگ تر له كه‌ركووك وه‌ناو كۆمه‌ڵه‌ى داركه‌ر له‌ساڵ 1937 دامه‌زريا، ك ئه‌وه‌نه وه‌پى نه‌چى ناوه‌گه‌ى ئاڵشت كرياو بويه حزب هيوا و چالاكيه‌يلى ته‌نيا له‌ناونى سه‌رۆكه‌يل هووز و ئاغاو به‌گ و شێخه‌يل بوى و وه‌گووره‌ى قسه‌يل ره‌فيق حلمى پشت وه ئنگليز به‌ساوێد ئه‌را وه‌ديهاوردن مافه‌يل نه‌ته‌وه‌يى كورد و دامه‌زرانن ده‌وڵه‌ت كوردى، وه‌لێ ئه‌و ديد و باوه‌ڕه له‌شوون كۆنگره‌ى حزب ساڵ 1945 ئاڵشت بوى و يه‌سه تا رووژ ئمڕوو ملله‌ت كورد هه‌ر وه ته‌مای سه‌روه‌خوه‌يی و دامه‌زرانن ده‌وڵه‌ت و ريكخستن ماڵ خوه‌يه‌و ئه‌را ئی مه‌راميشه هيمان چه‌وه‌ڕی كريه‌ێد.
ئيبراهيم داقووقى
