ژیاننامەی پسپۆڕ ئاسەواری شاه محمد عەلی سیوانی فەیلی

شەفەق نیوز/ شاه محمد عەلی سیوانی زانای ئاسەواریە، کورد فەیلیە.، لەداڵگبوی ساڵ 1934 لە بەغداد، لە بنەماڵەی کورد فەیلی ناودیار کە براگەی پارێزەر حسێن سیوانی وەڕیەوبەر مەکتەو فەیلیە، و عامر سامر پەرلەمانتار ئیسە خوارزایە. 

 شاه محمد لە ساڵ 1958 لە بەش ئاسەواری/ کۆلێژ ئاداب/ زانگوی بەغداد تەواو کرد، و لە خود ساڵ بە فەرماندەی ئاسەواری دەسەوکارەو بوی، و لە پلەی فەرمانبەری بەرزەو بوی، تا ناوی وە پسپۆر ئاسەواری لەلای نەتەوە یەکگرتگەیل توومار کریا، و کار لە زانکۆی ئەبو نەبی لە دەوڵەت ئیمارات کرد، و هەمیش لە زانکۆیل سعودیە، و وەگەرد زانایل پایەبەرز جویر (تەها باقر و ئەحمەد شووشە) هەڵسوبنیش کرد، و تا ئاست خاسیگ لە زوان میخی سۆمەری و لە زوانەیل کویەن عراق رەسیەو، و بڕیگ کار وەشکین و هەڵکەنین لە شوینەیل ئاسەواری لە سۆمەر و ئەکەد و ئوور و لەگەش و ئاشوور وبابل و وەرکا و حەزەر کرد، وەشیوەیگ زانستی تیژیگ، و کتاویگ وەزوان عەرەوی وەناونیشان (أور بين الماضي والحاضر) «ئوور ناوەین گوزەشتە و ئیسە» نویسان کە لە ساڵ 1976 لەلایەن وەڕیەوبەرایەتی گشتی ئاسەواری چاپ کریا، کە بویە کتاو خوەنەواری لە ئاست زانست و پەروەردە، کە ژیان کۆمەڵایەتی و سیاسی و ئابووری و کەلتووری و ژیانگوزەرانی لە سەردەمەیل کویەن عراق ئاشکرا کەێد، 

 وەگەرد ئەوە، هەڵوێست ئاشکرا دژوە حزب بەعس داشت،  و لە ساڵ 8 شوبات  1963 لەلایەن (حەرەس قەومی) دەسگیر کریا و کەفتە وەر شکەنجەی وەحشیانە و کیشانن نویخانەیلی، و دویای مەرەقەزکردنی رژیم بەعس واز لەلی ناورد، کە لەناو ئەو فەرمانگە کە کار لەلی کەێد (ئاسەواری بابل) لە شار حلە، لە ساڵ 1980 وە توومەت (تەبەعیە) وەگورەی بڕیار بەدناو شمارە (666) دەرکریا، و ڕەگەزنامەی عراقی لەلی سەنیا، و دەسنریا وەبان ماڵ و دارایی هەکاتی هەزاران کورد فەیلی، کە وەشەو و رووژیگ گشت کار و رەنج و نویسانی لەدەسدا، تا بکەفێدە ئۆردگا لە ئیران.

شاه محمد لە ساڵ 2000 لە ئەنجام بیماری و نەداری و خەفەت و خوسەی ستەم گیانی لەدەسدا، و جویر کەسیگ بیگانە مرد، کەسیگیش لە شوین تەرمەگەی نەوی.