گووش بیە وەمە
وە یەواش یەواش بەو ئەڕا کیەنی
گووش بێیە وەمە دووس سەروەنی
چیدە شامامەی چشت ئەڕام سەنی
خاس بشارەوێ وە لوو گوڵوەنی
چیدە شاەئەحمەد بگری موراد
مە لە هۊرد بوو وە دزی براد
منیش هە لێرەو دووا کەم ئەڕاد
سانەیل کۊە زام بێیەن وە پاد
لەورەو هاتیدەو بەو ئەڕا کیەنی
جامێ ئاو بەپێم مردم لە تیەنی
وە زوڵفێ زەڕین وە فرم تازە
وە کوو هاوردی ئی همگە نازە
وە زوڵفێ زەڕین ناز کوومەکوومە
بەو دەرمان بکە ئی ژارو ژوومە
یەی خەرمان ژیاو یەی خەرمان شەنە
وساسە ئێرە هەزار جوور بەنە
وە لاما ڕەد نەو وە زەردە خەنە
ئە مەردم بۊنن ئەڕامان گەنە
ڕێ چەفتا مەکە بەو ئەڕا کیەنی
جامێ ئاو بێیە پێم مردم وە تیەنی
وە زوڵفێ زەڕین وە کەل دەرە
ئی بان زوڵفیەگەد پڕ قەێ زەڕە
دونیا زانێدن مێنید وە پەری
هوور بەهشتی بان زوڵفی زەڕی
بەو بنیش
هاوار مەردم
هاوار مەردم ،هاوار مەردم
لە ناو کۊچەیل کرماشان وە مێنەی هاو زوان گەردم
وە مێنەی سەروەن و شاڵ و دەنگ ساز خوەمان گەردم
وە مێنەی دیوڵ و دەسماڵ بەزم شان وەشان گەردم
مە مێنەی سۊرو هەڵپەڕکێ وە سایەی تاقوەسان گەردم
هاوار مەردم ،هاوار مەردم
لە تێژی تێخ بێ کوڵی ک تا قۊلی سقانم چوو
بنووڕن لەی تیەریکانە چە خۊنێ لە داوانم چوو
وە مێنەی مەڵهەم کوردی وە دەم یەی هاوزوان گەردم
وەمێنەی یەی مەڵهەم کوردی ئەڕای یەی کومە ژان گەردم
های کراس و شاڵمان هاکو دەنگ موورو دەنگ ڕا ڕا
پووقەی شمشاڵمان هاکو
مە مێنەی لانەما گەردم
مە چۊ یەی باخ بێ خاوەن ک وارانێ لە لێ گردۊن
گوڵ و پەروانەگەی مردۊ
مە مێنەی باخەوان گەردم
بیلن ئی شار شیرینە ڕەنگ جاران خوەی بگرێ
بیلن ئی خاک پڕ خەیرە گەنم وە دان خوەی بگرێ
بیلن داوان کرماشان لە وینەی نەخش مادی بوو
مە ماچ هەر دەسێکم کرد زوانێ هاو زوانی بوو
هاوار مەردم هاوار مەردم، هاوار مەردم
شێعر ئەلی ڕزا جەلیلیان
