من و گۊج ش

شەفەق خوەر دا پەلامار کۊە دام

مەگەر لەوره بکەم یەی گڕ زنەی تام

لە وەر دامین کۊ دیم دار تەنیاێ

وەرەو لاێ چێم ک ساتێ تەک بەمە ساێ

پەلێ شکایو شوون سان لە پەل داشت

لە قەێ ساق سیەێ یەێ هەمگە کەل داشت

وەتم: دەردت چوەسە ناود کیە دار

وە پیم وەت: گۊجمو تەنیامو بێ یار

لە دارستان دەرم کردن رێم نیەن

بەڕۊ هاتو وە پرتنگ دڵ خوەشیم سەن

وە پیم وەتیان گڵات زوورەو قەێد خار

پەلت چەفتو دڵد لانەی مەلو مار

وە ئێرە هاتمو کەس نەۊنمه چەو

وە بێ تانەێ بەڕۊ یەێ گر بکەم خەو

مناڵەیل هاتنو شاخم شکانن

ئڕا گۊجی نز گیانم تەکانن

وەتم: ئەێ گۊج منیش هاو راز دەردم

منیش جۊ ت دڵم گریاس لە مەردم

لە ناو شارم هە تەنیا بۊمو بێ کەس

هزاران تانە خسنەو پیم لە ئەنقەس

وەتن شێتم مناڵەیل سانە لیم دان

وە سەد منەت چەپاڵێ نانه پیم دان

کەسێ نەتواسەمو بان گردمەو وەر

لە شار دەرچێمو رۊ گردم وەرەو ژۊەر

وەسە چەرخ فەڵەک هاوردەمە لاد

ت بۊدە یارمو ماڵم بووە ساد

پژواک_روشن_روان