مانشت
رووژەی لە رووژەیل رێم کەفتە مانشت
زقـــم گــــــیانێ هانای دڵــــم کـــۆشت
وەتم هەی مانشت چەنەێ پیر بۊدە
چما ساز خەم هە روو‌ژ ژەنیدە
وەت هەی دووس مەپرس لە حاڵ تەمم
لە حاڵ دڵەی دایــــــــم لە خـــەمـــــم
کەفەن پووشامە لە وەفر تیــــــەتان
شەرتوو چۆار فەسلم دایـــم زمستان
وەتم هەی مانشت ئەو یارە کـیە
ئڕا کـــــــــوو چگە دڵ لید بڕیــە
قسیەم تەمام نەۊ دیم بۊە واڕان
دەس نانەو گری ئەوریل جـــاڕان
هە وە یە هاوردم پەرت بۊمە ئشکەفت
گیانم شەکەت بۊ ئاز قۆلــــم کــەفـــت
دیم دەنگ موورەێ تیەدن وە گووشم
شــــــەرتوو لە داخـــد سیە بپــووشم
وەتم هەی ئشکەفت پناگای مانشت
خەریوی چڕد یە چۊ دڵـــــم کوشت
وەتــــــە دڵ ت ئینگە مرێـــــدن !
دڵ م یەی سەر هە موور چرێدن
واڕان وساوەو دی هاتمەو دەر
نورسمە بان داڕەیل بەێ بەڕ
وەتم چوەدانە چمان هاینە خەو
چمان لە مانشت وەهاڕ نینە چەو
وە زەردە خەنە دڵـــــــــم داڕزان
سەرتاپای گیانم وە خوسە سزان
چیم وڕەو ئەولا لە بان سانەی
دەسە زڕانی نیشتم لە بانەی
کرج ئڵاتۊموو پەشیویو هاڵـــــم
وە چوە فکر کەمو چوە ها خیاڵم
دیم گوڵە زەردەێ زڵفەیل مانشــــت
دەس نا لە دەسم چۊ بڕای هاوپشت
وەت هەێ دووس نەرەنج لە قسەی مانشت
ڕووژگار گەن کۆڕ خاسەی کوەشت
لە وەختەیچگە وەهار گۆڵ نیەخەی
ئشکەفت داخەگەێ لە هۊرەو نیەوەی
دارە قـــــدیمــــەی دەر ماڵیــــان
تێشگ خوسە گیانەگەێ هەنجان
هە ئەی کۆچگە نیشتیەسە بانەی
چوە ها لە دڵەێ خۆدا خوەێ زانەی
تا ناوەی باریم ئەورەگان مڕن
لە تاوســــانی واڕان داگــــڕن
تا خوەر پا بنـــــــەێ لە رۊ مانشتا
وەر کەێگە نسار زڵف خەیگە پشتا
وەهار لە شاکە شەرم کەی گۆڵ گرێ
وەختـــــەێ ئڕا خان خەریوی چـــرێ
(وەهــــار داواند لە گۆڵ خالی بـــوو
مەرگ خان_مەسۊر چۊ لە هۊرد چوو)
دی کی بای بۊشەی شاکە رازان دیم
لە مانشتـــــەوە سراو بازان دیـــــم
تا ناو خان هات دڵ لیم جیا بۊ
زوان لەتر دا ئڕمــــس پیـــــا بۊ
وەتــــم هەی گۆل ئەزیز مانشــــــــت
لەێ هەمە خەمە یە چۊ کەیدن رشت
خەم خان مەسۊر وڵات گڕتە وەر
چۊ خاس مەنیدەو گرتیدنە بەڕ
ئاهەێ کیشاو وەت ئاخر فڵانی
ریشخەنە پیم کەێ ت خوو نیەزانی
تەمام مانشت لە داروو لە سان
هە لە سەرتەزن تاگەر ئەڤداڵان
گشتەێ نا ئۆمید لە هاتن خان
چگنەسە ژەێر چادر زمسان
ئەمای م هاودەم خوەشی خانۊم
تنیـــــا ئۆمیدەێ لە نیشتمــــانۊم
شایەد یەێ ڕووژەی خان دووارە بای
چــــۊ فەرش قڕمز بکەفـــــم لە پای
شـــــەرتوو تا بایــــدن وەپاوا بووســـــم
لە خەمەێ هەرگز هشک نەوم نەپووسم
ریشخەنە نەکەی نەۊشی بێ ئارم
چەنی چەن وەختە پەشیوە کارم
وە زام دڵەو هاتم ورەو خوار
لە ژێر لچەو گۆڵ نەخەی وەهار
نووشیــــن حاتەمــی
