شعرەیلیگ ئەرا شاعر یابانی تاکیناکا ئیکۆ
ئەور وە یواشیگ سای خوەی وەشنێد
وەبان جادەیل پڕ درەخت
وەبان گوڵەم و بووسانەیل
خوەشی و تەنگی وەیەکەو
وەگەرد خوەی هاوردیە
ئەورەگە، وەبیدەنگ چوودە ری
ئیجا، وەبان دەنگ نای
ئەورەگە تکەپا دەێد
مینەی بژەن نای کەێد
وەلێ کەسیگ نییە
ئەو مەوقە جاریگتر ئەورەگە بان گردەوەر
وەرەو ئەودیم گومەزی شەو
نیەزانێ وەرەو کوو.
…..
سەنگ هویرەوکەر
یەی سەنگیگ سێسویکە
لەناو تاریکییش چەرمگە
لە ناوڕاس ئەو تاریکیە پاڵەو داگە
مینێدە (رودان) نویسەر
گرانێتەگەی، هەر جویر ئەوە
وە ریشی و وە مچ دەسی
ئی سەنگ، توو هویرەو کەێ
وەو رووژە، و وەو پیاوە ک رووژیگ لە رووژان لەباند نیشت
وەو رووژە، و وەو زاڕووە ک پای لەلید هەڵکەفت
وەو رووژە، و وەو پیاوە کوورە، ک وەگووچانەگەی دادە لێد
ئەو پیاوە ک لەباند نیشت بیزار بوێد لەی ژیانە
ئەو زاڕووە ک پای لەلید هەڵکەفت لە وەرسگی هاوار کرد
گووچان ئەو کوورە پارچە پارچە بوی
چوکڵیگ ئاگر دەم و نزیک رووشنایی لەلید کەم
و نووڕمە کوارتز، و سیلیکا، و میگا
پڕشنگ دەێ، چماێ خوازێ قسەیگ بکەێ
….
ئەسارە
لە ئاسمان یابان
ئەسارەیلیگ بوو نەفت لەلیان تیەێد
ئەسارەیلیگ وە زوانیگ بیگانە فچەفچ کەن
ئەسارەیلیگ تەقەیان تیەێد هەکاتی ماشینەیل فۆڕد کوینە
ئەسارەیلیگ وەرەنگ کۆکاکۆلا
ئەسارەیل بەدیگ جویر بەدی تام خوەراک ناو قوتی
ئەسارەیلیگ وە پەمگ و خوری و مەقاش پاکەو کریانە
و وە فۆرمول تەمیس کریانە
ئەسارەیلیگ پڕ لە وزەی پڕشنگدار.
