سێ پارچە
پــەژارە
هۊرد سەر کیشا دڵ° چووڵمەو
خــــەم° زەمانە دا وە کووڵمەو
یەکێ خوو نیە، خەم وە خەرواره
شەکەتی لە بان° شــــانم سووارە
پایلم بێ هازوو چەو تەمەلۊلە
دەرد° دڵ° مـ° چۊ چاڵاو قۊله
وە سر° خەمەو، پڕ لە دۊریـــــە
شەوەیل تەنیاسوو کارێ گیریە
نیەزانم یە چوەس ئڕا کی بۊشم
پەژارەێ نـاکەس بـــۊە وە تۊشم
غفار مرادپور
لە دەروەنەیل° قۊل° "یووش"
له سپێدار° تازە جووش
دەنڰ° "نیما" تێدن وە گـــــووش...
ئاێ... ئاێەمەیل! ک° وە ئەنقەز؟!
نیەچین له شوون° دەنڰ° کەس
بچن چۊ کرم هەر ژاو بخۆەن
پێسیو چرکناو بخۆەن
وەنێ ک° ڕۊ له وا دێرێ
چەنێ شێوەێ نیما دێرێ
یا چەوەیل° بــــۊ هەێرانێ
ک° چرچ° شەو ها له گیانێ
یاگەر قیڕەێ وشک° قڵا
له دارسان° بێ گڵا
بەڕۊ ڕاز° پڕ ماناسه
مینیاتور° مەولاناسه
شێوەێ باپیرە گەۆرا دەێ
بوو ئەوین° ئەهوورا دەێ
باێەد هەڵسم بوو نەکەم
تا وەێ نمرچە خوو نەکەم
ژیــــــانم بوو نمرچێ تێ
بوو خنگ، لە بن° پرچێ تێ
ئــــــــــــــــــــازادی چۊ ئاواتێگه
فکرو خێاڵ° ساتێگه
مـ° له شوون° ڕەنڰو بوو چم
خۆەم نیزانم ورەو کوو چم...
یەک!!!
بان°
ماڵەگان°
ئـــای...
ڕز ڕزەگـــــان° شان° یەک!!!
زندانەگان° گیان° یەک!
بوودە سان، سیماندان!
خاک کەفێەو باندان....!
سعید عبادتیان
له ناوِ° پاێــــــز وه‌رز° هزار ره‌نڰـــ
وا بوود وه کووڵ کیش° وه‌ڵنڰه‌یل° دڵته‌نڰـ
ئیمه‌ێش وه‌ڵنـــــــــڰه‌یل° دار° زه‌مانیم
چه‌پ واێگ به‌ێده‌مان روژێگ وه بێ‌ده‌نڰـ
پاێــــز ها له شـوون° هه‌ر وڵنگو چۊزه
که‌فتنێگ خاسه ک° نێاشتود نه‌نڰـــ
هه‌ناێ ک° که‌فـــتید چیــــده تا بچیـــد
چ° ئــاو چ° ئـاگر چ° له شان° سه‌نڰـــ
دڵــــبه‌سان نه‌ێرێ شمــــاڵو شه‌ونم
زۊ له هـــۊره‌و چن روژه‌یل° قه‌شه‌نڰــ
حمزه کرمی
