دوو پارچە شیعر لە ئەلی میرسەفەری
دووارە دڵ بیقەرارە هۊر تو کەێ
لە خاو و خەیاڵم مێنەێ تو کەێ
ئمشەو چەن شەوە خەو لێم حەرامە
تاکەێ بکیشم ئی دەردو زامە
خوەزەو جارتر بای لەی هەنازە
تا دیدارەی لە نوو بکەیمن تازە
هەر شەو چەوە ڕێ دل بێقەرارە
وە گیاند قەسەم چەو ئەنتزارە
خوەزەو بزانی پەی تو چوە کیشم
لە گیان بیزارو وێنەی دەوریشم
خوەزو یە شەوی بایدە خەوەیلم
تا لە دڵم دەرچۊ هەزرەتەیلم
ئەلی میرسەفەری
زمسان چێ وەسەر فەسڵ وەهارهات
وەخت فەراق چێ وەخت دیدارهات
دایــە لە بار سەرمای سەخت زمسان
هەوای خوەش ئەور قەترە وار هات
یــــــــەخ کۊەگان یەک یەک بۊنە ئاو
خوڕە خوڕەی ئاو دەنگ ئاو شار هات
لە گـــــەرەی کەو دەنگ کۊە هاتە بان
گەرە گــــەرەی کەو لە سەرنسار هات
لە شەووق دیـــدار گـــوڵ وگوڵزاران
بــوڵبوڵ وە هەوەس وە لالەزار هات
دونیا ڕەنگاڕەنگ کۊە ودەیشت ودەر
لە یــــــــەد قودرەت پەروردگار هات
سەفەری خـــوەشاڵ لە فەسڵ وەهار
وەمەشامێ بوو ئەترگوڵ وەهار هات
ئەلی میرسەفەری
