داڵــــــــگە
داڵگ عەزیزم نێور چەوەگەم
هەرەنگ دڵ وڕوشناێ شەوەگەم
وەختاێ مناڵ بێوم هالە وەر چەوم
خوەد خەوزڕ کردید را خاتر خـەوم
قەد لە هێور نیەچو لاوە لاوەگـــەد
لاوە لاوەگەێ پاێ گــــــاپارەگــــــەد
شەوەکی هەڵساید هە وەل شاق شەو
بێ بەش خوەد کردید لە شرینی خـەو
پەسەیل دوشاید وریەن دەرکـــــردی
مانگـــاگان ئاو دای ڕا گاوان بــــــردی
وەمانگا دوشان وەمەشکە ژەنیــــــــن
قسەێ خوەش کردید دەمد وە خەنین
خو ئاو لە ئەڵوەن وەبان سەر کیشاید
نان گەرم تەنێور ڕا باوگم کردیــــاید
وەپەچیە ماڵین وهێوردەکار تریش
خوەد شەکەت وەکەت شیر دایدە منیش
داڵگە یە چەنێ دڵد نەرم بێــــــو
لە ناو ژنەگان ت خێوند گەرم بێــــو
وەڕوژ گشتێ کار وە شەویش مەیوان
ئەلگ ونێورگە وخەسرەو و غەزبـــــــان
دایەم هە فکرد لە لاێ نەدار بێــــــۆ
دەسد تا نیمە لە دەم هـــە ژار بێـــــۆ
داڵگە چ خوەش بێــــۆ خەو باوش نەرمد
دەنگ ترپەێ دڵ و هەناس گـــــەرمـــــــد
توزێ نەخوەش بێـــۆم چەکردێ ئەرام
خەو لە خوەد بڕید نیشتێ لە لاێ پـام
دەس داید لە پایلم بزان تەو دێــــــــرم
لەێ کوڕە زیاتر خودا کەس نەێـــرم
داڵگە وەقوربان خرپە خرپ دڵــــــــد
وە قوربان دەم چەو ئیسەێ وەک گوڵد
داڵگە لـــە جوانید لە دنیا نیـــــــــــە
وەدەس نەکریاس هن خوداییـــــــــــــە
جوانی ت داڵگە جوانی خوداســــــــــە
جوانەیل ئیسە وەدەس کــــریــــاســـە
داڵگە پیرەگەێ سەت ساڵ عەمـــرەگەم
ڕێ ڕوشن کەرە و ستێـــون کەپرەگــەم
داڵگە چــــەوەیلم وە قوربان چــــــەود
سەرم وەقوربــــان کەم خەوی شـــەود
داڵـــــــگە لە عەمرم ئەرا عەمرد بــــــاێ
وەرج لە مــــــردند م گـــــیانم دراێ
داود ئەرکەوازی
