مەردم هاوخەمی وەرد مەریەم رکابی کەێد ک دەمچەو رەنگینی خراو کردن  

شەفەق نیوز/ سایت "ميدل ئێيست ئای" بەریتانی، دووارە باوەت دۊیەتە عراقیەگە مەریەم رکابی هاوردە بان، ک لەوەر ناڕەزایی لە شۊکردن، لەشی خراو کردن، و باس ئەو وێنەی دڵتەزنە کرد ک هاوخەمی فراوانیگ لەلایەن هەزاران کەس لە جەهان، لەبان شۆسیال میدیا وەگەردی دروسکرد، و داواکاری وە سزادان تاوانکارەگە.       

ڕاپۆرتە بەریتانیەگە ک ئاژانس شەفەق نیوز وەرگێرانی کرد باس ئەوە کرد ک رکابی خانمە خوەنەواریگە لە بەغداد،  زیان لە شیوانن دەمچەو و لەشی وەخوی دی لەوەر پەلاماریگ وە مادەی ئەسید لە حوزەیران گوزەشتە،  ک ئی پەلامارە لەوەر ئەوە بۊیە ک ئی دۊیەتە رازی وەشۊیکردن وەیەکیگ نەۊیە،  ک لە مەوقەیگ باوگ و داڵگی لەماڵ نەۊینە، هاتیەسە ناو ماڵیان ولە وەخت خەفتن دۊیەتەگە، ئەو مادەی ئەسیدە رشانیەسە بانی، و مۆبایلەگەییش دزیە.          

رووژ پەنجشەممەی گوزەشتە،  ئەنجومەن دادوەری باڵا راگەیان لێکۆڵینەوەی رووداوەگە هیمان وەردەوامە، و باوگ دۊیەتەگە لاڵکیا وە دادوەری عراقی تا وەشیوەی راسییگ رەفتار وەرد باوەتەگە بکەێد، و سزای تاوانکارەگە بیەێد، و ئەرا میدیایل راگەیانن ناوخۆیی باس رەوش دۊیەتەگەی کرد دۊای ئەو پەلامارە لەبانی.                

راپۆرتەگە وتیش: هەزاران کەس ئاشکرای هاوخەمییان وەرد رکابی کردن وەژیر هاشتاگ "انقذوا الاميرة مريم" "شازادە مەریەم رزگار بکەن"، وتیش: پەلامارەگە باسەیل فرەیگ لەباوەت ناچارکردن ژنەیل و بەدرەفتاری وەگەردیان لە عراق پەیا کرد، و فرە کەس شۆسیال میدیا لەی باوەتە وەکارهاوردن تا رووشانیی بخەنە بان تۊنوتیژی لەبان ژنەیل.       

راپۆرتەگە وتیش: رووژ پەنجشەممەی گوزەشتە، دەسکریا هەڵمەت گردەوکردن دەسمیەتی لەبان ئەنتەرنێت لەبان پلاتفۆرم GoFundMe ، جۊر تەقەلایگ ئەرا گردەوکردن پۊلیگ تا رکابی وەپی بچوودە دەیشت وڵاتەگە و چارەسەر خوەی بکەێد، و ماڵپەڕەگە زیاتر لە ٢٤ هەزار دۆلار گردەو کرد.    

ئەو هەڵمەتە ک خانمە تۊێژینەوەکار عراقی رەشا عەقیدی رێکی خست ک لە واشنتۆن جیگرە، راگەیان؛ ئەو پۊلە ئەرا چارەسەری کوتپڕ ئەرا رکابی تەرخان کریەێد وهەمیش ئەرا چارەسەری دەرۊنی و پاڵپشتیکردن خیزانەگەی.    

هەڵمەتەگە ئۊشێد: ژیان ئی دۊیەتە وەیەک چرکە لەوەر چەوی ویران بۊی، ک خوەی چشت گەنیگ نەکردگە، و خوەنەوار پەیمانگای هونەرە جوانەیلە بۊیە، و خوەشی لە ژیان ورەنگ هاتگە، با هەرچەگ وەپیمان کریەێد ئەرا دەسمیەتیی بکەیمن.             

راپۆرتەگە لە زوان ریخریاگ یاسایی "هيومن رايتس ووچ".وت: تۊنوتیژی خیزانی لە عراق لەماوەی ساڵ ٢٠٢٠ وە بڵاوی مەن، جۊر کوشتن ژن و دۊتەیلە لەلایەن خیزان و شۊیەیلیان، وتیش  لە وەختیگ یاسای تاوان عراق پەلامار لەش وە تاوان زانێد، باوجی بەشیگ لە مادەیلی ری یاسایی دەێدە شۊیەگە ئەرا سزادان ژنەگەی، لەناو ئەو سنوورە ک یاسا و رسوومەیلە باسی کەن.