عراقيه‌يليگ گيرهاتگ له ناونى ئاگر پێشمه‌رگه‌و ريكخرياگ داعش
ئه‌و مه‌ردمه له باكوور عراقيش ئه‌را ماوه‌ى فيشتر له سێ مانگه له‌ناونى دو جه‌هان ژيه‌ن، جه‌هانيگ ئه‌خوازن له‌لى كووچ بكه‌ن و دويه‌ميش ڕى وه‌پيان نايه‌ێد بچنه ناويه‌و.
عه‌ره‌ب سنييش خوه‌يان له‌ناو ئه‌و درده‌سه‌رى و مه‌ينه‌تى فراوانه‌و دينه‌و ك ئه‌ويش كيشمه‌كيشيگه‌و مليۆنه‌ها كه‌س له هه‌ر يه‌ك له عراق و سوريا دويره‌و خست.
ئه‌و مه‌ردم عه‌ره‌ب سنييشه ك گير كردنه له‌ناونى دو به‌ره له ناوچه‌ى شه‌نگاڵ خوازيارن دويره‌و بكه‌فن له ده‌وڵه‌ت خلافه‌ت ك ريكخرياگ داعش ئاشكراى كرد، وه‌لێ كورد ڕى نايه‌ن وه‌پيان ده‌ربچن دوياى ئه‌وه‌گ ناوچه‌يليان ئه‌مانه‌و كريا له باكوور و مه‌ترسى واين دوشمنه‌يليان ئه‌كه‌ن له‌ڕى ڕزه‌يليان.
ناوچه‌يل كورديش پيشوازى له نزيكه‌ى نيمه‌ى 3.3 مليۆن عراقى كرد ك كووچ كردنه له شوونه‌يل خوه‌يان له‌ى دو ساڵ دوياخره، ك يه‌يش بار سه‌ختيگ دروسكرد له‌بان داهاتى و چه‌وه‌ڕى ئه‌وه‌يش ئه‌كريه‌ێد ئه‌و شماره‌يشه فيشتره‌و بدێ له‌وه‌ختيگ ك هيزه‌يل كورد په‌لامار ريكخرياگ داعش ئه‌يه‌ن له باقى بنگه‌يليان.
دى وه‌و جووره ئى به‌شه له عراقيه‌يل گير كردنه له‌وه‌ختيگ ك مه‌ردمه‌گه‌يان واين له ئاوايى جولات هه‌ناى ك هيزه‌يل كورد ده‌سكرده په‌لامارداين و راوناين ترۆريسته‌يل ريكخرياگ داعش و له ناوچه‌ى شه‌نگاڵ تارانه‌يان له نۆڤه‌مبه‌ر/ ته‌شرين دويه‌م گوزه‌يشت.
كووچبه‌ره‌يل ئويشن: ته‌نانه‌ت هه‌رچه‌نيگيش بتويه‌نن گله‌و بخوه‌ن ئه‌را شوون و ماواى خوه‌يان، وه‌لێ وه‌ل ئه‌وه‌يشا هه‌ر مه‌ترسى ئه‌وه ديرن بانه تويش ده‌سدريژى بڕيگ له‌و ئێزيديه‌يل ناوچه‌ييه ك تومه‌تباريان وه ئه‌وه ئه‌كه‌ن ڕى وه ئه‌وه دانه چه‌كداره‌يل داعش ده‌سدريژى و فزيحه‌ت ده‌رهه‌ق تايفه‌گه‌يان ئه‌نجام بيه‌ێد.
ئى مه‌ردمه وه نزيكه‌ى دويرى 500 مه‌تر له بنگه‌يل كورده‌يله‌و جيگير بوينه‌و كه‌مپ ئه‌رايان دروس كرياو خه‌نده‌ق وه‌ختى ئه‌رايان كرياگه تا له‌وه‌خت ته‌قه‌كردن له‌لايه‌ن ريكخرياگ داعشه‌و مقه‌يه‌تى له‌ليان بكا وه‌تايبه‌ت له قازيفه‌ى مۆرته‌ر له‌وه‌ختيگ وه‌شننه‌ى ئه‌را سه‌نگه‌ره‌يل پێشمه‌رگه‌ى كوردستان.
له ديمانه‌ى ته‌له‌فۆنييش وه‌ل ئاژانس روێته‌رز، سێ پياو له يه‌ك ئاوايى باس له‌وه كردن ك ئه‌گه‌ر گله‌و بخوه‌ن ئه‌را شوونه‌يل خوه‌يان وه‌ده‌س ترۆريسته‌يل داعش ئه‌كوشيه‌ن له‌وه‌ر ئه‌وه‌گ هه‌وڵ واين ئه‌يه‌ن له‌ليان.
ئه‌و پياوه‌يله باس له‌وه‌يش كردن ك مناڵيگ و ژنيگ پيركه‌فتگ وه بوونه‌ى سه‌ردى و زوقم و ورسگى و كه‌مى چه‌وديرى پزيشكيه‌و له زمسان گيان له‌ده‌س دانه‌و دو پياويش له ئاكام ته‌قينه‌وه‌ى مين مردنه.
مه‌حمود ك جفتياريگه له ته‌مه‌ن 48 ساڵان، باس له‌وه كرد قازيفه‌ى مۆرته‌ر خاستره له ورسگى، چوينكه ئه‌تويه‌نێد خوه‌د له‌تاوى بشارێده‌و، وه‌لێ ورسگى ناتويه‌نێد خوه‌د له‌لى بشارێده‌و.
ئيسه‌يش ئه‌و مه‌ردمه ك ئابڵوقه دريانه تويش نه‌خوه‌شيه‌يل پووس هاتنه وه‌بوونه‌ى خوه‌ى نه‌شووردنيان و ئه‌و ئاويشه ك له چاڵاوه‌يل ئه‌خوه‌نه‌ى پيسه‌و هه‌ر وه‌و خاتريشه ده‌فر و دووڵه دانه‌ن ئه‌را جه‌مه‌وكردن ئاو واراناو له‌وه‌ر خواردنى.
له يه‌كه‌م دو مانگ سه‌ره‌تايش خواردن ئه‌را ئه‌و ئابڵوقه درياگه‌يله له‌ناو خاك ژير ده‌سڵات ريكخرياگ داعشه‌و وه دزيه‌و وه‌پيان ره‌سياد، وه‌لێ دوياخر داعش ده‌سكرده مينڕيژكردن ئه‌و ڕيه‌يله ك خوه‌راك و خوارده‌مه‌نى وه‌پيه‌و برديان ئه‌رايان.
ئيسه‌يش ئه‌و مه‌ردمه پشت وه‌و هووزه‌يل عه‌ره‌به به‌سانه ك له‌و ناوچه‌يله وجوود ديرن له به‌ره‌يل جه‌نگ و له‌ى دوياخريشه بڕيگ ده‌سميه‌ت وه‌پيان ره‌سى له‌ڕى پێشمه‌رگه‌يل كورد، وه‌ڵى وه‌ل ئه‌وه‌يشا جوور خوه‌راكيش نه‌ف له‌و گژوگيا وه‌رئه‌گرن ك له نزيكيان وجوود ديرێد.
جاروباريگيش پێشمه‌رگه له به‌شه خوه‌راك خوه‌يان ئه‌يه‌نه مناڵه‌يل كووچبه‌ر له‌وه‌ختيگ سه‌ردانيان ئه‌كه‌ن و دويننه‌يان ورسگيانه‌و ئه‌گه‌ردنه ده‌ورگرد سه‌نگه‌ره‌يليان، وه‌لێ ڕى وه‌پيان نادريه‌ێد بچنه به‌ره‌يل نوايين جه‌نگ.
رۆبه‌رت كولفيل قسه‌كه‌ر وه‌ناو ليژنه‌ى نه‌ته‌وه‌يل يه‌كگرتگ ئه‌را مافه‌يل ئاده‌ميزاد له ديداريگ وه‌ل رووژنامه‌نويسه‌يل له هه‌فته‌ى گوزه‌يشت باس له‌وه كرد ك وشدارى درياسه ده‌سڵاته‌يل كوردستانى ئه‌را زه‌مانه‌تكردن ئه‌و مه‌ردمه‌و وه‌رگرتن ده‌سميه‌ت ئنسانى ئه‌ڕايان.
له‌ى باوه‌ته‌و، كولفيل وت: ئه‌گه‌ر ده‌سڵاته‌يل كوردى مه‌ترسى ئاسايشى داشتوون له‌باره‌ى ئه‌و مه‌ردمه، ئه‌وه له‌ى حاڵه‌ته په‌يجوورى له مه‌ردم بكا وه‌شيوه‌يگ تاك له شوونيگ ئه‌مان و وه شه‌فافيه‌ت ته‌ماميگه‌و وه‌شيوه‌يگ ياسايى.
