گرانی و نەداری ناچار فرەیلیگ لە دێرک کەێد زواڵە ییەنەو
شەفەق نیوز/ شار دێرک لە باکوور و خوەرهەڵات سوریا، لەی ماوەیل دویاییە سیمای گەردین ناو زواڵە وەخوەی دی، ک مناڵەیلە چنە ناو زوڵدانەیل تا چشتەیل پلاستیک و نانە رەقە گردەو بکەن.
سیمای زواڵە گەردین تەنیا لەبان چین کەمیگ دیارە، ئەوەیش لەوەر خراوی رەوشەیل ژیان و گوزەرانی و گرانی بازاڕەگە.
عومەر ئەبو جاسم لە ئاوارەیل شار دێر زور سوریە و لە شار دێرک جیگر بویە، ئەرا ئاژانس شەفەق نیوز ئویشێد: مناڵەیلم خوەیان رەسننە شوینەیل زوڵدانەیل لە گەڕەکەیل شار دێرک وەرجە رەسین ماشینەیل شارەوانی، تا بڕەسن چشتیگ ئەرا فروشتەنی گردەو بکەن.
ئەبو جاسم وتیش: من خاوەن سێ ژن و هەفدە مناڵم، کار لە نانەواخانەی ئامێری لە شار دێرک کەم وە مووچەی ٢٠٠.٠٠٠ لێرەی سوری، و لەناو ماڵ نیمچە خەڕاوەیگ لە گەڕەک خیرەکان کرانیشینم، نێزانم چوێ خیزانەیلم وەڕیەو بووەم.
ئەبو جاسم دیاری کرد ک رووژانە مناڵەیلی ناو زوڵدانەیل شار دێرک گەردن، وە مینەی پلاستیک یا کانزا یا خوردەیل یا هەر چشتیگ ئەرا فرووشتەنی بگونجێد، تا نان رووژانەگە دراریمن.
وتیش؛ خوازینەیل ئی خیزان گەورەمە هیلێد مناڵەیلم نا زواڵەیلە بگەردن.
هەمیش خود سیماگە لە زوڵدانەی باشوور شار دێرک دووارەو بوود، ک دەیان لە خیزانەیل لە ژن و مناڵەیل مینەی چشتەیلیگ لە کانزا و پلاستیک ئەرا فرووشتەنی کەن، تا ئی ژیان سەختە لە سای قەیران سوریا وەسەر بوەن.
