دویای هەڕەشەی ئیسرائیل.. بالە چەکدارەیل عراقی خوەیان لە خوین جۆلان دویرەو خەن و بوختی کەنە مل "لایەنیگ سێیەم"
شەفەق نیوز/ وەرپرسەیل هیزەیل حەشد شەعبی و سەرکردەیل باڵەیل "وەرخودان عراقی" ئیسرائیل توومەتبار کردن کە بوخت پەلاماردان وەپییان کردگە، لەبان ئەو پەلامارەیلە وە باڵدان فڕۆکەی بێفڕۆکەوان تەقینەوە وەبان بەرزاییەیل جۆلان کە یەکیگیان بویە مدوو کوشیان و زەخمداری و ٢٥ سەرباز ئیسرائیلی.
راپۆرتیگ ماڵپەڕ "چەو خوەرهەڵات ناوڕاس" بەریتانی، وە ئەڵگەردان ئاژانس شەفەق نیوز، لە زوان سەرکردەیل باڵە چەکدارەیل و وەرپرسەیل عراق بڵاو کرد کە وتنە؛ ئیدیعای ئیسرائیل لەباوت بە کوشتن دوو سەربازەگەی لە بەرزاییەیل جۆلان وە درۆن عراقی قسەیگ درووە.
لە ڕاپۆرتەگەی بەریتانیا هاتیش، “هیزە سیاسییەیل عراق و کوتلە چەکدارەیل هەفتەی گوزەشتە بڕیاردان خوەیان لە جەنگ ئیسرائیل و حزبوڵای لوبنان دویرەو بخەن و تەقەلایان لەبان پاڵپشتی مرۆیی لە لوبنان و فەلەستین خەسەو بکەن”.
لە راپۆرتەگە وتیش: کەتائیب حزبوڵڵا و بزووتنەوەی نوجەبا وەردەوام بوین لە ئەنجامدان پەلامارەیل کە ناوچە جیاجیایل کردنە ئامانج لە قویلایی ناو ئیسرائیل، و بەرزاییەیل جۆلان، جویر سەرکردەیل باڵەیل دووپاتی کەن، بەڵام سەید ئەلشوهەدا کە باڵیگ بویجگترە باس پشتگیریکردن پەلامارەیل کرد لە هەروەختیگ بزانێد گرنگە.
سوپای ئیسرائیل، رووژ جمعە، راگەیان کە دوو فڕۆکەی بێفڕۆکەوان پڕ لە تەقەمەنی شەفەق رووژ وەرجەوە هیزەیل لە بەرزاییەیل جۆلان کردە ئامانج، و دوو ئەفسەر فەوج سێنزی لیوای جۆلان کوشیانە، و ٢٤ سەرباز ترەک زەخمدار بون، و ئیسرائیل توومەتبار باڵیگ چەکدار عراقی کرد کە لەلایەن ئیرانەو پاڵپشتی کریەێد.
بەڵام ڕاپۆرتەگەی چەو خوەرهەڵات ناوڕاس لە زار سەرۆک سێ باڵ عراقی وەڕوی قسەیل ئیسرائیل وسیان و دووپات کردن کە ئەو رووژە پەلامار وەبان جۆلان نەویە.
لە راپۆرتەگە زوان کازم ئەلفەرتوسی یەکید لە فەرماندەیل لیوای سەید ئەلشوهەدا وت: لە مانگ تشرین یەکەم ساڵ گوزەشتە وەرخودان ئیسلامی لە عراق زیاتر لە 160 ئۆپەراسیۆن ئەنجامداگە و ناوچەیل ناو ئیسرائیل و ناوچە داگیرکریاگەیل کردیەسە ئامانج لە بەرزاییەیل جۆلان، کە فرەیان وە مدووەیل جویراجویر لەلایەن ئیسرائیلەو دانوەپیناین بویە، وتیش؛ “وەرخودان ئەو ئۆپەراسیۆنەیلە راگەینێد کە ئەنجامی دەێد، وەرخۆدانەگەیش باس ئی ئۆپەراسیۆنە نەکردیە و وەرپرسایەتیی هەڵنەگردیە”.
وەقسەی فەرتوسی، “ئەگەر ئیمە بکردایمن وەنە خوەمان ئاشکرای کردیمن”.
هەرلیوا، راپۆرتەگەی بەریتانیا لە زار سەرکردەیگ باڵای هیزەیل حەشد شەعبی وت؛ رووژ جمعە دویای ئەو توومەتەیل ئیسرائیلە گردەوبوین کریا، کە ئامادەبویەیل تەقەلا دان راسیەیل پشت توومەت پەلامارەگە وەبان جۆلان دیاری بکەن، وە وتەی وەرپرسەگە، ئەو سێ باڵ عیراقییە وتنە ئیمە نەویمنە.
ئەو وەرپرسە کە لە گردەوبوینەگە بەشدار بویە ئاشکرا کرد کە"تاکە باڵ چەکدار کە توانای ئەنجامدان ئۆپەراسیۆنیگ لەوجویرە دیرێد، کەتائیب حزبوڵڵاس، ئەوانیش وتتە کار ئیمە نییە".
ئەو وەرپرس عراقییە لە درویژەی قسەیلی وتیش، شیکاریی ئیمە ئەوەسە یا ئۆپەراسیۆنەگە درووکانی بویە، کە هاتێ لەوەر چەن مدوویگ بوود، یا باڵیگ چەکدار ترەک بویە، بیجگە لەو سێ باڵ کە ناسیانە، و لە دەیشت خاک عراقەو پەلامارەگە ئەنجامداگە.
لە راپۆرتەگە دیاری کەێد کە وەرپرسەیل عراق ئویشن ئیسرائیل ئەوە هەڵوەسێد کە وە پەلاماریگ عراقی سەربازەیلی کوشتگە، تا ری خوەش بکەێد ئەرا پەلاماریگ وەبان ئەو ئامانجەیلە کە پەیوەندی وە ئیرانەوە دیرن لەناو عراق.
لە راپۆرتەگە باس ئەوە کریا کە وەگورەی داتایل چەو خوەرهەڵات ناوڕاس وە پشتبەسین وە چەن سەرچەوەیگ لەوانەیش سوپای ئیسرائیل، باڵە چەکدارەیل عراق لە ناوڕاس مانگ ئەیلولەو تا ئیسە 45 پەلامار ئەنجامدانە وە فڕۆکەی بێفڕۆکەوان و مووشەک کروز، کە فرەیان ناوچەیل “باکوور ناوچە داگیرکریاگەیل" و "باشوور خاکە داگیرکریاگەیل" کردنەسە ئامانج، جویر دیاریکردن لەلایەن باڵەیل، لەوانە حەیفا، دووڵ ئوردن، بەرزاییەیل جۆلان، ئیلات و ناوڕاس ئیسرائیل.
لە ناو ئەو پەلامارەیلە یەک پەلامار بویە کە لە ٢٣ی ئەیلول "بنکەیگ چەودیاریکردن سەر وە لیوای گۆڵان" کردە ئامانج، بەڵام باڵەیل شوین هویردیگ دیاری نەکردن.
راپۆرتەگە لە درویژەی قسەیلی وتیش: ئاشکراس کە "وەرخودان ئیسلامی" جیاوازی کەێد لە ناوەین جۆلان کە بەشیگ داگیرکریای سوریاس لە باکوور ئیسرائیل و ئەوەگ وە "باشوور ناوچە داگیرکریاگەیل" باسی کەێد، واتە باشوور ئیسرائیل.
راپۆرتەگە وتیش: بەیاننامەی وەرخودان لە ٣ی تشرین یەکەم کە ئەو پەلامارەیلە دیاری کەێد کە ئەنجامی داگە، نشانەس ئەرا ئەوە کە تاکە ئۆپەراسیۆنیگ کە ئەو رووژە ئەنجامی داگە، شوینیگ "باشوور خاکە داگیرکریاگەیل" کردیەسە ئامانج و ئەویش لە ئیواران بویە.
ڕاپۆرتەگەی بەریتانیا لە زار سڵاکار سەرۆکوەزیرەیل عراق، محمد شیاع سودانی بڵاو کرد کە هویچ لێدوانیگ لەبان ئەو چالاکییەیلە نیەێد کە لە دەیشت عراق رویدانە، بەڵام ڕەتی نەکردگە کە قسەی ئیسرائیل جی نیگەرانیە، "نیەزانیمن پەلامارەگە لە کوو و چوین بویە، و هویچ کۆنتڕۆڵیگ وەبان رویداوەیل دەیشت عراق نەیرێد."
ئەو سڵاکار سودانییە لە درویژەی قسەیلی وتیش؛ ئیسرائیلییەیل و گشت لاییگ ئاگادار هەڵوێست فەرم حکومەت عراقن، ئیمە دژ فراوانکردن جەنگ ناوەین حزبولڵا و ئیسرائیلیمن، تەقەلایلمان لەبان کارەیل دیپلۆماسییە تا ناوچەگە نەڕەسێدە جەنگ گشتگیر."
