ژیان كورده‌یل فه‌یلى ناوچه‌ى كیفاح
گه‌ورا فه‌رمایش كردگه‌و ئویشیگ (المال والبنون زینه الحیاه الدنیا) مه‌عناى ئه‌وه‌سه مناڵ و دارایى جوانى ئى دونیاسه ، وه‌لى كورد فه‌یلى هه‌ردوگى وه‌یه‌كه‌وه له‌ده‌سدا ، چوینكه سه‌دام دكتاتۆر هه‌م ماڵ و موڵكیان زه‌فت كرد و هه‌میش روڵه‌یلیان له‌ناوبردو بى سه‌روشوونیان كرد ، هه‌ر له‌وه‌ر ئه‌وه‌یش دوینید فره‌یگ له داڵگه‌یل جگه‌ر سزیاگ و باوگه‌یل ئوخه‌ى نه‌كردگ دواى ئه‌وه له‌خودا كردیان و له‌لى لاڵكیانه‌وه روحیان بسینیگ و ڕووژیگ زویتر له‌ى دونیاى پڕ له‌خه‌م و خفه‌ته نه‌یلیگه‌یان .
بیگومان وه‌گشت باوه‌ڕیگه‌وه تویه‌نیم بویشیم : هویچ ملله‌تیگ جویر كورده‌یل فه‌یلى به‌دبه‌ختى و زندان و كوشتن و گرتن و سزاداین وه‌چه‌و نه‌ینه ، ته‌نیا داواكارى كورده‌یل فه‌یلى ئه‌وه بوى هه‌ق خوه‌یان تواسن و مه‌یل ئه‌وه داشتن وه‌ئاشتى و بى گرفت له‌بان خاك باوگ و باپیره‌یلیان بژیه‌ن ك خاك پڕ له‌خه‌یرو به‌ره‌كه‌ته ، ك بیجگه تیه‌ڵى هویچ خوه‌شییگ له‌لى نه‌ینه چه‌و .
كورده‌یل فه‌یلى له‌وه‌خت حكوومه‌ت دكتاتۆر سه‌دام هه‌ر هاوار كردیان و ئیسه‌یش له‌سه‌رده‌م دیموكراسیه‌ت هه‌مان هاوار كه‌ن و تیه‌رنه گووش وه‌رپرسه‌یلا ، وه‌لى وه‌ڕاسى كه‌سیگ نیه گووشى له‌هاواریان بووگ و ته‌نیا زایه‌ڵه‌ى ده‌نگیان له‌دویره‌وه ژنه‌فن و نیه‌چنه ته‌نگیانه‌وه . ئمجا ئایا گشت عراقیه‌یل وه مه‌ینه‌تى كورده‌یل زانستیان ؟ ئایا گشت ده‌وڵه‌ته‌یل عه‌ره‌بى زانستیان وه ئه‌وه‌ك هاتیاگه بان ملله‌ته‌یل هاوسایان ؟ هه‌ر له‌ى باوه‌ته‌وه قسه‌یل چه‌ن كه‌سیگ ئاشكرا كه‌یم له‌كورده‌یل فه‌یلى و له‌وانه‌یش هاووڵاتى (وه‌لید یوسف ئبراهیم) ك ئویشیگ : من كورد فه‌یلییم و نیشته‌جى شار به‌غدام ، حكوومه‌ت به‌عس له‌وه‌خت خوه‌ى ئشاره‌ت (ئێكس) خستیاگه بان خیزانه‌یل ، دى له‌وه‌ر ئه‌وه‌یشه هویچ وه‌ختیگ نه‌تویه‌نستیم په‌ره به‌یمنه ژیانمان و دڵمان خوه‌ش نه‌وى وه ژیان ، وه‌ل ئه‌وه‌یشا ئویشیگ : من له‌سوپاى عراقى له‌ساڵ 1986 خزمه‌ت كردمه‌و به‌شدارى له‌جه‌نگ ئیران – عراق و له‌جه‌نگ (كوه‌یت)یش كردمه‌و ناچار كریایمه خزمه‌ت بكه‌یم و بچیمنه جه‌نگه‌وه ، وه‌ل ئه‌وه‌یشا جویر یه‌خسیریگ بویمنه له‌سوپاو ماوه‌ى 3 ساڵ هه‌یوایمه‌و فرار بویمه تا دویاخر ده‌سڵات به‌عس تویه‌نستن ده‌سگیرم بكه‌ن و له‌ئه‌نجام ئه‌وه‌یش خریامه زندان (دبس ئسلامى)و له‌و زندانیشه گشت جووره سزایگم دریا له‌و ماوه ك له‌ورا بویم و دویاى ئه‌وه‌یش وه‌ناچارى خزمه‌ت عه‌سكه‌رى ته‌واو كردم و له‌ساڵ 1996 له‌جه‌یش ته‌سریح بویم . وه‌لید ئویشیگ : من گشت عومر جایه‌ڵیه‌گه‌م رژیم سه‌دام داره‌ى تاڵان و ئیسه‌یش یه‌مه حاڵه‌ت ته‌ندروسییم له‌ى سه‌رده‌م ئازادى و دیموكراتیه‌ته سه‌قه‌ته‌و ته‌واو نیه‌و تا ڕووژ ئمڕوویش هویچ قه‌ره‌بوو تا ته‌عویزیگیش نیه ئه‌ڕامان و كه‌س هه‌واڵ له‌ئیمه‌ى به‌دبه‌خت و ماڵویران نه‌پرسیه .
(ره‌زاق عه‌بد میشه) ئویشیگ : من كورد فه‌یلییم و له‌باب ئه‌لشێخ ژیه‌م له‌ناو ماڵیگ حكوومى و خیزانه‌گه‌م ته‌سفیر كریان ئه‌را ئیران و منیش وه‌ل قه‌یریگ جایه‌ڵ جوانا مه‌ندم له‌عراق ، وه‌لى حكوومه‌ت عراق خسته‌مانه زندان له (ئه‌بو غرێب) و دویاخر ئه‌را یه‌كمجار له‌تاریخ تویه‌نستیم من و ره‌فیقه‌یلم له كورده‌یل قاپى زندانه‌گه بشكنیم و بهه‌یوایم .
(جنان مه‌حموود تاهر) ئویشیگ : مه‌ن كوردم و خه‌ڵك مه‌نه‌لى ، له‌ناوچه‌ى كیفاح شوى كردمه‌و له‌ناو ته‌نیا غورفه‌یگ نیشتمه وه‌ل چوار مناڵما ، وه‌زع ژیانمان فره سه‌خته‌و شویه‌گه‌م ڕووژیگ كار ئه‌كاو ڕووژیگ كار ئه‌ڕاى نیه ، كوڕه گه‌وراگه‌م هه‌ر له‌مناڵیه‌وه نه‌خوه‌شه‌و مه‌ژگى ته‌واو نیه ، باوگمیش له ته‌قینه‌وه‌گه‌ى مه‌نه‌لى شه‌هید بوى و دویاى ئه‌وه‌یش خوه‌یشكیگم له‌ناو ته‌قینه‌وه‌یگ تر په‌راشه‌ى فره‌یگ كه‌فته گیانى و ئه‌ویش له‌بان جى كه‌فتگه‌و هه‌ردوگ پاى بڕیاسه‌وه ، براگه‌میش له‌مه‌نه‌لى پۆلیس بوى و تیرۆرسه‌یل بردنه‌سه‌ى و نیه‌زانیم چاره‌نویسى چه بویه‌و دایگمیش له‌وه‌ختى سه‌دام برایگم كوشت له‌زندان وه‌سه‌به‌ب نه‌ته‌وه‌ى كورده‌وه تائیسه نه‌خوه‌شه‌و منیش وه‌سه‌به‌ب فه‌قیرى و نه‌داریه‌وه نیه‌تویه‌نم سه‌ردانیان بكه‌م .
ئا ئه‌یه‌سه مه‌ینه‌تى كورده‌یل فه‌یلى ناوچه‌ى كیفاح و ئه‌گه‌ر گووش به‌یمنه قسه‌یلیان و باسه‌یل دڵته‌زن له‌لیان بژنه‌فیم ئه‌وه چه‌وه‌یلمان پڕ بووگ له‌ئه‌سر و گیرستن و ئه‌وه‌ك هاته‌سه بان كورده‌یل فه‌یلى له‌به‌دبه‌ختى و ماڵویرانى و گرتن و كوشتن و زندانیكردن روڵه‌یلیان كه‌م نیه‌و گشتى له‌وه‌ر خاتر ئه‌وه بویه ك شوناسنامه‌یان كورد بویه‌و هه‌میشه كوردپه‌روه‌ر و نیشتمان په‌روه‌ر بوینه .
