وه یه‌ك عانه خوه‌یان له ته‌له‌فزیۆن دوینستیان!!
سه‌ده‌ى وه‌رین، ك ئه‌ویش له‌ڕوو 2 / 5 / 1956 وه ڕه‌سمى ته‌له‌فزیۆن به‌غدا واز بوى له بان ده‌س مه‌لك فه‌یسه‌ڵ دویم مه‌لك ئه‌وساى عراق.
مه‌سه‌له‌ى دامه‌زرانن ته‌له‌فزیۆن له‌سه‌ره‌تاى 1954 وه‌رجه ئه‌وه‌ك بووگه ره‌سمى كومپانیایگ وه‌ناو(باى) لقیگ له به‌غدا داشت و نمایشگا یا مه‌عره‌زیگ بازرگانى واز كرد و گشت كه‌ره‌سه‌یگ له بریتانیاوه هاورد، ئمجا ته‌له‌فزیۆنیگیش له‌ناو مه‌عره‌زه‌گه دانان و مه‌ردم چیانه ته‌ماشاكردنى و هه‌ركه‌سیگ بتواساگ خوه‌ى بوینیاتاگ له ته‌له‌فزیۆن بایه‌سه (یه‌ك عانه) بیاتاگ.
له‌ساڵ 1955 فه‌رمان دریا ك ئه‌و ته‌له‌فزیۆنه جیواز بكریه‌یگ ئه‌را ناو ده‌زگاى ئیزگه‌و په‌یوه‌ندى كریا كومپانیایگ تا بایگ و دامه‌زرنیگه‌ى له‌تازه‌وه، ئه‌و كومپانیایشه هه‌یشت شاره‌زا له‌و مه‌یدانه‌وه كلكردو ده‌سكردنه كاركردن و قوناغ یه‌كم جویر ئه‌زموون(تجریبى) بوى و ماوه‌ى په‌خشه‌گه‌ى ته‌نیا (25)كم بوى.
سه‌ره‌تاى وازبوین ئه‌و ته‌له‌فزیۆنه دڵخوه‌شى فره‌یگ بوى ئه‌را مه‌ردم و چشته‌یل خوه‌شیگ پیشكه‌ش وه دوینه‌ره‌یل كردیان جویر گوورانى و فیلم. وه‌لى له‌باوه‌ت ستۆدیۆ جویر ئیسه گرینگى یا ئه‌همیه‌ت وه‌پى نه‌دریاگه‌و له‌وه‌خت په‌خش راسه‌وخۆ ده‌نگ هه‌ر چشتیگ له‌ده‌یشت بویاتاگ كیشیاگه‌ى ناو. ئمجا له‌ى باوه‌ته‌وه پیاوه‌یل گه‌ورا ك ئیسه له‌ژیان مه‌ندنه‌و ئه‌و ڕووژگاره دینه‌سه چه‌و، باس كه‌ن و ئویشن، هه‌ر وه‌ختیگ واران و گرمهڕ بویاتاگ وه ئاشكرا ژنه‌فتیایمنه‌ى له ته‌له‌فزیۆن چوینكه ده‌نگه‌گه‌ى وه‌ل په‌خشه‌گه‌یان ژنه‌فتیایم.
ته‌له‌فزیۆنه‌گه‌ى به‌غدا له‌وه‌خت مه‌لك فه‌یسه‌ڵ دویه‌م جویر ته‌له‌فزیۆنه‌یل ئیسه دروو نه‌زانست و گشت چشتیگ وه ساده‌یى ئه‌را مه‌ردم په‌خش كردیاگ، وه‌لى ئیسه دوینید كه‌ناڵه‌یل ته‌له‌فزیۆن گشت جه‌هان ئه‌ڕاد نزیكه‌و كه‌ن و ڕاسیه‌یل فره‌یگ له‌باوه‌ته‌یل چه‌واشه‌وه كه‌ن. هه‌ر له‌وه‌ر ئه‌وه یش ئویشیم خوه‌زگ كه‌ناڵه‌یل ته‌له‌فزیۆن وژدانیان ڕه‌نگامه بووگ و به‌رنامه‌یلیان سیه‌و چه‌رمگ.
