هەر چێ نقا و نزاسە دە دنیا، ئیمە ئەخوازیمنەیان
عه‌لی حسێن فه‌یلی - پاپا! وە خەیر بیایتەو، جی شانازییە ئەڕا ئیمە ک بچیمن وەر ئەو پیری یەکێ لە گەوراترین پیاگەێل دنیا ک گەپ بیینەگەێ وە خاتر ماڵ و مناڵ و پوست و مەقام دنیا نییە.
پاپا گیان، جی شانازییە ئەڕا ئیمە ک بێ‌هیچ لایینداریێگ لە دینداری یا بێ‌دینی بیژیمن عراق، وڵاتێگە ک هێمان خوداداری لە بێ‌خودایی باوترە لە تێ و لە ئەوە گرینگ‌ترێ یەسە ک ئێرە وڵات خودادارییەێل ئەساتیری بییە لە (مەردووک) گرتگە تا وە (ئەهوورا مەزدا) تا وە (ئێزەد) و تا وە (الله).
هەمجا بێ‌ژە دینەێل ئەساتیری و گەور، دینەێل میژوویی و زینگێ جوور ئسڵام و مەسیحی و یەهوودی و مەندائی و ئاشووری و زەرتوشتی و مانەوی یا ئێزدەی و کاکەئی، هێمانیش دە ئێرە ریشگ دیرن و پەل و وەچ ئەوەشنن دە ئی سەرزەمین گەور و گەورا، ئوو هێمان هەم لاڵشەگه‌ێ، هه‌م جه‌مخانه‌یلی ، هەم کلیسا و کنیسەکانێ و مەعابد مەندائیێەکانێ، هەم مزگەوتەێلەێ، هەم قەور ئێمامەێلەگەێ و خەلیفەێلەگەێ، گشتێ ماڵگەێ نووڕ و نزا و هاوار و هانا و نقاێ مەردمەگەین.
هەمیش خووە بزانی ک دیری ئەیەیتە وڵاتێ ک پارتە سیاسییەێلەێ دە ژێر ئاڵای شەکیاگ ئازادی و دموکراسی کلیل هیج دەرانەێ ک وەر ئەو بەختەوەری بچەکێ، دە دەسێیان نییە.
ئی سەر داینە ک فرەیش مێژووییه، ئەخوازێ وە پێمان بێژێ ک (پاپا)، خوەی خاس ئەزانێ ک ئستقرار سیاسی، ئەمنی عراق دابەسته‌ێ ئەوە نییە ک چەنێ دیندارو مەسجد و کلیسا و کنیسە و دەیر دیرێ.
ئاسائییە ک کەمهووزەێل دینی و مەزهەبی، هووزی و نەتەوەئی، سیاسی و فەرهەنگی دە پەڕ و کەمارەێ دنیا ژیان باو دڵ خوەیان بکەن، دە عراق ک لە تێ چەن شەڕ دینی و مەزهەبی و نەتەوەئی کەفتەسە ڕێ خۆ دیارییە ک فرەتر لە گشتێ، یە کەمهووزەێلەن ک ئەبنە قوربانی.
وە خزمەت پاپاێ گەورا ئێژیمن ک ئیماندارەێل ئی وڵاتە، وەرە گرتنەسە وەر و دە سەرانسەر دنیا پەرکەنە و تەرف و تۆن بینە و هە ئاواتەخوازن ک دە ناو گێژاو شەڕێگێ وژدانی، بتوانن ئی پاشمەنە ک لە ئایین و دینەگەیان ئەڕایان ماگە رزگار و دەرئەو بکەن، ئوو نەهیلن ک شان و شکوو ئی سەرزەمینە ک مەنزڵگاێ میژووئی پەیامبەرەێل گەوراێ خودا بییە، لە یە گەنتر وە تاڵان نەچێ.
وه خزمه‌ت پاپاێ گه‌ورا ئێژیمن؛ ئەڕا یە ک هیچ ماف و بەشێگ لە هیچ ئایین و ئایین‌زایەیێگ گومه‌سار نەکرێ، پەیڕۆوان ئائئینەێل خودایی ئی وڵاته، بایەد دەس ئەڵگرن لە ئی شەڕ بەردەوام و تڵابەێل بێ‌هچانە ک هووکارەیان وە پێیان کردنە.
پاپای خاون‌ڕێز بایەد ئاگادار بکرێ ک ئەو یاخییەێل تاوانبارە ک دین و سیاسەت و بێ‌شەرمی داڕشاننەسە مل یەکتری و تێکەڵاوێیان کردنە، هانە شوون یەک ک عراق لە یەولا ببێگە عراقێگ وە بێ‌کەمهووز و هیچ کەمینەیێ دە عراق نەمینێ، چشتێ جوور کارساتێ ک داعش وە سەر ئێزەدییەێلە و مەسیحییەێلە و یەهوودییەێلە و کاکەئییەێلە و حەتتا وە سەر ئەو بەشە لە بسەڵمانەێلە و سوننیەێلەیش هاورد ک ناخواستن بچنە ژێر هێڵ خەلیفە درووکانییەگەیان.
ئەزانیمن ک پاپای بەڕێز، خوەییش دڵنیاسە ک خەڵک عراق ک فرەترێیان وە خاتر پاوەنە بیین وە دینداری و بسڵمانی، شەراو خواردن پەسەن ناکەن، خۆس ئەزانن ک تا ئێسە هیچ شەراوخوەرێ نەهاتگە و لە یەو لاویش نایێ ک بچوو تەقەمەنی بوەسێ وە قەێ خوەێ و خوەێ و بڕێ تر وەل یەکا بتووقنێ، بەڵام یە ئەوانه‌ن ک تەفسیرێگ ناسواو لە دین ئەکەن و دین کردنە وە ئیدئولووژیێگ ک توند و تێژێ و کوشت و بڕ حەڵاڵ کردگە.
ئەخەیمنە بیرتان، پاپاێ گەپ، عراق ئێسا دی جوور عراق ئەوسا نییە ک چوارڕێیانێ بی ئەڕا یە ک گشت عراقییەێلە ، دە دریژای میژوو، وە هەر زوان و پرتاڵ و هووز و دین و ئائینێ دە شان یەکترەکی وە خوەشی و هامدڵی ئەژیان، و پڕ بی لە مودارا و تەساهۆڵ و تەساموح.
عراق ئێسا وڵاتێگە پڕ لە کوشت و بڕ و ئەگەر لەێ‌وا بچێگە نوا، هیچ نمام و نوونمامێ خەیرێ لە ژیان خوەێ و لە خوەییش نابینێ.
یە خوەی شانازی گەپێگە ئەڕا گشت ک ئێوە تەشریف بیارنە عراق و ئەڕا ئارامێشت و هێمنی و ئاشتی‌خوازی دە عراق نزا و نقا بکەن .
وە راسی ئی وڵاتە دوارە هەوەجەێ کەفتگە وە یە ک کەسێ جوور ئیوە ک هەناسەێ پاکە و حەقە ئەڕاێ نزا بکا، بەشکەم نزۆلەی خودایێگ تر بێ وە خوار و بەزەی بنا وە دڵ وڵاتوەندەێلە و بزە بخا وە بان لێوێیان، ئوو ئی چین ئیمە‌یش ک ژیانێ وەگەرد رەنج کوتان گوشن کریا و هیچ ئاهێگێ خوەش نەدی وە چاو، ئەگەر لە قەپ نووڕ ونزاێل گەن گیان دەر نەکرد، وە نزای خەیر ئیوە، لاوەکەمێ هە بتوانێ،.گڕێ داکاسێگ و هچانێگەو بخوەێ، ئەڕا خوەێ.
