نه‌خش كورده‌يل فه‌یلى له شووڕش ئه‌یلوول
ئازادى و سه‌رفرازى و دادپه‌روه‌رى سیاسى و كوومه‌ڵایه‌تى و شووڕشه‌یل فره‌یگ به‌رپاكردیه له خاتر ڕه‌سین وه‌و ئامانجه‌یل پیرووزه و قوربانى فره‌یگیش له‌ى ڕیگه پیشكه‌ش كردیه.
یه‌كیگ له مه‌زنترین و وه‌رفراوانترین شووڕشه‌یل ملله‌ت كورد له 11 ئه‌یلوول ساڵ 1961 به‌رپابوى وه سه‌ركردایه‌تى بارزانى نه‌مر و پارت دیموكرات كوردستان وه به‌شدارى كردن گشت چین و لایه‌نه‌یل كوومه‌ڵگاى كوردى له پیاو و ژن و جایڵ و مامۆستا و كاركه‌ره‌یل و جفتیاره‌یل و...هتد ... كورد فه‌یلییش وه‌ك به‌شیگ له‌ى ملله‌ته نه‌خش وده‌ور دیارییگ داشت له پشتگیرى كردن سیاسى و ئابوورى و ڕووشنهویرى و لۆجستى له شووڕش و هه‌زاران جایڵ و جوان كورد چه‌ك وه‌رگرى كردن له ملله‌ت خوه‌یان هه‌ڵگردن و وه خوین ئاڵ خوه‌یان خاك كوردستان ڕه‌نگ كردن وناو خوه‌یان له ده‌فته‌ر یادگارى تاریخ كورد وه ئاو ته‌ڵا نویسانن و ڕووژگار شایه‌تى ئازایه‌تى و نه‌خش و ده‌وریان ده‌ید.
یه‌ده‌ڵا كه‌ریم وه‌زیر وه‌رین هه‌رێم كوردستان له باوه‌ت ئى نه‌خش و ده‌وره ئویشى:"كورد فه‌یلى وه‌ك به‌شیگ سه‌ره‌كى له ملله‌ت كورد یه‌كیگ له خشته‌یل بنه‌ڕه‌تى شووڕش ئه‌یلوول بوین، ئه‌وه بیجگه به‌شدارى كردنیان له دامه‌زرانن پارت دیموكرات كوردستان ك سه‌ركردایه‌تى شووڕشه‌گه كرد".
زیاتریش وت :" وه‌ختى شووڕشه‌گه به‌رپا بوى لایه‌ن ڕه‌سانن یا ئعلامى له ئاست گونجیاییگ نه‌وى، له‌وه‌ر ئه‌وه كورده‌یل فه‌یلى هه‌وڵ ئه‌وه دان ك ئى كه‌لێن و كه‌میه پڕه‌و بكه‌ن وه به‌شدارى كردن له دامه‌زرانن یه‌كم ده‌زگاى ڕه‌سانن شوورش ڕادیۆى (ده‌نگ كوردستان) ك بویه زووان حاڵ شووڕشه‌گه".
ئه‌وه‌یشه ئاشكرا كرد ك :"به‌رپابوین شووڕش ئه‌یلوول و قورسایى گه‌وراى له به‌غداى پایته‌خت دیاردا ك كورد فه‌یلى له‌تى جیگیرن له‌وه‌ر ئه‌وه به‌شدارى كردن له په‌یوه‌ندیه‌یل ده‌ره‌كى و ناوخۆیى له لایه‌ن سیاسى".
یه‌ده‌ڵا كه‌ریم ئه‌وه‌یشه ڕووشنه‌وكرد ك:" كورده‌یل فه‌یلى سه‌ركردایه‌تى ڕیكخریایه‌یل جه‌ماوه‌رى پارت دیموكرات كوردستان كردیان، وه‌ى جووره حه‌بیب مه‌حه‌مه‌د كه‌ریم سكرتێر پارتى بوى و یه‌ده‌ڵا كه‌ریم سه‌رۆك یه‌كێتى لاوان كوردستان بوى، و عادل موراد سه‌رۆك یه‌كێتى قوتابیان یا ته‌له‌به‌ى كوردستان بوى و زه‌كیه ئسماعیل حه‌قى سه‌رۆك یه‌كێتى ژنه‌یل كوردستان بوى".
له‌باوه‌ت لایه‌ن سه‌ربازى، یه‌ده‌ڵا كه‌ریم ئویشى:" له لایه‌ن سه‌ربازیه‌وه، سكرتێر پارتى ك یه‌كیگه له سه‌ركرده‌یل پارتى نه‌خش و ده‌ور خوه‌ى داشت ، ئه‌وه بیجگه به‌شدارى كردن قوتابیه‌یل و جایڵه‌یل و ژنه‌یل ك بوینه پێشمه‌رگه‌ى وه‌رگرى كه‌ر له شووڕش چ له كوردستان و چ له‌و ناوچه‌یله ك هانه ده‌یشت كوردستان".
له لایه‌ن ئابوورییش یه‌دوڵا كه‌ریم ئویشى : وه‌ختى شووڕش ئه‌یلوول به‌رپا بوى هویچ تواناى دارایى دیارییگ له كوردستان نه‌یاشت و چوینكه كورده‌یل فه‌یلى قورسایى خاسیگ داشتن له لایه‌ن بازرگانى له عیراق، بڕیگ له خه‌رجى شووڕشه‌گه دابین كردیان".
له‌لاى خوه‌یه‌و دكتۆر تالب موراد ڕاوێژكار یا مسته‌شار حكوومه‌ت هه‌رێم كوردستان ئه‌وه باس كرد ك :" كورده‌یل فه‌یلى ئه‌وسا و ئیسه‌یش خاوه‌ن هه‌ست نه‌ته‌وایه‌تى گه‌ورایگن و بڕیگ له لیان سه‌ركرده بوین له پارت دیموكرات كوردستان و نه‌خش و ده‌ور گه‌ورایگ داشتن له شووڕش ئه‌یلوول و كه‌س نیه‌تویه‌نى ئه‌وه ئینكار بكه‌ید، ئه‌وه بیجگه ئه‌و كوومه‌كه‌یل پویلیه ك پیشكه‌شى كردیانه شووڕش".
تالب موراد باس ئه‌وه‌یشه كرد ك :" هه‌زاران جایڵ وجوان كورد فه‌یلى چوینه ڕیز شووڕش و تا ئه‌و وه‌خته جه‌وه‌ڵ وه‌چه‌وه‌یل خوه‌یان نه‌دوین و جه‌نگیش نه‌كردوین و وه‌ل ئه‌وه‌یشه‌وه خاوه‌ن ئیراده‌ت و خواست گه‌ورایگ بوین له وه‌رگرى كردن له كێشه‌ى ملله‌ته‌گه‌یان ئازایه‌تى و قوبانى داین خوه‌یان ئه‌را گشت لایگ سابت كردن".
به‌ڵى چل و نوو ساڵ له بان ئى شووڕش مه‌زنه ڕه‌ى بوى و ئه‌وه‌گ ئیسه هه‌رێم كوردستان له‌تى ژیه‌ید یه‌كیگه له به‌رهه‌مه‌یل ئى شووڕش مه‌زنه و ئه‌و قوربانیداینه‌یل گه‌ورا ك گشت چینه‌یل ملله‌ت كورد پیشكه‌شى كردن، وه تایبه‌تى كورد فه‌یلى ك وه‌ختى وه‌ره‌و پیرى شووڕش چوى وه‌ته‌ماى هویچ نه‌وى و ته‌نیا هه‌ست نه‌ته‌وایه‌تى كوردى خوه‌ى پاڵ وه‌پیه‌و نیاد تا وه‌و شیوه به‌شدارى بكه‌ن و قوربانى بیه‌ن و هه‌ر له‌وه‌ر ئه‌وه‌یشه بوى ك ڕژیمه‌یل دیكتاتۆرى یه‌ك له‌شوون یه‌ك عیراق دوشمنایه‌تى ئى چینه كردن و گشت جووره زوڵم و سته‌میگ هاوردنه سه‌ریان له ته‌سفیر كردن و كووچ وه‌پیكردن وه‌زوور و كوشتن و بڕین و بى شوون و نوین كردن هه‌زاران جایڵ و جوانیان.
