لوجنه‌ى مادده‌ى 140 وه بڕیار شماره 7 كورده‌یل فه‌یلى ئنساف كرد
سیاسه‌ته‌یل ڕه‌گه‌زپه‌رستى سه‌رده‌م دیكتاتۆرى قه‌ره‌بوو بكه‌ید، یه‌یشه قه‌ره‌بووكردن دارایى و ماڵ و موڵك گریده‌وه، بڕیار شماره 7 ئى لوجنه ئه‌را ئه‌وه هاتیه ك ئه‌و كورده‌یل فه‌یلیه بگریده‌وه ك وه‌گووره‌ى بڕیار شماره 666 ئه‌نجوومه‌ن سه‌ركردایه‌تى شۆڕش هه‌ڵوه‌شیاى ك له ساڵ 1980 سه‌ده‌ى وه‌رین ده‌رچوى و له‌و سه‌رده‌مه كووچوه‌پیان كریا و ماڵ و موڵكه‌یلیان زه‌فت كریا.
له‌ى باوه‌ته گفتوگوویگ وه‌ل ڕائد فهمى وه‌زیر زانست و ته‌كنۆلۆجیا و سه‌رۆك لوجنه‌ى مادده‌ى 140 سازدایمن ك وه‌ى جووره ئه‌را ماڵپه‌ڕ شه‌فه‌ق قسه‌كرد:" مادده‌ى 140 وه‌ل قوربانیه‌یل ڕژیم وه‌رینه‌و مامه‌ڵه‌ت كه‌ید چ له ناوڕاس و باشوور بوون و چ له هه‌رێم كوردستان بوون و ئى مادده له‌سه‌ر بنه‌ماى نه‌ته‌وه‌و و مه‌زه‌و وه‌ل مه‌ردمه‌و مامه‌ڵه‌ت نیه‌كه‌ید و بڕیار شماره 7 مه‌ردم ناوڕاس و باشووریش گریده‌وه وه‌گووره‌ى مادده‌ى 140 و له‌هه‌مان وه‌ختیش ئه‌وه‌انه‌گ له به‌غدا كووچ وه‌پیان كریا وه مه‌رجیگ فایله‌گانیان پیشكه‌ش بكه‌ن و ئه‌و فۆرمه‌یله پڕه‌و بكه‌ن ك تایبه‌ته وه‌ى كێشه".
فهمى زیاتریش وت:"ئه‌و كه‌سه‌گ تواید ئى فۆرمه وه‌ربگرید بایه‌سه سه‌ردان باره‌گاى لوجنه‌ى مادده‌ى 140 بكه‌ید و ئه‌گه‌ریش نه‌تویه‌نست بایه‌سه وه ڕیگه‌ى ئیمێڵ لوجنه‌گه‌وه وه‌رى بگرید و دویاماوه‌یش ئه‌را پیشكه‌ش كردن 13 / 12 / 2010 تا گشت كه‌سیگ بتویه‌نى ئى فۆرمه وه‌ده‌سى بكه‌فید".
له‌لاى خوه‌یه سامیه عه‌زیز نوێنه‌ر وه‌رین په‌رله‌مان عیراق له په‌یوه‌ندییگى وه‌ل ماڵپه‌ڕ شه‌فه‌ق له بان ئه‌وه جه‌خت كرد ك:"كورده‌یل فه‌یلى ئى قه‌ربووه‌یل ماددیه گریده‌یانه‌وه، وه‌گووره‌ى بڕیار شماره 7 له لوجنه‌ى مادده‌ى 140".
سامیه عه‌زیز دویاى سه‌ردان سه‌رۆك لوجنه‌ى مادده‌ى 140 وت :"سه‌رۆك ئى لوجنه له‌بان ئه‌وه جه‌خت كرد ك كورده‌یل فه‌یلییش ئى بڕیاره گریده‌یانه‌وه ك قه‌ره‌بوویان كه‌ید و پیكهاتیه له وه‌خشین پارچه‌یگ زه‌وى ئه‌را ئه‌وانه‌گ زه‌وى له ده‌وڵه‌ت وه‌رنه‌گردنه و هه‌رله‌یوا بڕ 10 ملیۆن دینار پویلیش".
سامیه عه‌زیز زیاتریش وت:" ئه‌و خێزانه‌یل كووچوه‌پیكریاى یا كووچكه‌ره له كورده‌یل فه‌یلى ك ناویان له ڕه‌گه‌زنامه‌ى عیراقى سڕیاسه‌وه(ته‌رقین قه‌ید) كریانه و به‌ڵگه‌نامه‌یل عیراقى دیرن كتاب پشتگیرى كووچوه‌پیكردنیان دریه‌یده پیان".
له‌باوه‌ت ئه‌وكووچوه‌پیكریایه‌یل كورد فه‌یلیه ك له وڵاته‌یل غه‌ریبى نیشته‌جان، سامیه عه‌زیز ئویشى:" ئه‌وانه‌گ به‌ڵگه‌نامه‌یل وڵاته‌یل غه‌ریبى دیرن ك ئه‌وه ئسپات كه‌ید، له لایه‌ن ڕژیم وه‌رینه‌و كووچوه‌پیان كریاس و له‌وه‌ر ئه‌وه‌سه له‌و وڵاته نیشته‌جابوینه و ئه‌و ڕژیمه به‌ڵگه‌نامه‌یل عیراقییان زه‌فت كردیه، تویه‌نن به‌ڵگه‌نامه‌ى ئه‌و وڵاته هه‌ڵبگرن، له‌ى باوه‌تیشه وه‌زاره‌ت داخلیه له ساڵ 2006 بڕیاریگ ده‌كركرد؛ وه گووره‌ى ئه‌و بڕیاره گشت هاووڵا تییگ پاساپۆرتیگ بیگانه دیرى و به‌ڵگه‌نامه‌ى عیراقى نه‌یرى تویه‌نى وه بى ڤیزا بایده ناو عیراق وه ڕیگه‌ى ده‌روازه‌یل سنوورى عیراق وه‌مه‌رجیگ ناو شوون له داڵگبوینى له یه‌كیگ له پارێزگا عیراقیه‌گان له‌تى نویسیاوید".
سه‌تار نه‌ورووز جیگر به‌ڕێوه‌به‌ر فه‌رمانگه‌ى كووچكردن له وه‌زاره‌ت كووچكردن و كوووچوه‌پیكردن له په‌یوه‌ندییگى وه‌ل ماڵپه‌ڕ شه‌فه‌ق ئه‌وه ئاشكراكرد ك:"ئه‌و كه‌سه‌یله‌گ به‌ڵگه‌نامه‌ى عیراقى نه‌یرن ك بیلیده‌یان بانه‌و ئه‌را عیراق، بایه‌ته سه‌ربیه‌نه سه‌فاره‌ته‌یل عیراق له‌خاتر ئاسانكردن هاتنیان ئه‌را ناو عیراق و وه‌شوون كه‌فتن فایله‌یل وه‌رگرتن به‌ڵگه‌نامه‌یل عیراقییان".
له‌باوه‌ت هاوكارى نه‌كردن بڕیگ له سه‌فاره‌ته‌یل عیراق سه‌تار نه‌ورووز ئویشى:" ئیمه له وه‌زاره‌ته‌گه‌مان چه‌ن لوجنه‌یگ هاوبه‌ش وه‌ل وه‌زاره‌ت خارجیه پیكهاوردیمنه له‌خاتر چاره‌سه‌ركردن كوت فره‌ى كیشه‌ى كووچوه‌پیكریایه‌یل و كووچكه‌ره‌یل و هاوكارى دیارییگ وه‌چه‌و خوه‌مان دیمن له لایه‌ن وه‌زاره‌ت خارجیه، وه‌لى وه‌داخ فره‌یگه‌وه هیمان فره له سه‌فاره‌ته‌گان عیراق هاوكارى وه‌ل عیراقیه‌یله‌و نیه‌كه‌ن و یه‌یشه له ئاكام ڕه‌فتار تاكه‌كه‌سانه‌ى بڕیگ له كاروه‌ده‌سه‌یل ئى سه‌فاره‌ته‌یله‌سه".
