كۆمه‌ڵگا ورسگ"دووسى"يه
كه‌نعان حاته‌م / ئویشن، روژیگ مەڵا نەسردین چیە ناو میوانی گەورایگ، دەوڵەمەنەگان لەتی بوین، هەرچەنی دانیشت کەسیگ مکیسی نەکرد تا نان بخوەێد، چی دڵنگ فرە خاسیگ کردە وەر وهاتەو، گشت مەردمەگە مکیسی کردن، ئاخری پەڕ کراسەگەی برد وەرەو خواردەگەو وت؛ بخوە...
- لە نووسینگەی فرە دیاریگ، لە پلەبەرزترین جادە لە ناو شارەگە، وەڕیەوبەر کۆمپانیایگ پەنجەرەگەی وازکەێد، هیلێد هەوای وەهار خوەش بەێد لەدەمچەوی، هەناس دڵخوەشی کەشێد، ئیجا تیەێد ئەرا لابتۆبەگەی، تاقی پارەگەی لەناو بانکەگە بکەێد، دڵنیابوود ک قانجازەگانی ئمڕوو فەرەبوی، چاکەتەگەی کەێدە وەر، وداوەزێد تا بچوودە میوانی برادەرەیل، تا چەن روژیگ قانجاز ئەو پویل فرە کارەگەری لە دەروینی دیرێد، وهەڵبەت لە رەفتاری دیاردەێد، وخوازێد دەوڵەمنیەگەی بوودە جیوازییگ ئەرا کەسایەتی خوەی، لەبان ئەواکان ک هەمیشە چەویان لەیەک کەفێد، کارمەن چیشتەخانەگە، چشتفرەوش ناو دوکانەگە، دویەتە سکرتێرەگە، ومەردمەیلیگ تر، ئەو ساعەتە لەبان دەسی، وەرجە مانگیگ سەندیەسەی، ئمڕوو سودیگ ئەرا ئی رەوش نووە نەیرێد، بایەسە ئاڵشتی بکەێد، هەمیش مۆبایلەگەی، ماشینەگەی ک مۆدێل پارەکەس، گشتی بایەسە ئاڵشت بوون، تا وەل ئی قۆناغ نووە بگونجیەن.
دانیشێدە بان ئەنتەرنێت، کام چشتە ک مەردم فرە خوازنەی؟
چوینکە خوەی سینێدەی، تا خود مەردمەگە تەماشای بکن، نەگ ئەرا خود خوەی.
وەی جوورە تیر خواستە دەروونیەگەی بکەێد، ک دیارە فرە ورسگە ئەرا ئەوە ک لە مەردم خاستر دیار بیەێد، ئی ورسگیە نەگ تەنیا لەبان چشت سەنین وسیەێد، بەڵکم ئەرا چوینەیەتی رەفتار وگوزران روژانەی، خوەی وهاوسەرەگەی ومناڵەگانی، هەمیش بایەسە بڕەسنە ئاست تیرکردن ئەو خواست ورسگە، ئەراوە بایەسە مناڵەگەی بچوودە مەکتەو تایبەت، گرنگ نیە چە بخوەنێد، گرنگە هاوسەرەگەی وینەی مناڵەگە لەباخچەی ئەو مەکتەوە تایبەتە لە فەیسبووک بڵاو بکەێد...
- دەرهێنەریگ کۆری ناسریاگە وە (بۆنگ جۆن) فیلمیگ لەبان ئی ورسگیە دروس کەێد ک ناوی Parasite ک شایەیت بگونجیەێد ئەگەر وەزوان خوەمان وەپی بویشیمن هەرەسناک، وەعەروەی بوودە توفەیلی، ک گشت چشتەگان لەلایەو خواردنە، بەڵکم لەیلا خواردنەگە کۆمەڵایەتی و دەروونیە.
لەناو فیلمەگە، خیزانیگە گرنگی دانەسە هونەر، وهەوڵدەن کارە هونەریەگان پەسەن بکەن، وبسیننەی، ئویشێد؛ ئی خیزانە خوازێد بویشێد؛ ئیمە پویل دیرێمن، بەڵکم پایەمان بەرزترە، جوور ئەواکان هەرەسناک نیمن وە هەوڵدانیان ئەرا مارکە و چینە بەرزەگان ناو کۆمەڵگا، ئەراوە لە ناو ماڵیگ نیشتنە ک هونەرمەنیگ دروسی کردگە، ک خوازن هێڵیگ وەدەور خوەیان بکیشن، ک ئەیە جهان جیواز خوەمانە، وەلی وەهەرەسناکیان لە بان هونەر...
- زانای ئابووری وکۆمەڵایەتی تۆرستین فیبڵین لەناو کتاوە وەناوبانگەگەی ( بۆچون چینە دەوڵەمەنەگە) نووساد؛ چشت وەکارهاوردن ئەرا شانازی، لە سای مێژوو ئایەمەگان رەفتار هاوشانیگ وەل خاوەن پویل و دەسڵات بویە، ئەرا هێڵ کیشان ناوبەین خوەیان وچینە خوارینترەگان، تەنانەت هەمیش ناوبەین خوەیان و هاوماڵەیلیان.
ئەراوە فرەیگ لە راگەیانن وپڕوپاگەندە جەخت خەێدە بان دروسکردن کۆمەڵگایگ هەرەسناک وحزەوماڵداری، لەبان بنەمای شانازی و رکابەری وجیوازبوون.
لەکتاوەگە باس هۆکارەیل ئی رەفتار کۆمەڵایەتیە کەێد، وەلی دویای خوەنستن ئەو هۆکارەیلە، لەلامان کەفتەدەر ک گشتی تیەێدەو ئەرا تەنیا یەک هۆکار، ئەویش دوسیە.
گشت هەوڵدەێد ئەرا ئەوەگ مەردمیگ فرەتر بوودە دوسی ، واتە ورسگیە راسیەگە تیەێدەو ئەرا ورسگی کۆمەڵگا ئەرا لەتە نانیگ لە دوسی.
