عێراق له ناونی ئارزوو و بیزارى
دويره‌وخستنى له به‌هه‌يشت خودائی و پاناینى له‌بان زه‌وی پڕ له ئارزووه‌یل سزا دريا. وه بایه‌د بزانن تا وه‌ختیگ هه‌ناس له گیان ئنسان زینگه ئارزوویش زینگ ئه‌مينێ. ئه‌گه‌ر خوو هويره‌و بكه‌یمن ئارزوویگ ك گشت ئنسانه‌یل وه‌پى سه‌ر له‌بان سه‌رین ئه‌نن، وه‌لى چه‌و وه ڕووژ نوویگ ڕووشنه‌و كه‌ن خوه‌ى داشتن وڵات و ئاسمان پرچ و پاك, ساف و زوڵال وه‌ل وینه‌یل جوان و مه‌یلكيش په‌تى له هه‌ر ئاژاوه‌و پڕ له ئارزوو، وه‌لى وه‌ختیگ به‌ڵگه‌ى ئومید و ئاوات وه بیزارى و نائومیدى ئاڵوگوڕ كریه‌ێد و مرێد. ئنسان له گیان خوه‌ى ئاس و ئاواتمه‌ن ئه‌وه بوود فه‌رار بكاد و ئه‌راى شوون نادیاریگ سه‌ر ئه‌ڵگرێ. وڵاته‌گه‌مان نموونه‌ى دیارى و ئاشكراى ئى بیزارى و نائومیدیه‌سه ك چوین ده‌وار ئه‌ڵداگه‌سه‌بان هاوڵاتیه‌ل وه هه‌ناسه‌یل له سینه‌گیلیان حه‌بسه‌و كردگه و له ساده‌ترین و ئاسايیترین (حقوق) جوور ئاسايش و خزمه‌تگوزاریه‌یل ئاو و كاره‌با و ریگه‌وبان بیبه‌شیان كرده‌گه‌و بویگه‌سه خاویگ چمانى هیچ ته‌عبیرو ته‌فسیرى ئه‌راى نيه و نادێده ڕوئیاو خاو ڕاسكانیگ.
وعیراق بویگه‌سه سه‌رزه‌مین ئه‌ڵاجویه‌یل ك هه‌ر تاو وه‌ل هاتن گه‌رده‌لویل سیاسی مه‌ناخى ژیروبان بوود و تا ئارامش و ئستقرار دووباره, وه‌خت فره‌یگ خوازى و ئایا عومر وه ئیمنه ئزن ئه‌یاد ك جاریگتر كه‌شتى ژیانمان له بان ده‌ریاى ئارام له هاتوچوى بوود و ته‌ماشاگه‌ر دویاڕوووژ و ئاینده بويمن.وه نه‌یاشتن جوواو دیارى و ئاشكرا ئه‌راى ئه‌گه‌ره‌یل و ناپایدارى و نا ئه‌منى و..., ئمجاس خوین بیزارى و گلیه‌مه‌ندى و نائومیدى گیانى تیرئاو كه‌ید و ته‌نیا ریگه‌چاره, سه‌رئه‌ڵگرتن وه دیار بیگانه و تام كردن غه‌ریوى و ته‌نیایی .له چنه وه‌ختیگ وه‌رپه‌رس له بان ئى ڕویداگ تیه‌ڵى كوشتن ئاوات ئنسان خاوه‌ن هه‌س و ئحساس پڕ هیز و توانا كیه؟!
