عیراق و ئنسكلۆپیدیاى گینیس
پێوانه‌یى بنویسنن وه هه‌رشیوه‌یگ بویه، ئه‌وه دى ئه‌گه‌ر وه بیناكردن بورجه‌یل به‌رز یا قابه‌یل (ته‌بووله) یا نوخه‌كوڵیاى، چوینكه ئیمه‌یگ وڵاته‌یل عه‌ره‌بى تواناى شاكاره‌یل له‌یانه خاستر نه‌یریمن، هه‌ر له‌ى وه‌خته عیراق وه واڵانترین ده‌روازه‌وه چویه‌سه ناو ئى ئنسكلۆپیدیا و له‌سه‌ر هه‌رچى وڵاته‌یل ناوچه‌گه و فره وڵاته‌یل جه‌هانیشا چ له ڕووژهه‌ڵات و چ له ڕووژئاوا، سه‌ركه‌فتیه؛ له‌یرا شایه‌ت یه‌كى له‌لیمان بپرسى ئه‌و شاكاره‌یله چه‌ن و چ سروشتیگ دیرن؟ یه‌یشه جوواوه‌گه‌یه:
- عیراق خاوه‌ن دریژترین ماوه‌یه ك وڵاتیگ وه بى حكوومه‌ت وه‌سه‌رى بردوید، چوینكه زیاتر له 8 مانگ وه‌بان هه‌ڵوژاردنه‌گان ڕه‌د بوى و هیمان فراكسیۆنه‌یل په‌رله‌مانى زووران گرن ئه‌را به‌شه‌وكردن كێكه‌گه‌ى حكوومه‌ت و وه‌ى زویه‌یلیشه یه‌كم خول په‌رله‌مانى وه‌بى دامه‌زرانن حكوومه‌ت وه‌سه‌رچوود. له‌گشتى خوه‌شتریش ئه‌وه‌سه ك هه‌ر فراكسیۆنیگ خوه‌ى وه تاكه خاوه‌ن هه‌ق زانید له دامه‌زرانن حكوومه‌ت دویر له‌و فراكسیۆنه‌گانتر، و ئه‌نجوومه‌ن نوێنه‌ره‌یلیش جوور ته‌ماشاكه‌ریگه‌و هویچ ده‌ربه‌ن نیه چوینكه مه‌عاشه‌گانیان ڕه‌سید و تایبه‌تمه‌ندى و ده‌رماڵه‌گانیانیش وه‌رگرن.
- عیراق خاوه‌ن گه‌وراترین شماره‌ى كاروه‌ده‌سه‌یل پله یه‌ك و پله دو و پله سێیه ك ڕه‌گه‌زنامه یا جنسیه‌ى وڵاته‌یلیگتر هه‌ڵگردنه، بیجگه ڕه‌گه‌زنامه‌ى عیراقى، و خاوه‌ن گه‌وراترین شماره‌ى كاروه‌ده‌سه‌یلیگه ك خزمه‌ت سه‌ربازى له له‌شكره‌یل وڵاته‌یلیگتر كردنه و فره‌یش له‌لیان هیمان پله‌ى سه‌ربازى ئه‌و له‌شكره‌یله هه‌ڵگردنه.
- عیراق تاكه وڵاتیگه له دونیا ك ملیاره‌ها دۆلار له بان كاره‌با، له بودجه‌گه‌ى خه‌رج كه‌ید، و وه‌ل ئه‌وه‌یشه‌وه هویچ ئه‌سه‌ریگى دیار نیه ته‌نیا له ناوچه‌ى سه‌وز نه‌ود، و ملیاره‌هایش ئه‌را ئاو خه‌رج كه‌ید و كه‌سیش نیه‌وینیده‌ى.
- عیراق خاوه‌ن گه‌وراترین یه‌ده‌ك یا ئحتیاتى نه‌فته له جه‌هان و وه‌ل ئه‌وه‌یشا گیرهاوردن به‌رهه‌مه‌یل نه‌فتى موعجزه‌یگه ئه‌را هاوڵاتى.
- عیراق خاوه‌ن نمره‌ى پیه‌مانه‌یى یا قیاسیه له گوم بوین چشته‌یل و ئى نمره له سێگۆشه‌ى برمۆدا وه‌رگردیه، چوینكه له عیراق هه‌زاران هاوڵاتى گوم بوین و هه‌ر له‌یوا ملیاره‌ها دۆلار له دارایى ده‌وڵه‌ت گوم بویه بى ئه‌وه‌گ كه‌سى بزانى چه وه سه‌ریان هاتیه.
- عیراق بویه وڵات نمره یه‌ك له كلكردن كووچبه‌ره‌یل خاوه‌ن پیشه‌یل به‌رز و تایبه‌تمه‌ندیه‌یل زینگ وه‌ره‌و گشت وڵاته‌یل جه‌هان و ئه‌وانه‌گیش جارى مه‌ننه، شه‌و و ڕووژ هانه فتراق كووچكردن.
- پاساپۆرت عیراقى نمره یه‌كه له جه‌هان له لایه‌ن كه‌م قیمه‌تى و هه‌ڵگره‌گه‌یشى ئه‌وه مسۆگه‌ر كردیه ك ڕه‌زاله‌ت جووراوجوور و سووكایه‌تى كردن وه‌چه‌و بوینید له ته‌یاره خانه‌یل جه‌هان، وه‌تایبه‌تى له ته‌یاره‌خانه‌یل برایه‌یل عه‌ره‌بمان.
- عیراق خاوه‌ن به‌رزترین مه‌عاش كاروه‌ده‌سه‌یل حكوومیه له وه‌شیوه‌یگ ك مه‌عاش مانگانه‌ى بڕیگیان له مه‌عاش ساڵانه‌ى سه‌رۆك ئه‌مریكا زیاتره.
- عیراق تاكه ده‌وڵه‌ت كشتوكاڵییگه له جه‌هان ك هه‌رچى به‌رهه‌م كشتوكاڵیه له وڵاته‌یلیگتر سینید.
ئه‌یه وه‌شیوه‌ى كورتیگ بڕیگ له‌و نمره‌یل په‌یمانه‌ییه‌سه ك ناو عیراق له كتاب ئنسكلۆپیدیاى گینیس وه گشت شانازییگه‌و تۆمار كردن، و ئه‌گه‌ریش چشته‌یلیگتر له هویرمه‌و چویه، له خوه‌نه‌واره‌یل ئه‌زیز داواى وه‌خشین كه‌م، و بیلا كوومه‌كم بكه‌ن ئه‌را زیایكردنیان.
