سەردەم ناونیشانەگان
كه‌نعان حاته‌م / شەپۆلیگ لە بی سەوادی و ناخوەنەواری نوویگ کەفێدە شوونەیل بڵاوکردن خوەنەواری، وەلێ تەنیا وە ناونیشانەیل باوەتەیل گۆڤار و رۆژنامەگان، وهەمیش وەبی گومان، لەبان ماڵپەڕەیل پەیوەندیە کۆمەڵایەتیەگان، ئی بەشە لەو مەردمە ک خوازن وە سیمای رووشنهویر خوه‌یان بناسنن، خوەیان لە راسیەو، بی سەواد و نا خوەنەوار ئی سەردم نووەن، وتەنیا مینەی وێنەیل و ناونیشانەیل باوەتەگان کەن، و لەوە خراوتر ئەوەسە ک خود ناونیشانەگان بڵاو کەن، و کەمیگ لە بۆچونوە سادەگان خوەیان لەبانی واژوو کەن، ئیجا ئەو ناونشانەیلە بوونە رۆژەفیگ لەناو ئەو مەردمەگە ک وەشیوەی خویان هەمیش نیشن بڵاویان کەن.
هەر لیوا، لە باوەتەیل سیاسەت و هونەر و ئەدەب و ئابووری و مێژوو و تەنانەت ئاینیش.
چەن خوەنەواریگ هەس، وەلی ژمارەی فرە کەمیگن، هەمیشە لێکۆڵینەوە لە باوەتەگان کەن، و چنەو ئەرا سەرچەوەیل ناونیشانەگان، چوونکە نێکەفنە شوون سیما و کەشخەی وێنەکان یا ناونیشانەگان، بەڵکم ئەوانە بایەدە یا قسەی قویل ودریژیگ بڵاو بکەن تا لێکۆڵینەوەگانیان بڕەسننە خەڵکەگە، ولەیلا کەفنە گیچەڵ ئەوە ک فرەی خەڵکەگە لە سەردەم کورتە پەیام و ئێس ئێم ئێس تاقەت ئی خوەتستنە نەیرن، یا بایەدە وه قسەی کوڵبڕیگ تەقەلای باسکردن ئەو لێکۆڵینەوە و شیەوکردنە بکەن، و ئەگەر کوڵبڕیەو بکەن بایەتە پەنا وە خەسەوکردن وشەگان بیەن، ئیجا، کەفنە ناو گیچەڵیگ گەوراتر، ک فرەی ئەو نا خوەنەوارەیل ئی سەردەمە، دووارە جوور ناونیشانیگ کەشخە بڵاوی کەن، و هەمیشە بۆچوونەیل سادەی خوەیان وەگەردی واژوو کەن، تا دووارە بکەفیمنەو باس پەنەگەی حەسەن کەچەڵ.
هەمیشە گشت زانیاگاریەگان سەرچەوەیگ دیرن، و ئەگەر سەرچەوەگان خاوەن هویرەوکردن توکمە و رەسن بوون، بایەدە هەردوگ سیفەگە وەناو یەک قەباڵ بگرن تا بتوێنن لەناو ئی سەردەم بی سەوادیە، وەشیوەیگ ناڕاستەخۆ، بیلن زانیاریە سووددارەگان و راسەگان وەدەس خود بی سەوادەگان بڕەسننە فرەترین خەڵک، ئەویش لەڕی وەکارهاوردن سیمایگ ناسک و ئاسان وەگورەی ئەو کەشخە ک نیمچە رووشنهویرەگان خوازنەی، و هەمیش وەگەرد بنەمایەی قویل و پڕ لە راسی و زانستی، تا دەس ئی سەردەمە وەرەو ئایندەی رووشنیگ بگرن.
