ساڵه‌یل فره‌یگ ئه‌سر چه‌و ڕشانیم ، با تاویگیش خوه‌شى بوینیم
جویر كورد له‌بان خاك خوه‌ى ده‌رنه‌كریاگه‌و به‌شبه‌ش بان ده‌وڵه‌ته‌یل نه‌كریاس ، هویچ نه‌ته‌وه‌یگ جویر نه‌ته‌وه‌ى كورد ئه‌نفال نه‌كریاگه‌و هویچ جایه‌ڵ جوانه‌یلیگ له‌دونیا جویر جایه‌ڵ جوانه‌یل ملله‌ت كوردمان روى وه‌ڕوى ڕه‌شبگیر و له‌سێداره‌داین و جووره‌ها سزاداین دڵته‌زن نه‌ویه‌سه‌وه ، هویچ كوومه‌ڵگایگ جویر كوومه‌ڵگاى كورده‌وارى ماڵویران نه‌ویه‌و هویچ شوونیگیش له‌جه‌هان وه‌ك شار و شاروچكه‌و ئاوایه‌یل كوردستان وه دڕنده‌یى خاپوور نه‌كریاگه‌و نه‌سزیاگه‌و له‌وه‌یش زیاتر هویچ ملله‌تیگ له‌دونیا جویر كورده‌یل فه‌یلى وه‌سه‌ریان ناتگه‌و مادده‌یل كیمیاوى و بایلۆجى و لوغمه‌یل جووراو جوور وه‌پیان تاقیه‌و نه‌كریاگه‌و هویچ مه‌ردمانیگیش له‌دونیا ئه‌وه‌نه‌ى كورد زندانى وه‌چه‌و نه‌یه‌و هویچ كه‌سیگیش ئه‌وه‌نه‌ى كورد زنگ وه‌چاڵ نه‌كریاگه‌و خاكیش ئه‌وه‌نه بویه‌سه شوون قه‌وره‌یل وه‌جه‌م ئه‌را كورده‌یل ئه‌وه‌نه ئه‌را ملله‌ته‌یل تر نه‌ویه . ئه‌وه‌نه داڵگه‌یل جگه‌ر سزیاگ كورد گیرستنه ئه‌ڕا رووڵه‌یل بیسه‌ر و شوونیان و ئه‌وه‌نه ده‌نگ كه‌پووڵكوتان وكوته‌ڵكوو باوگه‌یل و هاوار و ناڵه‌ى خوه‌یشكه‌یل و قیژه‌ى مناڵه‌یل كورد ره‌سیه‌سه ئه‌وپه‌ڕ ئاسمان ، ئه‌وه‌نه ملله‌ته‌یل تر له‌ى سته‌م و چه‌وسیانه وه‌چه‌و نه‌ینه ، ئه‌وه‌نه كوورپه‌یل كورد له‌وه‌ر مه‌مگ دایگ و له‌ناو بیشكه بوینه قوربانى غاز خه‌رده‌ل و سیانید له هه‌ڵه‌بجه‌و شوونه‌یل تر كوردستان ، ئه‌وه‌نه وه‌سه‌ر مناڵه‌یل هویچ ملله‌تیگ تر نات له‌بان ئى گووشه‌ى زه‌ویه .
ملله‌ت كورد له وڵاته‌یل تر و له‌ى وڵات قه‌زاو قه‌ده‌ر عراقه وه‌تایبه‌ت رووژگار فره‌یگ هه‌قه‌یل ره‌واى ژیرپا خریاگه‌و خاوه‌ن ماڵ خوه‌ى نه‌ویه‌و جویر بیگانه ته‌ماشاى كریاگه‌و گشت خوه‌شییگ له‌لى سه‌نیاسه‌وه‌و ته‌نیا مه‌ینه‌ت و ده‌رده‌سه‌رى و ڕه‌وبڕه‌و كردنه‌سه نسیوى و هه‌ر وه‌ئاگر و ئاسن وه‌لیا ره‌فتار كریاگه ، هه‌میشه بیبه‌ش بویه له‌شادى و كه‌سیگ نه‌ویه خوه‌شى بخه‌یگه دڵى و كه‌میگ له‌زه‌خمه‌یلى ساڕیژ بكا. ئمجا ئه‌گه‌ر ئیسه‌یش له‌ى رووژگاره‌و له‌سایه‌ى ئازادى و عراق تازه‌و ده‌وران تازه‌یگ كه‌میگ خوه‌شى بكه‌یم له‌یوا بزانیم هه‌ق خوه‌مانه‌و گشتى له‌سایه‌ى ئه‌و هه‌مگه قوربانیداین و ئه‌سره‌یله‌سه ك جویر واران له‌چه‌وه‌یلیمان وارى و ڕووشناییگ وه‌پى نه‌كردیمنه دى . ئمڕوو ئه‌گه‌ر سه‌رچۆپیه‌گه‌یش وه‌ده‌سمانه‌وه بووگ ئه‌نجام ئه‌و زوڵم و زوور ساڵه‌یله‌سه ك له‌شادى و خوه‌شیه‌یلى بیه‌بش كریایم ، ئه‌گه‌ریش گوورانییگ بچڕیم و مۆسیقایگیش بژه‌نیم ئه‌وه تام تیه‌ڵى رووژگاره‌یل گوزه‌یشته وه‌پى كوشیم و هه‌ناسه‌ى ئوخه‌یش وه‌پى هه‌ڵكیشیم. هه‌ر له‌وه‌ر ئه‌وه‌یش ئویشیم (ساڵه‌یل فره‌یگ ئه‌سر چه‌و ڕشانیم ، با تاویگیش خوه‌شى بوینیم).
