ئەگەر دیوارەیل قسە بکردان
فاتیمە سەڵاح ئەرکەوازی
ئەگەر دیوار قسە بکرداد هاتێ فرە چشت ئەرامان بوتاد کە ئیمە لە هوریمانەو چگە یا هەرگیز نەخوازیمنە وەهویریان باریمنەو، دیوارەیل نوڕنە فرە چشت، لەیەکم رووژ چگنە ناو ماڵیگ تا دویا سات مەنن، دەنگ قاقای خەنستن و گیرستنەیل، قسەیل دەردەدڵ و وەردەوەردەیل بویچگ، و ئاشتیەیل دویای تویرەبوین و ئەو بیدەنگی قویڵە کە لەدویای بڕیگ رویداو رویدەن.
ئەگەر دیوارەیل قسەبکردان شایەت بوتان چەنجار کەسیگ لە پشت دەرەیل بەسیاگ ئەسر رشانییە باوجی دوای ئەوەگ دەرەگە وازکەێد وە بزگەخەنین دەرچگە و وتیە: "هویچم نییە"، بوتاد چەن جار داڵگیگ لەشەو لەخەو هەڵسیاس تا دڵنیابوود زارووگەی خاسە یا چەن جار باوگیگ خەم خوەی سڕپووکردیە تا خێزانەگەی رخی نەچوود.
ئەگەر دیوارەیل قسەبکردان، شایەت لەبان ئەو کەسەیلە قسە ئەرامان بکردان کە رووژیگ لەو ماڵە بوین، باوجی ئیرنگە تەنیا وینەیلیان لەبان دیوار جویر یادگاری مەنیە، هاتێ بووتانە پیمان ماڵ تەنیا وە خشت و سان و ئاسن دروس نیەود ماڵ وە دەنگەیل و یادەوەرەیل و مرۆڤەیل ناوی دروس بوود.
دیوارەیل قسەبکردان ئەوتنە پیمان وەرجە ئەوەگ کەسیگ لە ژیان بیدەنگ بوود گووش لەلی بگر وەرجە ئەوەگ دەریگ ئەرا هەمیشە بوەسریەێد، پەیامیگ کلبکە، و وەرجە ئەوەگ یادەوەریگ تەنیا لەبان دیوار بمینێد قەدر ئەو کەسە بزان.
چوینکە ئەگەر دیوارەیل قسە بکردان شایەت نهێنێ فرەیگ بوی ئەرا باسکردن، باوجی هاتێ گەپترین قسەیان ئەوەگ بوود:
" قەدر ئەوانە بزان ئیرنگە هانە لاد وە دەنگ گەرمیگ بانگیان بکە، وە وشەیل سادە دڵیان خوەش بکە، دەسیان بگر، دووسداشتن خوەد ئەرا سوو دسوو نەهیلە، چوینکە رووژەگەی دویای هاتێ وە دەر بەسیایگ باد، وە کورسی چووڵیگ، وە وینەیگ لەبان دیوار، و وە وشەیگ کە لەبان دڵ مەننە و هەرگیز نەوتریانە.
هاتێ ئمڕوو هێمان ماڵەگە پڕ بوود لە دەنگ، هێمان کەسانیگ بوون وەپیانبوشید: "توو ئەرا من گرنگی"، باوجی ژیان هویچ بەڵینیگ نیەدەێد ئمڕوو هەمیشەیی بوود.
