دو كه‌ڵه‌شیر له‌یه‌ك شوون جیانه‌و نیه‌وگ
سه‌ركه‌فتگ سه‌ختیه‌یل فره‌یگ داشتووگ تا حكوومه‌ت و هه‌رسگ سه‌رۆكایه‌تیه‌گه ده‌سنیشان بكریه‌ن ، هه‌ر له‌وه‌ر ئه‌وه‌یش ئه‌و گرفت قویل ئیسه له‌لى كه‌فته‌وه .
له‌ئه‌نجام هه‌ڵوژاردنه‌گه دو لیست فره‌گه‌ورا ن وه سه‌ركه‌فتگ هه‌ڵوژاردن دانریان ك سه‌رۆك هه‌ر یه‌یگ له‌قه‌واره‌یل شوون ته‌واو خوه‌ى له‌پۆست سه‌رۆكایه‌تى حكوومه‌ت خوه‌شكردگه . ئمجا هه‌رچه‌نى جیاوازى ناونیانیش دو كورسیه ، وه‌لى وه‌گووره‌ى ده‌ستوور یه‌ك كورسییش هه‌ق ئه‌وه ده‌یگه‌پى ك سه‌رۆكایه‌تیه‌گه وه‌پى بدریه‌یگ و حكوومه‌ت دامه‌زرنیگ ، وه‌لى سه‌رۆك ده‌وڵه‌ت قانوون وه هاوپه‌یمانیه‌تیكردن وه‌ل لیسته‌گه‌ى تر شیعه‌و نه‌فوه‌رگرتن له مادده ده‌ستووریه‌گه‌و فه‌تواى دادگاى باڵاى ده‌ستوورى خه‌ریك كیشانن به‌ره‌ى یا جه‌بهه‌ى زوورمینه‌گه‌یش بوى له‌ژیرده‌س سه‌رۆك لیست ئه‌لعراقیه . وه‌لى كیشه‌گه هه‌ر وه ئه‌وه‌نه كووتایى وه‌پى ناتگه ، گرفته ها له‌مه‌سه‌له‌ى وه‌یه‌كه‌وبه‌سانن هه‌رسێ پۆست سه‌رۆكایه‌تیه‌گه له‌لایگ و ، له‌لایگ تریشه‌وه ئه‌و داواكارى زوورمینه هه‌رسێ سه‌رۆكایه‌تیه وه‌گووره‌ى ده‌ستوور .
هویچكام له عه‌لاوى و مالكى نه وه‌ته‌نیاو نه‌یش وه‌هاوپه‌یمانیه‌تى وه‌ل لیستیگ ترا نیه‌تویه‌نن بڕه‌سنه ئه‌و ئاست ده‌ستووریه ، به‌ڵكوو بایه‌سه سێ لیست هاوده‌نگ بوون تا 2 له‌بان3ى ده‌نگ ئه‌ندامه‌یل ئه‌نجوومه‌ن دروس بكه‌ن ئه‌را هه‌ڵوژاردن سه‌رۆك كوومار تا ئه‌ویش سه‌رۆك قه‌واره‌ى خاوه‌ن فره‌ترین كورسى ته‌كلیف بكا .
سه‌ران و ده‌سڵاتداره‌یل قه‌وارى سه‌ركه‌فتگ هه‌ر وه‌ئه‌وه نه‌وسیان له‌به‌غدا و هه‌ولێر گفتوگوو له‌بان ڕه‌شنویس ریككه‌فتنیگ بكه‌ن ، یا تویه‌نیم بویشیم ریك نه‌كه‌فتن و دى رویكردنه پایته‌خته‌یل هاوساى عه‌ره‌به‌یلیان و له‌وانه‌یش دانیشتن و دیداره‌یل شام .
هه‌رچه‌نى مالكى له‌ناو خود ئئتلاف شیعه‌ى هاوپه‌یمانه‌گه‌ى ڤیتۆ له‌بان وه‌روژاركردن دیریگ ، وه‌لى هیمان واز له وه‌روژاركردن ناوردگه . له‌ڕاسى خاڵ كز ئه‌و زیاتر هاله‌وه ك تاڕاده‌یگ ئه‌و جه‌مده‌نگیه هه‌س ك نیه‌وگ ده‌وره‌یگ تر پۆسته‌گه وه‌پى بدریه‌یگ ، وه‌لى له‌وه‌رانوه‌ر ئه‌وه‌یش خاڵه بته‌وه‌گه‌ى قه‌واره‌گه‌یه ، ك دویره له شیویان و جیابوینه‌وه . وه‌ل ئه‌وه‌یشا ده‌سڵاتدارترین كه‌س ناو لیسته‌گه‌یه‌و هه‌ر خوه‌ى سه‌ره وه‌ره‌ن ناو قه‌زان لیسته‌گه‌یه‌و دویه‌مین لیست سه‌ركه‌فتگه له‌هه‌ڵوژاردن ك وه‌بى كورسیه‌یل ئه‌و زه‌حمه‌ته ده‌نگهاوردن . هه‌رچه‌نى لیسته‌گه‌ى عه‌لاوى ئه‌و جه‌مده‌نگى ره‌فزكردنه وه‌رانوه‌رى نیه ، وه‌لى له‌هه‌مان وه‌خت له‌ناو لیسته‌گه‌ى چه‌ن كه‌سیگ ده‌سڵاتدار هه‌س ك خوه‌یان وه‌هاوشانى زانن . له‌لایگ تریشه‌وه شایه‌ت له‌ڕوى پیكهاته‌ى قه‌واره‌ییه‌وه ترسناكترین لیست بووگ و ته‌حه‌داى گه‌ورایگ له‌وه‌رده‌مى بووگ . لیسته‌گه‌ى پیكهاتگه له قه‌واره‌یل جیاواز سونیه‌یل و قه‌یریگ له شیعه‌یل علمانى ك دژایه‌تى وه‌رانوه‌ر هه‌ردوگ لیسته شیعه‌گه‌ى تر وه‌ى جووره جه‌میانه‌و كرد . دى وه‌ى جووره ئه‌رامان ده‌ركه‌فیگ ك ئى ده‌وره‌ى پڕ له‌قه‌یران ئیسه ئه‌را هه‌ردوگیان بووگه خاڵ دوڕیان چاره‌نویسساز .
