خوه‌دان ئاماده بكه‌ن ئه‌وه‌سه نزیكه‌و بوى
ساڵ تا یه‌كم ڕووژه‌یل ئسلام و ئنجا ڕووژه‌یل ئمڕوومان و ئه‌وه‌گ له وتاره‌یل دینى و پیشبینیه‌گان ئادامۆس و كه‌سه‌یلیگتره‌و، تا ڕه‌سیه‌سه چشته‌یل نوو له زانسته‌یل گه‌ردوون یا فه‌زا و جموجویل هه‌ساره‌یل و خولخواردن زه‌مان گه‌ن، گشتى ئاماژه یا ئشاره‌ت ده‌ن ك كووتایى نزیكه‌و بویه، دویه‌كه وه‌ختى جه‌ڕكیشیام وه‌ل چه‌ن كه‌سیگه‌و له‌باوه‌ت پیشبینى یا ته‌نه‌بوئه‌یل فاڵچییگ عیراقى ناودار ك پیشبینى ئه‌وه كه‌ید ك جه‌هان دویاى دو ساڵ تره‌ك كووتایى تیه‌ید، وتم: من قه‌یریگ حه‌ب خه‌فتن خه‌مه گیرفانم و وه‌ختى هس وه‌وه كه‌م ك ڕویداى مه‌زن نزیكه‌وكرد یه‌كیگ له‌لیان قویته‌وده‌م و ئه‌را خوه‌م كه‌میگ خه‌فم، تا ئه‌و وه‌خته‌گ خه‌فتن هه‌میشه‌یى تیه‌ید، بى ئه‌وه‌گ هس وه هاتن ئه‌و كاره‌ساته‌گه بكه‌م ك ده‌ید له زه‌وى. من تاقه‌ت ئه‌وه نه‌یرم ك ته‌ماشاى ئاسمان بكه‌م وه‌ختى پڕ بوود له هه‌ور چركن و گرم و هوڕ و واران تیژ ك بووده لافاوه‌یل زه‌وى ماڵیگ و ئاو ڕه‌سیده بان خانیه‌یلمان له‌ى ژینگه‌ى پانتاییمانه، و تاقه‌ت ئه‌وه‌یشه نه‌یرم ك زه‌وى له‌رزه ژیروبانمان گشتى بله‌رزنى، و ئه‌و هه‌وا ك دارودره‌خت كه‌نێد و ماڵه‌یل ڕمنێد، و تاقه‌ت ئه‌وه‌یشه نه‌یرم بنووڕمه ئه‌و كه‌وكه‌به ك له نادیاریه‌و هاتیه‌و ده‌ید له زه‌وى، و تاقه‌ت ئه‌وه‌یشه نه‌یرم ك ته‌ماشا بكه‌م خوه‌ر له ڕووژئاواوه ده‌رچوود ك ئیمه له ڕووژ ئه‌زه‌ڵه‌و له ژیانمان له بان ئى زه‌وى پان وبه‌رینه، دوینستیام له ڕووژهه‌ڵاته‌و ده‌رچیاد. تاقه‌ت ئه‌وه‌یشه نه‌یرم ك ته‌ماشاى تووفانه‌گان خوه‌ر بكه‌م ك بوار موگناتیسى چوارده‌ور زه‌وى له‌ق كه‌ید و بووده مایه‌ى گوێڕیان ژینگه‌یى خه‌ته‌رناك و بكوشیگ. و شایه‌ت تسۆنامییگ بكه‌فیده ڕى و بیه‌ید له گشتلایگ زه‌وى و نقوم ژیر ئاوى بكه‌ید و دى هویچ شوونیگى ئه‌را ژیان وه‌كار ناید، ته‌نیا چه‌نه شوونه بویچكه‌ڵه‌یگ نه‌ود ك ده‌یان ساڵ تواید تا دوباره ئاماده‌بوود ئه‌را ژیانیگ نوو، دویاى ڕمیان هه‌رچى گشت ئه‌و ژیاره‌یل مه‌زنه ك ئاده‌میزاد دروسیان كرد، و ئه‌وه‌گ ڕه‌سیه پى له مه‌یدان په‌یوه‌ندى كردن و نه‌قل و خوه‌شگوزرانى، و دى چشتى نیه‌مینى ناوى كاره‌با بوود و وێستگه یا مه‌حه‌ته‌ى پاكه‌وكردن ئاو ، و ڕیگه‌ى قیرتاوكریاى و سه‌یاره و ته‌یاره و كه‌شتى نیه‌مینید، چوینكه یه بووده دوباره دروسكردن قه‌واره‌ى جه‌هان (هیكله) وه قه‌وڵ پسپۆره‌یل ژینگه و ئاسمان یا فه‌زا و په‌یجووریه‌یل مه‌یدان كه‌شوهه‌وا.
ئاژانس ناسا هه‌میشه ڕه‌ت ئه‌و چشته‌یله كه‌ید ك وتریان و ئویشیه‌ن و نویسیان و نویسیه‌ن له باوه‌ت ئه‌گه‌ر یا ئحتمال كه‌فتن كه‌وكه‌بیگ له ئاسمانه‌و ئه‌را بان زه‌وى وه خێرایى یا سورعه‌تیگ بى وینه، یان هه‌ر لاى كه‌م وه نزیكى چه‌ن ملیۆن كێلوومه‌تریگ له زه‌وى ك بووده مایه‌ى له‌قى یا خه‌له‌ل له جویلیان و گڕ خواردنى له چوارچیوه‌ى گڕووپ خوه‌ر، دویر له‌و هووكاره‌یله ك پاڵ نه‌نه ناساوه تا ئیجووره ڕاپۆرته‌یلیگ بشاریده‌وه و په‌خشى نه‌كریه‌ید له باوه‌ت ئى كه‌وكه‌به، وه‌لى چه‌ن هێما و ئشاراتیگ په‌یا بویه و زانیارییش زیایه‌و بویه وخه‌ریكه چووڕیه‌ید بى ئه‌وه‌گ هه‌وه‌جه‌ى بكه‌فیده ویكیلیكس، وگشتى مه‌زه‌نه‌ى ئه‌وه كه‌ن ك له مانگ حوزه‌یران هاتى نیبرۆ له ئاسمان دیار ده‌ید و جوور خوه‌ریگتر له جه‌رگه‌ى ئاسمان شه‌وق ده‌ید و ئنجا له كووتایى ساڵ 2012 زیاتر نزیكه‌و بوود، ك تاریخ تووماركریاى ئه‌و تووفان مه‌زنه‌سه ك بان زه‌وى گشتى پووشا و زه‌وى دوباره هه‌یكه‌له‌كریا وه‌ل قورتاربوین په‌یغه‌مبه‌ر نووح و چه‌ن كه‌سیگ له بنه‌ماڵه‌گه‌ى و ئه‌و كه‌سه‌یله ك باوه‌ڕ وه‌پى كردن له ناو كه‌شتییگ ك كنار ئاو فورات له شار كووفه‌ى ناودار دروسى كرد، و چه‌ن جووریگ له تویه‌م گه‌نم و جویه و داروده‌وه‌ن و چه‌ن جفتیگ مه‌ل و ئاژه‌ڵه‌یل وه‌ل خوه‌یا هه‌ڵگرد...
نووح ئاماده بوى ئه‌را ئه‌و ڕویداى مه‌زنه، وه‌لى ئیمه وه‌شیوه‌یگ جیاواز خوه‌مان ئاماده كه‌یمن و پاپاى هویچ نیه‌ویمن وشایه‌تیش قه‌یرى قه‌شمه‌رى وه‌ى چشتیشه بكه‌یمن، وه‌ك چوین ئیسه من كه‌مه‌ى.
