کام زوان رەسێدە خودا؟
کەنعان موڕاد/ لە هەفتایل سەدەی گوزەشتە، چەن پیاویگ لە ئاوایەیل دەورگرد خانەقین، رۊی وەرەو ماڵ خودا کردن، ئەرا سعودیە، تا بچنە حەج، لەناو ئەو مەردمە، یەکیگ لەو پیاوەیلە لە برادەرەیل خوەی وڵ بۊی، قەیری مینەیان کرد، وەلی بیخود، ئەو پیاوە ک زوانیگ بیجگە زوان داڵگی خوەی نێزانێد، لەنزیک کەعبە، ک ماڵ خوداس، رۊی وەرەو خانەقین کرد، داوا لە باوە مەحمۊێ کرد برادەرەیلی پەیا بکەێد.
هەنای ئۊشن: زوان داڵگی، ئۊشن خوەی ئەو زوانەسە ک لەماڵ قسە وەپی کریەێد، و هەمیش تۊنیمن بۊشیمن؛ ک خوەی زوان داڵگە، ک یەکەم قسەکردن چوودە گووش ئایەم، قسە و لاوەلاوەی داڵگە، ئەراوە زوان داڵگ ناسکترین زوانە ک خوەی زوان دڵە.
ئیمە، کورد فەیلی، زوان داڵگیمان، و زوان داڵگمان، زاراوەی فەیلیە، ک هەنای قسە وەی زوانە کەیمن، قسەی دڵ کەیمن، چۊنکە هەرچە هەس پاک و سادە و ناسکە وەگەرد قسەکردنمان وەی زوانە لەناو دڵمان پەیا بوود.
باپیرم، لە خوەنین نمازەگەی، چەن قسەیگ وەزوان داڵگی وتیاد، هەنای وتیاد: سەڵامو عەلەیکە چواریار نەبی، حەسەن و حوسەین و فاتمە و عەلی، و لەسەر قەوڵ خودا و پەیغەمەر. و بیگومان، مەردمەیل ئەو سەردەمە نمازیان وەیجۊرە بۊیە، چۊنکە زوان عەرەوی لەلاین سەخت بۊی.
هەنای قسە وەرد داڵگ کەێ، قسەی ئاسان و سادە کەێ، وەبی هۊیکردن و پەسەنکردن قسەیل فەرهەنگ، چۊنکە وەگەرد کەسیگ قسە کەێد ک گووش لە دڵ گرێد، نەگ لە زوان، و ئەگەر قسە وەگەرد خودا بکەێ، بایەتە وەو شیوە قسە بکەێ، چۊنکە خودا قسەی دڵ خوازێد، و قسەی ئاسان و راستەخو رەسێدە لای، و هەرچە زوان خوەد قورسەو بکەێ، هەرچە لە هەس دڵ و دەرۊن دۊیر کەفێ، ئەراوە خاسترین نماز و دوعا ک رەسێدە خودا، خوەی ئی زاراوەی ئیمەس.
کاک عەلی حسێن فەیلی، وەڕیەوبەر ئاژانس شەفەق نیوز، هەمیشە ئۊشێد: هەر پەیغەمبەریگ ئەرا میللەت خوەی تەقەلا داگە، و ئیمەیش میللەتیمن، و بایەتە ئەرا زوان خوەمان تەقەلا بەیمن، و ئۊشێدیش: داپیرم لە خوەنین نمازەگەی خاس زوانی وەگەرد عەرەوی نەخونجیا، و بەشیگ لە نمازەگەی کوردی بۊی، منیش وەهەنەکی وتیام؛ داپیرە ئی نمازدە نێڕەسێد، داپیرم وتیاد: رووڵە ئەو خودا ک کورد دروس کردگە، هەڵبەت لە زوانیشی رەسێدەو.
هەنای قسەی عەروی (فصيح) کەێ، بایەتە هۊیرد بخەێدە لای ریزوانەگە، شایەت وەخوەد نەزانێ، و قسەی خراویگ بکەێ ئەگەر (فەتحە و کەسرە) لە شۊن خوەی نەوەتی، و یەیشە بوودە جی نیگەرانی، ک لەجیای ئەوەگ قسەیل خاسیگ وەرد خودا بۊشێ، قسەی خراویگ بایدە بان زواند، ئیجا کەفێدە گیچەڵیگ وەرد خودای عەرەوەیلە.
باوجی خودا خودای گشتیە، و خود خودا زوان و نەتەوە نەیرێد، ئەراوە، گووش لە زوان نێگرێد، وەلێ گووش لە دڵ گرێد، و زوان دڵ خوەی زوان داڵگیە، و زوان داڵگی خوەی زوان داڵگە، و زوان داڵگ ئیمە، خوەی زاراوەی فەیلیە، ک وەیجۊرە زانیمن، ک زاراوەی فەیلی، رەسێدە خودا.
