لە نەغدە تا مەهاباد و تا وڵات کورد فەیلی
شەفەق نیوز- خوەشکە مەریەم ئاباریان، وە نام نازاری (تەنیا)، لە چالاکه‌یل خزمەت وە کەم‌ئەندامەیلە دە شار مەهاباد.
ئەو یەکێ لە بەرپرسەیل و چالاکترینەیل ئەنجومەن ئەدەبی مەهاباد دە کاناڵ و گرووپ تلگرامی ئەو ئەنجومەنە ک وە مێهر خوەشکانە ئی جەرخە جەمەو دکەێ، چەن وەخت پێشتر، کتاو شێعرێ وە دا وە دەر ک کەڵکڵەیل ژنێ دە ئاستانەێ وەرزێگ سەرد، دوارە دە نامێ دیاری بی.
چالاکی ئەوی دە ئەدەبیات و خزمەتگوزاریێ ئەڕا جەرخەسازی ئەدەبی دیاری‌ترە لە هەر چشتێ.
کەم نیین ئەوانەێ ک دە دریژای میژوو چالاکوەندی ئەوان بییە وە هووی هامار کردن رێگە ئەڕا زهیر و ئەڵهاتن شاعرەیلێ پایەبەرزتر.
وەێ خاترە دە ئی بەشە، ئەڕا رێزگرتن وە دڵسووزییەیل شاعرانە ئی خوەشک شاعرە، دەمتەقەی پڕ لە هەستێ کوردانە کردیمنە، یە ئیوە و یەیش ئی دەمەتەقە.
ــ خوەشکە خوەش هاتیتە وە وڵات کورد فەیلی، کەمێ فرەتر خوەت وەمان بناسن.
:م هەفت رووژ ماگە لە ئاخرین مانگ تاوسان دە ساڵ 1365 هەتاوی دە شار نەغەدە، هاتمە دی و دەس سەرنوێشت یە چەن ساڵە خستگەسەمە شار مەهاباد.
ـ لە کەێیەو هاتیتە نام دنیای شێعر و شاعری؟
: م هە لە سەردەم مناڵییەو، وەرد شێعرەیلەێ مناڵانەێ مستەفا ڕەحمان‌دوست، شاعر فارس‌زوان ک مناڵانە شێعر دویشێ، گورێ گرتم و وەگەرد شێعر و لە تەمەنی 27 ساڵانەویش وه‌رد شێعر کوردی ئاشنا بیم.
ـــ لە چ ساڵێگه‌و دەس کردیتە شێعر کوردی وتن
: م لە ساڵ1381ه‌و شێعر کوردی وتمه باۆجی لە سەرەتا شێعر فارسی وتمە.
ــ لە چ چوارچووەیێگ شێعر وتیتە؟
:فرەتر دوبەیتی وتمە هەرچەن وە دڵنویسەیلەمەو وە شێعر نوو نزیکترە‌و بیمە و ئێسەیش شێعر نوو دویشم، کەم تا کوتێ، ئوو وەێ باوەڕمە ک شێعر نوو لەو قاڵبەیلە ژنانەترە چوون ژنەیلە فرە رومانتیکترن لە پیاگەیلە.
-شێعرەیلەێ تو فرەتر هانە چ حاڵ و هەوایێگ؟
: گرینگترین تایبەتمەندی شێعرەیلەی م ژنانە بیینێیانە، سادە و پڕ لە گلیە و تەنیاییەیل ژنێ ک هەمجا دە ئاستانەێ وەرزێ سەرد وساگە، ئی‌جارە وەرزێگ سەردتر، ژن کورد، لە گشتێ فرەتر وەێ هەستە نزیکترە.
-وە ئی ئمکاناتەو ئی تکنولووژیەیش؟ تەنیایی مانا دیرێ؟
:تەنیایی، سیەم و ساگە‌ێ دە نام ئی هەمگەی تکنولووژییەو دە بان سەرمان فرە سەنگین‌ترە، دوفێشتر ئەڕا ژنەێل، ئەوەیش ژنەیلێ ک شاعرن و دخوازن هە وەو ئێحساسەیل ژنانە ک دیرن شێعر بویشن تکنولووژی، هەر ئەوقەرە ک ئایمەیل دوور وە یەکتری نزیکەو کردگە، نزیکتریەیلە لە یەکتری دوورترەو کردگە و شاعرەیلەیش لە خوەیان دووترەک.
شاعرەیلێ ک لە هشارەی چەم و دەم ئڵهامێ شاعرانە گرتنە ئێسە وەێ هەمگە دوور کەفتن لە زوان بەدەن، لە زوان هشارە، چ جووری دتوانن وەرد یەکترەکی قسە بکەن؟
دە ئی بەرد ئەڵ بەردە، م رەنگێ لە تەنیایی خوەێ پەلام شێعر دیارێگ و دوارە دە دنیای بێ‌بن شێعر وە تەنیایی دڕەسێ، ئی داواێ‌داوە، منێ چارەنویس ژنەیل کوردە ک شاعر وە دنیا دیان و شاعر دژین و شاعر دمرن.
-دە شێعر ئێسەێ سورانی عراق کێ دناسی؟ شێعر شاعرەیل کورد فەیلی عراق چە؟
: فرەتر لە شاعرەیل ئێسە، شێعر شاعرەیل ئەوساێ کورد، چ دە ئێران و چ دە عراق، دڵخواز منە، لە شاعرەیل کڵاسیک تا شێرکۆ بێکەس نەمر.
شاعرەیلەێ ئێسەێ سورانی‌وێژ عراق فرە نەدناسم، وە داخەوە شاعرەیلەێ کورد فەیلی عراقیش، هەر چەن بنزار کوردی فەیلی، فرە دە لام شیرینە.
-دۆماقسەت چەسە؟
:دۆماقسەم دۆماخوازمە لە گشت. لە گشتێ دخوازم ک کوردی بپووشن و وە زوان کوردی قسە بکەن، وە زوان کوردی بنووسنن وە هەر بنزار و بن‌زوانێگێ کوردی ک دزانن، چوون زوان کوردی، گشتێ پڕ لە هەستە، چ دە نەغەدە ببێ، چە مەهاباد و چ وڵات کورد فەیلی، کورد هەر باوان ِ کوردە.
