كورد بەغداد و "شەفەق" لە فیستیڤاڵ کتاو لە دهۆک
شەفەق نیوز/ نۊسەر و رووژنامەوان ماجد سۆرەمەیری، وەڕیەوبەر بەش نۊسین و بڵاوکردن لە ماڵ رووشنهۊری و بڵاوکردن کوردی، وانەیگ وەناونشان "دەور كورد بەغداد لە شیوەی رووشنهۊری کوردی" پێشکەش کرد، لەناوی باس چینیگ لە میژوو هەسی کورد لە بەغداد و دەور زانا و رووشنهۊر و ئەدیب و هونەرمەنەیلیان لە مەیدان رووشنهۊری وە زوان عەرەوی و کوردی کرد.
ئەوەیش لە فیستیڤاڵ کتاو هات ک ماڵ رووشنهۊری و بڵاوکردن کوردی لە وەزارەت رووشنهۊری و گەشتوگوزاری و ئاسەواری فیدراڵی وە هاوکاری زانکوی نەورۆز ئەنجامی دەێد، وە بەشداریکردن ماڵ باوەتەیل رووشنهۊری گشتی و ماڵ مەئموون و چەن ماڵیگ بڵاوکردن لە پارێزگای دهۆک.
سۆرەمەیری وت؛ هەسی کورد لە بەغداد چوودەو ئەرا ساڵەیل یەکەم لە دامەزران بەغداد، ک بیناکاریل و کارمەنەیل کورد بەشداری لە دروسکردن ئەو شار نووە کردن ک خەلیفەی عەباسی ئەبو جەعفەر مەنسور بینای کرد، و فرە لە کوردەیلە لەناوی جیگر بۊین، وتیش؛ لە سەدەی پەنجەم کۆچی/ یانزەی زایینی، دەسکریا بیناکردن مەکتەو وەدەس وەزیر سەلجوقی نیزام مەلک سەلجوقی ک زیاتر لە شەش هەزار خوەنەوار سەرگرد، و بڕ فرەیگ لە خوەنەوارەیل کورد لەناویان بۊی، ک زیاتر لە بیس وپەنج زانای ناودیار لەلیان دەرچگ، و فرەی خوەنەوار و زانایل کورد لە بەغداد نیشتەجی بۊین و لەناوی مەنن.
وتیش: کورد فەیلی دۊیەم بڕ کورد بۊین ک لە بەغداد جیگر بۊین، و هووکار لە ژیان کۆمەڵایەتی و بازرگانی و رووشنهۊری لەناوی بۊین، وەگەرد ئەو کوردەیلە ک ڕژیم وەرین وەرەو ناوڕاس و باشوور عراق باریان کرد، دۊیای دۊیای موئامەرەی ناودەوڵەتی لەبان شۆڕش ئازادیخواز گەل کوردستانی وە سەرکردایەتی مەڵا موستەفا بارزانی.
وەو شیوە، کورد کۆمەڵگایگ خۆجێیی لە چەن ناوچەیگ لە بەغداد پایتەخت دروس کردن، لە جادەی غازی (کیفاح) و سەدریە و باب شێخ و شارع فلسطين و جەمیلە و سەورە.
و دیاری کرد ک لەناو ئی کۆمەڵگای کوردە لە بەغداد، بڕێ لە رووشنهۊر و ئەدیب و زانا و بازرگان و پیشەدار ناودار پەیا بۊی، ک لە جۊلەی رووشنهۊری و سیاسی بەشدار بۊین.
دۊیای رمیان ڕژیم وەرین، دەور ماڵ رووشنهۊری و بڵاوکردن کوردی نەما، و گۆڤار و رۆژنامەیلی بەسیان، لەوەر ئەوە ک خاسترین ئەوانەگ لەناویان کار کردن لە مامووستا گەورەیلە یا وەرەو هەرێم کوردستان چگن یا خانەنشین بۊین یا مردن.
وتیش: باوجی کورد بەغداد مەیدانەگە لە هونەر و داهێنانیان چووڵ نەکردن، ک بەشیگ لە گەنجەیل کورد فەیلی ئەو بۆشاییە لە رووشنهۊری کوردی پڕەو کردن، ئەوەیش وە دروسکردن دامەزراو شەفەق ئەرا رووشنهۊری و راگەیانن کورد ک وە پاڵپشتیکردن سەرۆک حکومەت هەرێم کوردستان ئەو وەختە و سەرۆک هەرێم ئیسەی هەرێم کوردستان ئێزگەی درەوس کردن، ک رووژیگ ٢٤ ساعەت بەڕنامەیلی پەخش کردیاد، و هەمیش دوو گۆڤار دەرکرد، یەکیگ وە زوان کوردی وە زاراوەی فەیلی (گوڵ سوو) و دۊیەمیان وە زوان عەرەوی (فەیلی) و هەمیش ئاژانس شەفەق نیوز ک وە ماوەیگ پەیمانەیی تۊێنست شۊین خوەی لەناو ناودیار و گەورەترین ئاژانسەیل خەوری ناوچەگە جیگر بکەێد.
