كام چاپ لە قورئان سزیا؟
بیگومان، ئیجویر کردەوەیگ چز بنەێدە دڵ مەلیۆنا موسەڵمان، کەسیگ وەپی رازی نییە، چ قورئان بوود، یا ئەنجیل و تەورات و زەبوور، و چ ئەڤیستایش.
پارەکە، کابرایگ لەناو دەوڵەتیگ موسوڵمان جویر پاکستان، قورئان سزان، و مەردم وە سەنگ و کوچک وەشکیانە پیەو، و کوشتنەی، و پولیس وەهاناێ نەڕەسێد، ئیجا پولیس وت: ئەو کابرا مەغزی شیویایە، دویای ئەوە، هاوار لە کەسیگ بەرزەو نەوی، و دەنگیش وەبان نەهات، و کەسیگیش هەڕەشەی کەسیگ نەیا، و مەردمیش نەڕشیانە ناو جادەیل، چوینکە، هەم ئەو کابرا ک قورئانەگە سزان موسەڵمانە، هەمیش چوینکە کوشیا.
کوشتن کەسیگ وە شیوەیگ هەڕەمەکی (هەرکەڕاخوەی) هاوار فرەیگ خوازێد، وەلێ مەردم لەو کوشتنە بیدەنگ بوین، وەرانەوەر ئەو کردەوەی بەدە، ک سزانن قورئان بوی.
ئەوەگ قورئان بخوەنێد و لەلی بفامێد، بیگومان زانێد ک قورئان رازی لە کوشتن کەسیگ بی دادکاری نییە، و ئەگەر خاوەن کردەوە بفامیش بوود، نەگ ئی کابرا ک مەغزی شویایە، شایەت کەسیگ لەو قورئانە نەڕەسیەسەو.
لە هویرم تیەێد، هەنای قورئانەگەی ماڵمان، لەناو پەڕوو سەوزیگ بوی، ئەو پەڕوو سەوزە سام داشت، و کەسیگ ویرەی نەوی وەبی (دەسنماز) دەس بەێدە قەی ئەو پەڕووە.
وەهویرمە، هەناێ کەسیگ قورئان لەبن دەسی بوود، و باێدە ناو، بایەسە گشتمان لەشوین خوەمان هەڵسیمنە پا، لە سام قورئان، و لە ئەغماز مەردم ئەرا قورئان.
ئایا کی ئەو سام و ئەغمازە شکان، و هیشت کەسەیلیگ ویرە بیاشتوون و قورئان پیرووز بسزنن؟
کەسەیلیگ سام قورئان کاڵەو کردن، هەناێ -ئەرا نموونە- وە سوورەتیگ لە قورئان، جویر سوورەت (الانفال) شمارەی فرە فرە گەورەیگ لە خەڵک هەرێم کوردستان، کەفتنە وەر ژەهر و کیمیایی، ئیجا، وەناونشان سورەت (الفتح) عەفرین داگیر کریا.
و لەی دویاییە، وەناونشانەیل فرەیگ وەسنگ جیوەجیکردن فەرمانەیل قورئان، دویەتیگ کورد وەناو (ژینا ئەمینی) بویە قوربانی، و دویای ئەوە قەتار قوربانیەیل کەفتە ڕی.
وەگەرد ئەوەیش، میللەت کورد، دووس قورئان پیرووز دیرن، چوینکە خاس زانن، هەر خاوەن دەسەڵاتیگ باێد، قورئان کەێدە قەڵغان و شمشیر خوەی، و مەردم بیگوناه بوونە بەهانەی جیوەجیکردن ئەو چشتەیلە ک وەسنگ قورئان وەسەریان کەن.
کی زانێد، چە وەسەر ئەو کابرا هاتیە ک لە مەسیحیەیل خەڵک مووسڵە، و لە وڵات سوید داکاسیایە، تا رەسیە ئەو کردوەی فرە بەدە، وە سزانن چاپیگ لە قورئان پیرووز؟.
و ئایا کام چاپ لە قورئان سزان؟
هاتێ ئەو چاپە سزانیە ک فەرمان وە داعش دایە، کوشتن و بڕین وەمەردم بیکوناهیگ جیوەجی بکەێد.
هاتێ ئەو چاپە سزانیە، ک فەرمان وە کیمیاواران دایە، یا ئەو چاپە ک فەرمان وەسێدارەدان گەنجەیل ویرەدار دایە، یا ئەو چاپە بوود ک مناڵ و ژنەیل کورد لە وڵاتەیل فرووشتیە.
یا هاتێ ئەو چاپە سزانیە ک سەرۆک و وەرپرسەیل لەبانی قەسەم خواردنە، و دروو کردنە، و قورئانیش هویچ وەپیان نەکردیە، و تا تیەێد دەوڵەمەن و دەسەڵاتدارترەو بوون.
کابرا چە بزانێد؟، چوین بزانێد یە کام چاپە؟، هاتێ نیازی سزانن ئەو قورئانە نەوود ک لەلای خوداوەن داوەزیاس، وەلێ نیازی ئەو چاپە بوود ک خود موسەڵمانەیل، و ئاخونەیل، و دەسەڵاتدارەیل ئەرا کار و تەگبیر خوەیان وەکاری هاوردنە، ئەرا دزیکردن و تاڵان و کوشتن و بڕین لە مەردم.
