جارێ تر "ئاخرین ئه‌نار دنیا"
جارێ تر "ئاخرین ئه‌نار دنیا"
گڕێ ده دنیای هونه‌ریێگ ژنانه
شه‌فه‌ق‌نیوز- "به‌توول مه‌نسووری‌جوو" وه نام‌نازاری "هناس فه‌یلی"، کورد فه‌یلی مه‌ڵکشایێگه ک له باوگ و داڵگێ به‌غدادی هاتگه‌سه دی
ئه‌و ک ئێسه دانیشتگ تێهرانه، ده چه‌ن پیشانگای کاره‌یل هونه‌ری کار دکه‌ێ و ده‌سکاره‌یل خوهی وه‌رد بره‌ند هونه‌ری "هونرین" ک برندێ هن ژنه‌یل هونه‌رمه‌نده، دفرووشێ.
ده ئی گڕه دنیشیمنه پای ده‌منیشت ئی ژن هونه‌رمه‌نده.
- هناسه گیان، خوه‌ش هاتی
: خوه‌ش بمینن، وه بان چه‌م، منیش خوه‌شاڵم ک هامه خزمه‌تتان
- جگێ له خوه‌ت بویش ئه‌ڔامان، خوه‌شکه
:م، ده بنه‌ماڵه‌یلێگێ مه‌‌ڵکشای ک دانیشتگ به‌غدا بین و ده ده‌هه‌ی هه‌فتای میلادی، وه‌رد دوێم چین تاڕانن کورده‌یل فه‌یلی له عراق کریانه ده‌ر، ئه‌ڵبه‌ت ده تێهران، هاتمه دی.
بنه‌ماڵه‌گه‌مان ئاواره‌گی فره ده جیروفت و کاشان کیشان و چه‌ن ساڵێگیش هاتنه تێهران ژیان و م ده‌و ساڵه‌یله ده تێهران هاتمه دی، ده ساڵ 1977 زاینی، ئمجا وه ماڵه‌وه چگیمنه ئیلام.
- که‌ی هاتیته نام کار هونه‌ری.
: نزیکه‌ی بیس و په‌نج ساڵ پیش، م وه‌وێنه‌ی تایپیست ده هه‌فته‌نامه‌ی سوبح ئیلام، چگمه سه‌ر کار و چه‌مم وه رۊ دنیای هونه‌ر چه‌کیا.
ده‌وره‌یله ده که‌ش تایپ، جگ‌جگ ده‌س‌کردمه نیگارکیشی ئه‌ڕا ئه‌ڕازانن لاپه‌ڕه‌یل رووژنامه‌گه ک ئه‌ومه ده‌سی ئه‌نجام ددریا و کار سه‌ختێ بی. ئمجا مانگنامه‌ی ئیلامشار و ئمجا روویش. وه‌یجووره کیشریامه نام کار و بار نه‌خش و نگار کیشی.
- ده ئیلام، کڵاس و چشتێگیش چگیت؟
: نه، ده ئیلام ئه‌ومه، جیێ ئه‌ڕا کار هونه‌ری ژنه‌یل نه‌بۊ و هه ده ماڵ کار کارێ دکردم، تا وه ماڵه‌و، دواره هاتیمنه تێهران.
- ده تێهران چه؟
: ده ئێره، م له سه‌رانییه‌و وه کڵاس خه‌ت چگم و خه‌ت سه‌فیر کار کردم، دۊمای ئه‌وه چگمه کڵاس خه‌ت کووفی، جگه‌جگه دیم خه‌ت نه‌دتوانێ تێرم بکه‌ێ. ئمگل وه خاتر نزیکی خه‌ت کووفی و ته‌زهیب، خوه‌شم وه ته‌زهیب هات و وه‌ر ئه‌و ته‌زهیب کیشریام. وه‌رد دۊه‌ته‌‌گه‌م "دڵنیا" و کوڕه‌م "ژیار" ک ئه‌وانیش نه‌قاشی کیشن، رووڵه‌بجم هاتمنه نام کار هونه‌ری.
- ته‌زهیب یانێ چه؟
: مانای کیشان نه‌خش و بڵه‌خش سوننه‌تی ده پایمان و که‌م و کنار خه‌ت و قورئان و ... چشته‌یلێ له‌ی‌واسه.
- یانێ چگیته نام کار ته‌زهیب قورئان
: نه، ئه‌ڕا به‌یس قسه وتم و تاریفێ له‌ی کاره کردن. ئیمه بڕێ ژن هونه‌رمه‌ندیمن ک ته‌زهیب سوننه‌تی ئه‌ڕا سازین ده‌سکاره‌یلێ وه چوو و خه‌ڕگ (سوفاڵ) و قاقه‌ز و مس، گرتیمه‌سه کار.
- تا ئێسه پیشانگا داشتنه؟
: به‌ڵێ، وه‌ر ژه ئی قه‌یڕان کرونا، دو جار پیشانگای خه‌ت و ته‌زهیب ده تێهران داشتیمن
- ئوو ئمکه؟
:یه‌مه دی خۆ گشت چشتێ بییه‌سه مه‌جازی و ئانلاین. م ههم ده پهیجهگهی خوه‌‌م ده ئینستا و ههم ده پهیجهگهی بره‌ند (هونه‌رین) کاره‌یله‌مان دخه‌یمه وه‌ر چه‌م وڵات.
-ئایا دپووڕێ ک بویشیم شوون کورد بیینت ئوو هناس کورد، ده نام کاره‌یله‌ی "هناس فه‌یلی" دیاره؟
:هه‌ر هونه‌رمه‌ندێ، هه‌ر کارێ ک بکه‌ێ، چ بخوازێ و چ نه‌خوازێ، یا خاستر بیشیمن، چ خوهی ئاگا وه‌ێ ببێ و چ بزانێ و چ نه‌زانێ، شوون زوان داڵگیێ ده کاره‌یله، دبێگه دی. منیش وه‌یچۊنه.
-ئه‌ر دیارتر بخوازیمن بیشیمن؟ چه؟
:ئا زق‌تریش هه وه‌یجووره‌سه. م فره‌تر مووتیڤ ئه‌نار دبه‌مه کار، چوون ویرم ها ده لای "دواهه‌مین هه‌ناری دنیا" ، ئه‌و دمائه‌ناره ک ماموستا به‌ختیار عه‌لی ده رومانێ ره‌یین کیشاگه‌سه. م ههم هه دڵم دقرچێ ک ئه‌و ئاخرین ئه‌نار دنیا، کوردانه، ده ته‌زهیبه‌یله‌م واژا بکرێ.
-سه‌ر قسه‌یله‌ت وتی، ئێسه بن قسه‌یله‌ت چه‌سه؟
:ئاواته‌خوازم ک کڕ داوو وڵات بکیشرێ و هیمیدارم ک زۊترێ ئی کرونا له ملمانه‌و ببێ و بتوانم ده ئیلام و کرماشان و سنه و مه‌هاباد و بووکان و ورمێ ده‌ی‌لا، ئوو ده وان و ئامه‌د و ئستامبووڵ و سڵێمانی و دهووک و هه‌ولێر و کووت و به‌غدا و به‌دره و خانه‌قین و عفرین و کووبانی، ده دنیای پڕ له هێمنی و دڵنیایی و دووستایه‌تێ و رێ و رێچه‌ی مێهر و یاری، وه‌وێنه‌ی ژنێگ کورد، پیشانگای ده‌سکاره‌یله‌م بخمه وه‌ر چه‌م هام‌زوانه‌یله‌م، وه‌ر چه‌م گشت دنیا، ئاوه‌ختمه، یه
