گرانی وەخت و چرکەیل تەمەن لە فیلم In time

هەرلە ئەکتەر جاسان تمبرلیک و ئەماندا سیفرید پاڵەوانیەتی لەناوی دوینن، ک جویر دوو هاووڵاتی لەناو کۆمەڵگایگ، تەمەن مەردم لە 25 ساڵان تەواو بوود، و مەردمەگە لە جیای پویل وە تەمەن چشت سینن و فرووشتن.

چیرۆک ئی فیلمە ئەڵاجەویە، و رویداوەیل فرەیگ لەناوی نییە، وەلێ پەیام بلیمەتیگ و رخبەریگ لەناوی هەس.

لە فیلمەگە، هەر کەسیگ و تەمەن خوەی لەبان دەس چەپی نویسیاگە، ک ئەگەر کەسیگ بنووڕێدە دەس کەسیگ، زانێد چەن چرکەی لەی ژیانە مەنیە.

هەر کەسیگ توەنێد لەی فیلمە بەشیگ لە تەمەن خوەی بەێدە کەسیگتر، و لەناو بانکیش، تەمەن لەجیای پویل هەس، و ئەگەر کەسیگ رووژانەکاری کرد، رووژانە لەتەمەن خوەی زیای کەێد، لەجیای پویل، و هەڵبەت، وەو تەمەنە توەنێد چشتیگ ئەرا خوەی بسینێد.

وەگەرد ئەوەیش، دزیکردن و رفیان تەمەنیش هەس.

وەگەرد ئی سیستمە، ک پویل نییە، و تەنیا پویلیگ ک مەردم وەپی سەنین و فرووشتن کەن، خوەی تەمەنە، وەگەرد ئەوەیش، چینیگ فرە فرە دەوڵەمەن هەس، زیاتر لە 100 ساڵ تەمەن دیرن، و چینگیش ئەگەر ئمڕوو کار نەکەن، سوو مرن.  

پاڵەوانەگە تەمەن فرەیگ کەفتە دەسی، وەلێ داڵگی یەک ساعەت و نیم لەی ژیانە ئەرای مەنیە، خوازێد بڕەسێدە داڵگی تا دە ساڵ لە تەمەن خوەی وەپی پیشکەش بکەێد، هەنای داڵگەگە سوار پاسەگە بوی، رانندەی پاسەکە وەپی وت: کرای پاسەگە دوو ساعەت تەمەنە، و تو تەنیا یەک ساعەت و نیم دیرێ، داڵگەگە نووڕیە مەردم وەلێ کەسیگ پاپەی نەوی، و کەسیگ وە یەک چرکە دەسمیەتی ئەو ژنە نەیا.

داڵگەگە لە پاسەگە هاتە خوار، و دەسکردە دەوکردن، تا بڕەسێدە کوڕەکەی.

لە دویرەو، داڵگ و کوڕ دەو کەن، تا وەیەک بڕەسن، و تەمەنیش دەو کەێد، و هەنای یەکانگیرەو بوینر داڵگەگە باوەش کردە کوڕەگەی، و کوتپڕ کەفتە بان زەوی، چوینکە تەمەنی تەواو بوی.

فیلمەگە پەیام گرنگیگ رەسنێد، ک هەرچەگ لەی ژیانە بکەێ، چ لە خاسی یا گەنی ئەرا ئی مەردمە، کەسیگ تەمەن خوەی پیشکەشد نیەکەێد.

هەر رووژیگ تیەێد و ئی تەمەنە تەواو بوود، و کەسیگ لە خوەد زیاتر قورتارد نیەکەێد.

تەنیا دوو کەس، ئامادە دیرن پاتری خوەیان ئەرا توو چووڵ بکەن، و تەمەن خوەیان وەتو پیشکەش بکەن، تەنیا دوو کەس، ک داڵگ و باوگە.