وەتەمەنترین پیاو لەبان ژیان.. کشاوەرزیگ فەنزوێلی لەتەمەن ١١٢ ساڵە
شەفەق نیوز/ دویای مردن خاوەن نازناو وەرین، کشاوەرزیگ فەنزوێلی لە تەمەن ١١٢ ساڵان، وە فەرمی بویە گەورەترین پیاو لەبان ژیان، وەگورەی کتاو گینس.
کتاو گینس لە بەیاننامیگ وت: وە فەرمی لە شوبات گوزەشتە ئەوە چەسپیا ک کشاوەرز فەنزوێلی خوان فیسینتە پیرێز گەورەترین پیاوە لەبان ژیان.
و دیاری کرد ک پیرێز تەندروسی و هویرمان خاسیگ دیرێد، ک هیمان مناڵیی و ژنخوازینی و ناو برا وزاڕووەیلی و کوڕەزایلی لە هویری مەنیە.
ئاژانس رۆیتەرز لە زوان گینس وتیش: بایەتە کەسەیل خیزانەگەی و برادەرەیلی لەدەوری بوون ک باس و گفتوگۆ خوەش وەردی کەن.
پیرێز لە بیس و هەفت ئایار ساڵ ١٩٠٩ لە ویلایەت تایچیرا لەداڵگ بویە، و لە تەمەن پەنج ساڵان دەسمیەتی باوگ و داڵگی لە کشاوەرزی دیاد.
هەنای گەورە بوی، پیرێز بویە وەرپرس یەکلاکردنەوەی مرافەیل بان زەویەیل لەو ناوچە. لە گەنجیی، دەزویرانی ئیدیوفینا دیک روزاریو گارسیا کرد، و ١١ مناڵ ئەرای هاورد، و تا ماوەی ٦٠ ساڵ وەگەردی گوزەران کرد، تا لە ساڵ ١٩٩٧ ژنەگەی مرد.
پیرێز خاوەن ٤١ کوڕەزا و ١٨ کوڕ کوڕەزاس.
گینس وتیش: کارکردن وەرەنج و تەقەلای و هوچان لە مەوقەی پشوو، و زوی خەفتن، و نووشین جامیگ لە "ئەگوارديانته" رووژانە، و نزیکبوین و دووسی خودا، ئەوانە هانە پشت درویژی تەمەن پیرێز.
