یەکەمە لە جەهان.. گەنجیگ ئیتالی تویش کۆڕۆنا و ئێدز و ئاوڵەی مەیمون وەیەکەو تیەێد

شەفەق نیوز/ راپۆرتیگ زانستی لە "Journal of Infection" بڵاو کرد ک ئیتالیا یەکەم کەس توومار کرد ک تویش سێ ڤایرۆس وەیەوکەو هاتیە لەیەک وەخت، ک ئێدز و کۆڕۆنا و ئاوڵەی مەیمون لەلای گردەو بوینە.

ڕاپۆرتەگە لە زوان رووژنامەی "il Messaggero" وت: ئەو کابرا ک تویش سێ ڤایرۆسەگە وەیەکەو هاتیە، تەمەنی ٣٦ ساڵانە  ٩ رووژ لە ئیسپانیا بویە ئیجا لە تەمووز گوزەشتە ئەرا ئیتالیا گلەو خواردیە.

گەنجەگە هەنای رەسیە ئیتالیا،  هەس وە کەمهازی کرد، وزیان لە تەو وقوڕگ وسەرژان داشت، و توقاوڵە لەبان زگی دەرچگ.

دویای ٣ رووژ لەی نشانەیلە، وبڵاوبوین لەکە لەبان دەس چەپی، تویشهاتنی وە پەتای کۆڤید-١٩ چەسپیا.

هەنای بیمارەگە بریا خەسەخانەیگ لە شار کاتانیا، پزشکەیل نووڕستن ک یە تویش ئێدز و ئاوڵەی مەیمونیش هاتیە، ک لەو مەوقە نشانەیل کۆڕۆنا لەلی کەمەو بوین.

رووژنامەگە وتیش: ئەو کابرا پەیوەندی سێکسی وەرد کوڕەیلیگ لە ئیسپانیا کردیە، وتیش: دویای ٧ هەفتە لە خەسەخانە دەرچگ.