پزیشکیگ عراقی هوشداری دەێد لە تیکەڵکردن دەرمانەیل لەناو دەرزی: هەڕەشەی ژیان دەێد
شەفەق نیوز - کەربەلا
پزیشک خیزان عەلی ئەبو تحین، رووژ سێشەممە، هوشداری دا لە رخبارییەیل تیکەڵکردن دەرمانەیل و دایینان وەرد یەک لەناو یەک دەرزی، و دووپات کرد کە ئی کارە شایەت بوودە مدوو کارلێکەیل دەرمانی رخباری و ئالووزییەیل کە ژیان ئایەم خەنە رخبارییەو.
ئەبو تحین، ئەرا ئاژانس شەفەق نیوز وت، کە ئاڵشتکارییەیل کەشوهەوا لە ماوەی هەردوگ وەرز پایز و وەهار، بیجگە لە وەرز زمسان، بەشداری کەن لە زیایبۊن تۊشهاتنەیل ڤایرۆسی و ئەنفلۆنزا و هەستیاری، و فتراق دا وە ئەوە کە زاڕووەیل و گەوراساڵەیل و ئەو کەسەیلە کە تۊش بیمارییە دریژماوەیل هاتنە لەو چینەیلە هەژمار کریەین کە فرەتر کەفنە وەر رخباری ئالووزییەیل.
و داوا کرد کە وریایی بکریەێد و گرنگی وە خوەراک تەندروس بیریەێد و دویرکەفتن لە جگارەکیشان و سەرچەوەیل پیسبۊن، وەرد خوازیایی سەردانیکردن پزیشک وەخت تونبۊن نیشانەیل یا دەرکەفتن نیشانەیلیگ کە هەوەجە وە دەسوەردەداین پزیشکی دیرن.
لەباوەت تیکەڵکردن دەرمانەیل، ئەبو تحین رووشنەو کرد، کە بڕیگ لە هاووڵاتییەیل پەنا بەنە وەر وەکارهاوردن دەرزییگ کە فرەتر لە یەک مادەی دەرمانی لەخوەی گرێد، و دیاری کرد کە لەو تیکەڵە باوەیلە تیکەڵکردن مادەی دیکلۆفیناکە، کە وە بازرگانی وە ناو "ڤۆلتارین" ناسریاس، وەرد مادەی دیکسامیسازۆن، کە وە ناو "دیکادرۆن" ناسریاس.
وتیش کە تیکەڵکردن دەرمانەیل لەناو یەک دەرزی نەبایەس وە شیوەیگ هەڕەمەکی جیوەجی بکریەێد، چۊنکە خوازیارە دڵنیابۊن لە گونجیان مادەیل و بۊین پاساویگ پزیشکی ئەرا وەکارهاوردنیان بەسێد، و هوشداری دا لە ئەگەر رویوەڕویبۊن وە کارلێکەیل دەرمانی تون لەلای بڕیگ لە کەسەیل، کە شایەت پەرە بگرێد ئەرا شۆکیگ هەستیاری یا ئالووزییگ کە کاریگەری لەبان دڵ و فشار خۊن بیلێد.
وتیش کە دەرنەکەفتن کاریگەرییە لاوەکییەیل لەلای کەسەیلیگ کە زویتر ئی دەرزییە وەکار هاوردنە مانای ئەوە نییە کە ئەرا گشت کەسیگ ئارامە، چۊنکە وەڵامداین لەش ئەرا دەرمانەیل لە کەسیگ ئەرا یەکیگ ترەک جیاوازە، و توانا نییە مسۆگەر ئەوە بکریەێد کە ئی کارەیلە بی رخباری بوون.
ئەبو تحین دووپات کرد لەبان ئەوەگ کە باوەڕبۊین وە خوازیایی دەسخستن دەرزی ئەرا رەسین وە خاسەوبۊن زوی بەشداری کردگە لە بڵاوەوبۊن زیایچگن لە وەکارهاوردن دەرزییەیل ماسولکەیی و دەماری، وەگەرد ئەوەگ کە فرەیگ لە بیماریەیل پەرسیو و ئەنفلۆنزای سادە توانا داشتوود رەفتارکردن وەردیان وە دەرمانەیل گونجیاگ دەمی جیوەجی بکریەێد، وەپەی نیشانەیل و رەوش تەندروسی بیمارەگە.
دیاری کرد کە بڕیگ لە هاووڵاتییەیل راسەوخۆ روی کەنە برینپێچەیل (مضمدەیل) ئەرا داواکردن دەرزییە تیکەڵەیل بی سەردانیکردن پزیشک، ئەو کارە کە رخبارییەیل وەکارهاوردن بی لێکۆڵینەوە ئەرا دەرمانەیل زیاتر کەێد، و دووپات کرد لەبان گرنگی دیاریکردن چارەسەر گونجیاگ وەپەی هەڵسەنگانن رەوش تەندروسی، و وەکارنەهاوردن دەرزییەیل یا دژە زیندەییەیل بی بۊین پاساویگ پزیشکی.
ئاشکرا کرد کە هەڵوژاردن چارەسەرەگە بایەسە پشت بوەسێد وە سروشت نیشانەیل و دەسنشانکردن بیماریەگە، نەک وە ئارەزوو بیمارەگە ئەرا خاسەوبۊن لە وەختیگ کوڵ، و داوا کرد کە دەرمانەیل لە سەرچەوەیل باوەڕپیکریاگ دەس بخریەێد و پابەندی وە رێنماییە پزیشکییەیل بکریەێد.
