دویای ١٦ ساڵ.. پیاویگ ئاشکرا ئەرای بوود ک مناڵەیلی لە توخم خوەی نیین
شەفەق نیوز/ پیاویگ چینی خوازێد لە ژنەگەی جیاوە بوود، دویای ١٦ ساڵ لە هاوسەرگیری، هەنای وەشکینیگ ئەرای ئاشکرا کرد ک سێ دویەتەگەی لە توخم خوەی نیین.
وەگورەی رووژنامەی "ساوت شاینا مورنینگ پۆست" پارەکە "چین" لەتەمەن ٤٥ ساڵان، گومان لە ژنەگەی "یو" کەفتە دڵی. خیزانەگەی "چین" لە ناوچەی جیانگشی لە خوەرهەڵات وڵات چین نیشتەجیین، باوجی پیاوەگە لە شاریگتر کار کەێد، وهەمیشە تەلەفۆن ژنەگەی کردیاد، وژنەگە خوەی دویر خستیاد، ک هیشت بکەفێدە شوینی.
لە ١ ئادار، پیاوەگە توەنست بکەفێدە شوین ژنەگەی تا هوتێلیگ لە خوەرهەڵات چین، ک وەگەرد پیاویگتر بوی، تا بڕیار دا وەشکین ئەرا توخم خوەی بکەێد.
دویای دەرکەفتن ئەنجامەیل وەشکینەگە، "چین" زانست ک ئەو سێ دویەتە ک ئیوەتیان کەێد لە توخم خوەی نیین، وەگورەی سایت "یاهو نیوز". "چین" ئەرا ئیزگە و تەلەڤزیۆن "جیانگشی" وت: هویچکامیان مناڵ خوەم نییە.
دویای دەرچگن ئەمجامەگە، "یو" دیاری نەما، و چین داوا لە میدیایل راگەیانن کرد دەسمیەتی لە پەیاکردن ژنەگەی بیەن. ویستگەیگ تەلەڤزیۆنی توەنست پەیوەندی تەلەفۆنی وەرد "یو" بکەێد، وتیە من شویەگەم نەخەڵەتانمە، وگرنگ نییە مناڵی لە توخم خوەی بوود.
وتییشە؛ ئەو ژن وشویەیلە ک مناڵ ئەرایان نیەوود، هەمیشە مناڵ کەسیگتر ئیوەت کەن، وئەو سێ دویەتە ئەرا چەن ساڵیگ وەپی ئویشن باوە، وئیسە ئویشێد یانە مناڵ من نیین، چ جیوازیگ لە ئاژەڵ دیرێد؟.
پارێزەر "چین" ئەرا ئیزگە و تەلەڤزیۆن جیانگشی وت: توەنێد تەڵاق ژنەگەی بیەێد ئەگەر زانێد ک کردەوەیلی زەرەد سەختیگ وە پەیوەندییان داگە.
وتیش؛ یاسا نەگ تەنیا ئەرا داواکردن قەرەبوو پویل وخەرجکردن لە ژنەگەی گاڵی دەێد ک ئەرا ئەو سێ مناڵە خەرج کردیە، باوجی هەمیش توەنێد داوای قەرەبوو لە زیان دەروینییش بکەێد.
