خانمیگ تۊشهاتگ بیماری داون کۆمپانیای بسکیت دانەێد
2022-03-04T07:12:17+00:00
شەفەق نیوز/ کۆلێت خانمیگ تەمەن 31 ساڵە و بیمار داونە، ئی خانمە لە تەمەن 26 ساڵی تۊنستیە بڕوانامەی زانکۆ لە (Clemson University) وەدەس بارێد، باوجی لە دۊای تەواوکردن زانکۆ تەقەلا دایە کار بکەێد وەلێ هەمیشە خاوەنکارەیل یەک جواو ئەرا کۆلێت داشتنە، ئەویش "ئی کارە ئەرا تو نێگونجێد ".
باوجی کۆلێت لەوەر باوەڕداشتن وە توانایلی بڕیار دەێد دەسبکەێد وە دروسکردن پسکیت و لە مارکێت و بازاڕەیل بفروشێدێ و دۊاجار کۆمپانیایگ تایبەت وە ناو (Collettey’s Cookies)دابنێد لە ماوەی پەنج ساڵ کارکردنی تۊنێد بڕ 1.2ملیۆن دۆلار قانجاز بکەێد، ئیسەیش 15 کارمەن لە کارگەگەی کارکەن.
