تا دیدە هەس بنووڕن.. خیزانیگ کەنەدی وەرجە کووری چەویان جەهان گەردن
شەفەق نیوز/ باوگ و داڵگیگ کەنەدی، ڕک دیرن ک چوار مناڵەگیان بگەردنە دەوڵەتەیل جەهان، ئەرا گەشتیاری و نووڕین، لە رخ ئەوە ک ئەو مناڵەیلیانە چەویان کوور بوود، چوینکە تویش بیماری دەگمەنیگ هاتنە.
وەگورەی "سی ئێن ئێن" ئەو باوگ و داڵگە، ئیدێت لیمای، و سپاستیان بيتيليی، خوازن وەگەرد رووزگارەگە دەو بکەن، تا ئەو سێ کوڕ ویەک دویتیانە، شوینەیلیگ لە جەهان بوینن، تا ئەوەنە توانای نووڕین دیرن.
ئەو بیماری دەگمەنە، کەمکەم نووڕین چوو لەدەس دەێد، و تا ئیسە چارەیگ ئەرای نییە.
ئەو ژن وشویە، ئاشکرا کردن ک سێ کوڕیان خود بیماریەگە دیرن، هەمیش ئەو دویەتیانە لە تەمەن ١١ ساڵانیش.
داڵگەگە هەس وەبیدەسەڵاتی کەێد، ک هویچ چارەیگ ئەرا ئی بیماریە نییە.
داڵگەگە وە خەفەتیگ ئویشێد: پزشکەیل لەی وەختە نیەزانن تا چەنیگ نووڕین چەو مناڵەیل کەمەو بوود، وەلی هاتێ لەناوڕاس تەمەنیان وە تەواوی چەویان لەدەس بیەن.
داڵگەگە رکدارە تا هویرمان مناڵەیلی دەوڵەمەن بکەێد، تا تونێد بیلێد ئی مناڵەیلە چشتەیلیگ فرەتر بوینن، ک هەنای لەناو کتاو ناو "فیل" خوەنن خوازن بزانن ئەوە چەس، ئەراوە بایەتە بویننەی وەرجەیەگ کوور بوون لە هویریان بمینێد.
تا ئیسە، ئەو خیزانە سەردان لم نامیبیا کردنە، و فیلەیل بوتسوانا دینە، و سوار پەرەشووت لە کبادوکیای تورکیا بوینە، و هەمیش چینەسە ئەشکەفتەیل زەنجبار لە تەنزانیا، وهەمیش سەردان زامبیا کردنە.
خیزانەگە نیاز دیرن سەردان وڵاتەیلیگتر بکەن، جویر ئەندەنوسیا و وڵاتەیل باشوور خوەرهەڵات ئاسیا، تا بنووڕنە مەردمەیلیگ و شوینەیل و چشتەیلیگ جیاواز، تا ئەوەنە وەپیان کریەێد.
