پیاویگ هەڕەشەی هاوسەرەگەی وە بڵاوکردن وێنەگانی دەێد
شەفەق نیوز/ ئەنجومەن دادوەری باڵا لە عراق، ئمڕوو دووشەممە، راگەیان پیاویگ هەڕەشەی هاوسەرەگەی داگە وە بڵاوکردن وێنە تایبەتەگانی لەبان فەیسبووک ئەگەر پەنج مەلیۆن دینار وەپی نەیەێد.
رۆژنامەی ئەنجومەن دادوەری لە راپۆرتیگ نووسان: «حەنان» کەفتە وەر چزداین ئەلیکتڕۆنی و هەڕەشە وە بڵاوکردن وێنەگانی و ڤیدیۆیەیلیگ تایبەت وەخوەی لەبان ماڵپەڕەیل پەیوەندیە کۆمەڵایەتیەگان « فەیسبووک» ئەگەر پەنج مەلیۆن دینار عراقی وەپی نەیەێد، وەرانوەر سڕینەوە وەبڵاونەکردنیان.
وەگورەی رۆژنامەگە، حەنان باسەگەی لەوەردەم دادوەر دادگای تاوانەیل قادسیە کرد، وت: بڕوا نەکردم رووژیگ باێد و هاوسەر شەرعی و یاسایی خوەم ئی رەفتار ناشرینە بکەێد، ک کەفتمە وەر چزداین ئەلیکتڕۆنی و هەڕەشە وە بڵاوکردن ڤیدیۆ و گرتەیلیگ تایبەت ک لە ژوور خەفتن خوەم تۆماریان کردمە لە مەوقەی هاوسەرگیری.
وتیش؛ چزدەرەگە هەڕەشەی بڵاوکردن ئەو وێنەیلە دا ئەگەر پەنج مەلیۆن دینار نەیەم، وەرجە دوو مانگ هاوسەرگیری کردم، وناکۆکی کەفتە ناوبەینمان، ک ناچار بویم ماڵ وەجی بیلم و بچمەو وەرەو ماڵ باوانم، بەڵکم دویای چەن رووژیگ شویەگەم دەسکردە چزداینم وەو وێنە و ڤیدیۆەیلە ک هانە بان مۆبایلەگەی، وداوای پویل وەرانوەر سڕینیان وەبڵاونەکردنیان لەلیم کرد.
وئاماژە کرد ک خوەی پەیوەندی وە یەکیگ لە کەسوکارەیل شویەگەی کرد تا دەس بەێدە وەر بەشکی کۆتایی وەی باوەتە بارێد، و کەسەگە دانووستان وەگەردی کرد، ورەسیمنە رێککەفتنیگ ک پویلەگە بکەێدە سێ مەلیۆن دینار، وەمرجیگ یەکەم بڕ لەلی بیەم، و دویای سڕین وێنەگان وەدەس خوەم ئیجا ئەو بڕەگە بیەم.
قوربانیەگە دیاریکرد ک رێککەفتنەگە هەمیش ئەوە بوی ک ٦٠٠ هەزار دینار جوور یەکەم بڕ بیەم، و ئەویش چگ ئەرا لای شویەگەم ک لەنزیک ماڵەگەم چەوەڕیی کرد، وەگورەی تۆمارکردن کامیرایل ماڵەگە ک نشان وەرگردن پویلەگە لەو کەسە دەن.
لە کۆتایی باسەگەی وتیش؛ دویای تەقەلای وازکردن مۆبایلەگەم، دەرکەفت ک پەکی کەفتگە و هیچ لەو وێنەیلە لەناوی نیە ک هەڕەشەم وەپیان دیاد، ئەراوە ساکاڵا لەلای دادگای لێکۆڵینەوە لەبانی تۆمار کردم، چوونکە هەر لە چزداینم واز نەهاورد.
