لە خیزانیگ کە دەرکردن وەخوەیەو دی تا دەسمیەتیداین هاتگەیل.. شەهلا فەیلی پایەیگ یاسادانان سویدی وەدەس تیەرێد

شەفەق نیوز- ستۆکهۆڵم

ئەنجامەیل هەڵوژاردنەیل ئەنجومەن هەرێم ئورێبرۆ سویدی نیشان دان کە شەهلا ئیبراهیم جەهانبەخش ئۆجاق (Shahla Ojagh) کورسییگ لەبان حزب سۆسیالیست دیموکرات لە بازنەی ئەنجومەن ئورێبرۆ–لیکێبیرغ وەدەس هاوردگە.

وەپەی ئەنجامە بڵاوکریایەیل لەلای دەسەی هەڵوژاردنەیل سویدی، حزبەگەی 12 کورسی لە بنەڕەت 40 لە بازنەگە وەدەس هاورد، لە وەختیگ شەهلا سەرکەفت دۊای ئەوەگ 243 دەنگ پەسەنکریاگ گرد.

 ئۆجاق لە بوار تیکەڵاوبۊن لە شارەوانی ئەسکەرسوند کار کەێد، و وەرجەیە بەشداری لە پرۆژەیل فێرکردن زوان سویدی ئەرا هاتگەیل و پاڵپشتیکردن بەشدارییان لەناو کۆمەڵگە کردگە.

هەمیش نۊنەرایەتی کۆمەڵەی "ماڵ کوردی" لە ئەنجومەن هاوکاری وەرد کۆمەڵگەی مەدەنی لە شارەوانی ئورێبرۆ کەێد، و لە ساڵ 2023ەو پایەیگ یەدەگ لە دوو دەسەی سەر وە هەرێمەگە گردیەسە دەس.

 شەهلا ئۆجاق لەو بنەماڵە کوردە فەیلییەیلە کە تۊش دەرکردن زوورەملێ و قڕکردن وە دەس رژیم وەرین عراقی هاتن، و خیزانەگەی ئەرا ناوچەیل کوردی لە ئیران رەسین، وەرجە ئەوەگ لە سەرەتایل نەوەتەگان وەرەو سوید بچن.