ئیلام.. پاڵەوانێتییگ ئەرا "وەهێزترین پیاو لەناو هووزەیل" لە ئیران
شەفەق نیوز- ئیلام
لە شارۆچکەیگ سنووری خوەرئاوای ئیران، پیایەیلیگ کە سەر وە هووز و ئێڵەیل وڵاتەگەن لە پاڵەوانێتییگ هاز لەش رکابەری کەن کە ناویگ لە کەلەپوورەو وەرگیریاگ هەڵگردگە "یەلان ئیل"، واتە (پاڵەوانەیل هووز) وەگورەی مانا باوەگەی دەسەواژەگە.
وەپای راپۆرتیگ ئاژانس ئیرنای ئیرانی کە ئاژانس شەفەق نیوز ئەلگەردانی کردگە، شار مێهران لە پارێزگای ئیلام فەیلی، لە 4 – 6 کانوون یەکەم 2026، میوانداری یەکەم وەشان ئی پاڵەوانێتییە نیشتمانییە کەێد، وە بەشداری 58 وەرزشوان لە 27 پارێزگاوە، کە لە هەشت وەرزش هێز رکابەری کەن.
عەقید عەلی رەزا پوور ئەکبەری، وەرپرس بەسیج کۆمەڵگای هووزەیل لە ئیلام وت: پێشبڕکێیەیل وە پەیکەریگ هاوشیوەی پاڵەوانێتی "بەهێزترین پیایەیل ئیران" رێکخریەن، و دووپات کرد یەکێتی ئیران ئەرا لەشجوانی و وەهێزکردن ماسیلچەیل دیزاینکردن رکابەرییەیل و سەرپەرشتی تەکنیکی و ناوبژیوانی گرێدە دەس.
لایەنە رێکخەرەیل تا ئیسە هویردەکاری هەشت وەرزشەگە رانەگەیاننە، و وەپای بەرنامەگە، هەر پارێزگایگ وە دوو وەرزشوان بەشداری کەێد، لە وەختیگ ئیلام، وە سیفەت میواندار، چوار وەرزشوان کلکەێد.
چالاکییەگە لایەنیگ رووشنهویری لە خوەی گرێد، کە لە پەراوێزی پێشانگایگ ئەرا کارە دەسییەیل و خواردنەیل ناوخوەیی و بەرهەمەیل یادگاری واز کریەێد، وە ئامانج ئاشناکردن سەردانکەرەیل وە دڵنگ و پیشەسازی و هونەرە نەریتییەیل هووزەیل.
ئیران دەیان گرووپ هووز و ئێڵ لە خوەی گردەوکەێد، لەوانە کورد و لوڕ و بەختیاری و قەشقایی، و کۆمەڵگایلیگ لەلیان شێواز ژیانیگ پارێزن کە پشت وە کووچەری وەرزی و ئیوەتکردن ئاژەڵ بەسێد، هەرچەن رێژەگەی وەگەرد شارنشینی داوەزیاگە.